ଖୋର୍ଦ୍ଧାରେ ଠପ୍ କ୍ରସର ଶିଳ୍ପ: ଜୀବିକା ହରାଉଛନ୍ତି ହଜାର ହଜାର ଶ୍ରମିକ

ଏକଦା "ଭାତହାଣ୍ଡି" ଭାବେ ପରିଚିତ ଖୋର୍ଦ୍ଧା ଜିଲ୍ଲାର କ୍ରସର ଶିଳ୍ପ ଏବେ ଗଭୀର ସଙ୍କଟ ଦେଇ ଗତି କରୁଛି। ବିଶେଷ କରି ତାପଙ୍ଗ ଶିଳ୍ପାଞ୍ଚଳରେ ଥିବା ସମସ୍ତ କ୍ରସର ୟୁନିଟ ଦୀର୍ଘ ମାସ ଧରି ବନ୍ଦ ପଡ଼ିରହିଛି। ପାହାଡ ନିଲାମ ପ୍ରକ୍ରିୟା ଅଟକି ରହିବାରୁ ପଥର ଉତ୍ତୋଳନ ଓ କ୍ରସର କାର୍ଯ୍ୟ ବନ୍ଦ ହୋଇଯାଇଛି, ଯାହାର ସିଧାସଳଖ ପ୍ରଭାବ ହଜାର ହଜାର ଶ୍ରମିକ, ଟ୍ରକ ଡ୍ରାଇଭର ଓ କ୍ରସର ମାଲିକଙ୍କ ଜୀବନ ଜୀବିକା ଉପରେ ପଡ଼ିଛି। ସୂଚନା ଅନୁଯାୟୀ, ଗତ ପ୍ରାୟ ଦୁଇ ବର୍ଷ ଧରି ଜିଲ୍ଲାରେ ଥିବା ପଥର ଖଣି ଓ ପାହାଡ ନିଲାମ ହୋଇନଥିବାରୁ କ୍ରସର ଶିଳ୍ପ ଅଚଳ ହୋଇପଡ଼ିଛି। ଏହି ଶିଳ୍ପ ସହ ପ୍ରତ୍ୟକ୍ଷ ଓ ପରୋକ୍ଷ ଭାବେ ଜଡ଼ିତ ହଜାର ହଜାର ଲୋକ ଏବେ ରୋଜଗାର ହରାଇ ଦାଦନ ମୁହାଁ ହେଉଛନ୍ତି ପାହାଡ ବ୍ଲାଷ୍ଟିଂ ଠାରୁ ପଥର ପରିବହନ ଏବଂ କ୍ରସର ଚାଳନା ପର୍ଯ୍ୟନ୍ତ ସମସ୍ତ କାର୍ଯ୍ୟ ଠପ୍ ହୋଇଯାଇଛି। ଗାଡ଼ି ମାଲିକମାନେ ଋଣ କିସ୍ତି ପରିଶୋଧ କରିପାରୁନଥିବାରୁ ଅନେକ ଗାଡ଼ି ଫାଇନାନ୍ସ କମ୍ପାନୀ କବଜାକୁ ଚାଲିଯାଇଛି। ସେହିପରି ଅନେକ କ୍ରସର ୟୁନିଟ ଦୀର୍ଘଦିନ ବନ୍ଦ ରହିବା ଯୋଗୁଁ ନଷ୍ଟ ହେବା ଅବସ୍ଥାକୁ ଆସିପହଞ୍ଚିଛି। ଏହି ପ୍ରସଙ୍ଗକୁ ନେଇ ରାଜନୈତିକ ତର୍କ ମଧ୍ୟ ଜୋର ଧରିଛି। ଜିଲ୍ଲା ବିଜେଡି ସଭାପତି ରାଜେନ୍ଦ୍ର ସାହୁଙ୍କ ଅଭିଯୋଗ ଅନୁସାରେ, ପୂର୍ବରୁ ନିଲାମ ପାଇଥିବା ବ୍ୟକ୍ତିମାନଙ୍କୁ ବିଜେଡି ସହ ଜଡ଼ିତ ବୋଲି ସନ୍ଦେହ କରି ସେହି ନିଲାମକୁ ଖାରଜ କରାଯାଇଥିଲା ଏବଂ ପୁନଃ ନିଲାମ ପ୍ରକ୍ରିୟା ଆରମ୍ଭ କରାଯାଇଥିଲା। ଫଳରେ ଗତ ଦୁଇ ବର୍ଷ ଧରି ଶିଳ୍ପ କାର୍ଯ୍ୟକଳାପ ପୂର୍ଣ୍ଣରୂପେ ବନ୍ଦ ରହିଛି। ଏହି ସମସ୍ୟାର ସମାଧାନ ଦାବିରେ ଖୋର୍ଦ୍ଧା ଜିଲ୍ଲା କ୍ରସର ମାଲିକ ସଂଘ, ପାହାଡ ମାଲିକ ସଂଘ ଓ ହଜାର ହଜାର ଶ୍ରମିକ ଜିଲ୍ଲାପାଳ କାର୍ଯ୍ୟାଳୟ ଘେରାଉ କରି ବିକ୍ଷୋଭ ପ୍ରଦର୍ଶନ କରିଥିଲେ। ସେମାନେ ଶୀଘ୍ର ପାହାଡ ନିଲାମ ପ୍ରକ୍ରିୟା ସମ୍ପନ୍ନ କରି କ୍ରସର ଶିଳ୍ପକୁ ପୁନର୍ଜୀବିତ କରିବାକୁ ସରକାରଙ୍କୁ ଦାବି ଜଣାଇଛନ୍ତି। ଏପରିସ୍ଥିତିରେ ଖୋର୍ଦ୍ଧାର ଅତିରିକ୍ତ ଜିଲ୍ଲାପାଳ ସାଫଲ୍ୟମଣ୍ଡିତ ପ୍ରଧାନ କହିଛନ୍ତି ଯେ, ଜିଲ୍ଲା ପ୍ରଶାସନ ଏଦିଗରେ ଶୀଘ୍ର ଆବଶ୍ୟକ ପଦକ୍ଷେପ ଗ୍ରହଣ କରିବ। ଏବେ ଦେଖିବାକୁ ବାକି ରହିଲା, କେବେ ପୁଣି ଚାଲୁ ହେବ ଖୋର୍ଦ୍ଧାର ଭାତହାଣ୍ଡି ଭାବେ ପରିଚିତ କ୍ରସର ଶିଳ୍ପ ଏବଂ କେବେ ଫେରିବ ହଜାର ହଜାର ପରିବାରର ଜୀବିକା।