Katak Durga Puja: କଟକରେ ଦୁର୍ଗାପୂଜାର ମାହୋଲ, କେଉଁଠି ଷଷ୍ଠୀ ତ କେଉଁଠି ସପ୍ତମୀ ପୂଜା

କଟକ: ମଣ୍ଡପରୁ ପୀଠ, ସହରରୁ ପୁରପଲ୍ଲୀ, ସବୁଠି ଦୁର୍ଗାପୂଜାକୁ ନେଇ ଉତ୍ସବର ମାହୋଲ। ଏଥିସହ ଚଳଚଞ୍ଚଳ ହୋଇଉଠିଛି ସଂସ୍କୃତି ଓ ପରମ୍ପରାର ନଗରୀ କଟକ। ସହରର ବିଭିନ୍ନ ପୂଜାମଣ୍ଡପରେ ମା’ ଦୁର୍ଗାଙ୍କ ଆରାଧନାକୁ ନେଇ ଭକ୍ତିମୟ ପରିବେଶ ସୃଷ୍ଟି ହୋଇଛି। ଆଜି ବିଭିନ୍ନ ପୂଜାମଣ୍ଡପରେ ଚାଲିଛି ମା’ଙ୍କ ପୂଜାର୍ଚ୍ଚନା। ତେବେ ପରମ୍ପରା ଅନୁଯାୟୀ କେତେକ ମଣ୍ଡପରେ ଷଷ୍ଠୀ ପୂଜା ହେଉଥିବା ବେଳେ ଅନ୍ୟ କେତେକ ମଣ୍ଡପରେ ସପ୍ତମୀ ପୂଜା ଅନୁଷ୍ଠିତ ହେଉଛି। ଏହି ଭିନ୍ନତା ପଛରେ ରହିଛି ପୂଜାର ପାରମ୍ପରିକ ରୀତିନୀତି। ବଙ୍ଗୀୟ ପରମ୍ପରା ଅନୁସରଣ କରୁଥିବା ପୂଜାମଣ୍ଡପଗୁଡ଼ିକରେ ସପ୍ତମୀ ପୂଜା କରାଯାଉଥିବା ବେଳେ ଓଡ଼ିଆ ପରମ୍ପରା ଅନୁଯାୟୀ ପୂଜା କରୁଥିବା ମଣ୍ଡପଗୁଡ଼ିକରେ ଷଷ୍ଠୀ ପୂଜା ଅନୁଷ୍ଠିତ ହେଉଛି। ପୂଜାର ବିଧି ଅନୁଯାୟୀ, ମା’ଙ୍କ ଚକ୍ଷୁଦାନ ପରେ ଅନ୍ୟାନ୍ୟ ପୂଜାବିଧି ଜାରି ରହିଛି। ଧୂପ, ଦୀପ ଓ ମନ୍ତ୍ରୋଚ୍ଚାରଣରେ ମୁଖରିତ ହେଉଛି ପୂଜାମଣ୍ଡପ ପରିସର। ମା’ଙ୍କ ଦର୍ଶନ ପାଇଁ ଭକ୍ତଙ୍କ ମଧ୍ୟରେ ମଧ୍ୟ ଉତ୍ସାହ ଦେଖିବାକୁ ମିଳୁଛି। ଓଡ଼ିଆ ଓ ବଙ୍ଗୀୟ ପରମ୍ପରାର ଏହି ସୁନ୍ଦର ସମନ୍ୱୟ କଟକର ଦୁର୍ଗାପୂଜାକୁ ଆହୁରି ସ୍ୱତନ୍ତ୍ର କରିଥାଏ। ଆଗାମୀ ଦିନରେ ପୂଜା ଉତ୍ସବ ଆହୁରି ଜମିବା ସହ ସହରରେ ଭକ୍ତି ଓ ଆନନ୍ଦର ପରିବେଶ ଅଧିକ ଉତ୍ସବମୁଖର ହେବା ଆଶା କରାଯାଉଛି।