୨୦ ହଜାର ଟଙ୍କା ଲାଞ୍ଚ ନେଉଥିବା ବେଳେ କୁଜଙ୍ଗ ବିପିଏମ୍ଙ୍କୁ ଧରିଲା ଭିଜିଲାନ୍ସ

ଜଗତସିଂହପୁର: ଲାଞ୍ଚ ନେଉଥିବା ବେଳେ ଭିଜିଲାନ୍ସ ଜାଲରେ ପଡ଼ିଲେ ଜଗତସିଂହପୁର ଜିଲ୍ଲା କୁଜଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ବ୍ଲକ୍ ପ୍ରୋଗ୍ରାମ୍ ମ୍ୟାନେଜର (BPM) ମନୋଜ ରଞ୍ଜନ ନାୟକ। ସୂଚନା ଅନୁସାରେ, ଜଣେ ଆଶା କର୍ମୀଙ୍କଠାରୁ ୨୦ ହଜାର ଟଙ୍କା ଲାଞ୍ଚ ନେଉଥିବା ସମୟରେ କଟକର ସ୍ୱତନ୍ତ୍ର ଭିଜିଲାନ୍ସ ଟିମ୍ ଚଢ଼ାଉ କରି ମନୋଜ ରଞ୍ଜନ ନାୟକଙ୍କୁ ଧରିଥିବା ଜଣାପଡ଼ିଛି। ଗତ କିଛି ଦିନ ଧରି ମନୋଜ ରଞ୍ଜନ ନାୟକଙ୍କ ବିରୋଧରେ ଲାଞ୍ଚ ଦାବି ନେଇ ଅଭିଯୋଗ ଆସିଥିବା କୁହାଯାଉଛି। ଅଭିଯୋଗ ଆଧାରରେ ଭିଜିଲାନ୍ସ ପକ୍ଷରୁ ଯୋଜନାବଦ୍ଧ ଭାବେ ଚଢ଼ାଉ କରାଯାଇଥିଲା। ଏହି ଚଢ଼ାଉ ସମୟରେ ତାଙ୍କଠାରୁ ନଗଦ ୨୦ ହଜାର ଟଙ୍କା ଜବତ ହୋଇଥିବା ଜଣାପଡ଼ିଛି। ଏହାପରେ ଭିଜିଲାନ୍ସ ଟିମ୍ ତାଙ୍କ ସହ ସମ୍ପର୍କିତ ବିଭିନ୍ନ ସ୍ଥାନରେ ମଧ୍ୟ ତଲାସି ଅଭିଯାନ ଚଳାଇଥିବା ସୂଚନା ମିଳିଛି। ମନୋଜ ରଞ୍ଜନ ନାୟକଙ୍କ କଟକ ଗୋପାଳପୁର, ରଘୁନାଥପୁର ଏବଂ ରେଢୁଆସ୍ଥିତ ପୈତୃକ ବାସଭବନରେ ମଧ୍ୟ ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇଥିବା ଜଣାପଡ଼ିଛି। ଘଟଣାକୁ ନେଇ ଭିଜିଲାନ୍ସ ପକ୍ଷରୁ ତଦନ୍ତ ଜାରି ରହିଛି। ତଦନ୍ତ ପରେ ଲାଞ୍ଚ କାରବାର ସମ୍ପର୍କିତ ଅଧିକ ତଥ୍ୟ ସ୍ପଷ୍ଟ ହେବ।