ବିହାରର ଗର୍ବ: କମନୱେଲ୍ଥ ପାରା ପାୱାରଲିଫ୍ଟିଂରେ କାଂସ୍ୟ ଜିତି ଇତିହାସ ରଚିଲେ ନାଳନ୍ଦାର ଝଣ୍ଡୁ କୁମାର

ନାଳନ୍ଦା: ବିହାର ପାଇଁ ଖୁସି ଖବର। ଦିନେ ରାସ୍ତାକଡ଼ରେ ବସି ବିକ୍ରି କରୁଥିଲେ ଆଳୁ, ପିଆଜ। ଆଜି ପାୱାରଲିଫ୍ଟିଂ ପ୍ରତିଯୋଗିତାରେ କାଂସ୍ୟ ପଦକ ଜିତି ଦେଶ ସହ ନିଜ ରାଜ୍ୟ ପାଇଁ ଆଣିଛନ୍ତି ଗୌରବ। ନାଳନ୍ଦା ଜିଲ୍ଲାର ହରନୌତ ପ୍ରଖଣ୍ଡର ସବନହୁଆ ଡିହ ଗାଁର ବାସିନ୍ଦା ଝଣ୍ଡୁ କୁମାର କମନୱେଲ୍ଥ ପାରା ପାୱାରଲିଫ୍ଟିଂ ପ୍ରତିଯୋଗିତାରେ କାଂସ୍ୟ ପଦକ ଜିତି ବିହାର ଓ ଦେଶର ଗୌରବ ବଢ଼ାଇଛନ୍ତି। ପ୍ରାୟ ଆଠ ବର୍ଷ ପରେ ବିହାରର କୌଣସି ଖେଳାଳି କମନୱେଲ୍ଥ ସ୍ତରରେ ଦେଶ ପାଇଁ ପଦକ ଜିତିବାରେ ସଫଳ ହୋଇଛନ୍ତି। ଏହା ପୂର୍ବରୁ 2018 ମସିହାରେ ବର୍ତ୍ତମାନର ବିହାର କ୍ରୀଡ଼ାମନ୍ତ୍ରୀ ଶ୍ରେୟସୀ ସିଂହ କମନୱେଲ୍ଥ ଗେମ୍ସରେ ସ୍ୱର୍ଣ୍ଣ ପଦକ ଜିତିଥିଲେ।

ସ୍କଟଲ୍ୟାଣ୍ଡର ଗ୍ଲାସଗୋରେ ଆୟୋଜିତ କମନୱେଲ୍ଥ ପ୍ରତିଯୋଗିତାରେ ଝଣ୍ଡୁ କୁମାର 24 ଜୁଲାଇ ରାତିରେ 72 କିଲୋଗ୍ରାମ ପାରା ପାୱାରଲିଫ୍ଟିଂ ବର୍ଗରେ ଉଲ୍ଲେଖନୀୟ ପ୍ରଦର୍ଶନ କରି କାଂସ୍ୟ ପଦକ ନିଜ ନାମରେ କରିଥିଲେ। ତାଙ୍କର ଏହି ସଫଳତା ପରେ ସମଗ୍ର ନାଳନ୍ଦା ଜିଲ୍ଲାରେ ଖୁସିର ମାହୋଲ ସୃଷ୍ଟି ହୋଇଛି। ଗାଁଠାରୁ ଆରମ୍ଭ କରି କ୍ରୀଡ଼ା ମହଲ ପର୍ଯ୍ୟନ୍ତ ସମସ୍ତେ ତାଙ୍କୁ ଜଣାଉଛନ୍ତି ଅଭିନନ୍ଦନ।

ତେବେ ଝଣ୍ଡୁ କୁମାରଙ୍କ ସଫଳତା କଠିନ ପରିଶ୍ରମ, ଦୃଢ଼ ସଂକଳ୍ପ ଓ ଅଦମ୍ୟ ଇଚ୍ଛାଶକ୍ତିର ପ୍ରତୀକ। ସେ ଏକ ସାଧାରଣ ପରିବାରରୁ ଆସିଛନ୍ତି। ତାଙ୍କ ବାପା-ମା' ଆଜି ମଧ୍ୟ ହରନୌତ ବଜାରରେ ରାସ୍ତାକଡ଼ରେ ଆଳୁ ଓ ପିଆଜ ବିକ୍ରି କରି ପରିବାରର ପ୍ରତିପୋଷଣ କରନ୍ତି। ଭାଇମାନେ ମଧ୍ୟ ପରିବାରକୁ ସହଯୋଗ କରୁଛନ୍ତି। ତେବେ ଆର୍ଥିକ ସମସ୍ୟା ସତ୍ତ୍ୱେ ପରିବାରଲୋକେ କେବେ ଝଣ୍ଡୁଙ୍କ କ୍ରୀଡ଼ା ସ୍ୱପ୍ନକୁ ଭାଙ୍ଗିବାକୁ ଦେଇନଥିଲେ।

ହରନୌତର ଏକ ସ୍ଥାନୀୟ ଜିମରେ ଅଭ୍ୟାସ କରୁଥିବା ବେଳେ ଝଣ୍ଡୁଙ୍କ ପ୍ରତିଭା ଚିହ୍ନଟ ହୋଇଥିଲା। ପରେ ସେ ନାଳନ୍ଦା ପାରା ସ୍ପୋର୍ଟ୍ସ ଆସୋସିଏସନ ସହ ଯୋଗଦେଇ ପ୍ରଶିକ୍ଷଣ ନେଇଥିଲେ। ତାଙ୍କ ଉତ୍କୃଷ୍ଟ ପ୍ରଦର୍ଶନ ପରେ ତାଙ୍କର ଚୟନ ଭାରତୀୟ କ୍ରୀଡ଼ା ପ୍ରାଧିକରଣ (SAI)ର ଜାତୀୟ ଉତ୍କର୍ଷ କେନ୍ଦ୍ର, ଗାନ୍ଧୀନଗର (ଗୁଜରାଟ)ରେ ହୋଇଥିଲା। ସେଠାରେ ପାରାଲିମ୍ପିକ୍ ପଦକ ବିଜେତା ଓ ଦ୍ରୋଣାଚାର୍ଯ୍ୟ ପୁରସ୍କାରପ୍ରାପ୍ତ କୋଚ୍ ରାଜେନ୍ଦ୍ର ସିଂହ ରହେଲୁଙ୍କ ମାର୍ଗଦର୍ଶନରେ ସେ ଆନ୍ତର୍ଜାତୀୟ ସ୍ତରର ପ୍ରସ୍ତୁତି କରିଥିଲେ।

ନାଳନ୍ଦା ପାରା ସ୍ପୋର୍ଟ୍ସ ଆସୋସିଏସନର ସଚିବ ଓ କୋଚ୍ କୁନ୍ଦନ କୁମାର ପାଣ୍ଡେୟ କହିଛନ୍ତି ଯେ ଝଣ୍ଡୁ କୁମାରଙ୍କ ଏହି ସଫଳତା ବିହାର ପାଇଁ ଐତିହାସିକ। ସେ କହିଛନ୍ତି, ଏହି ପଦକ ରାଜ୍ୟର ଯୁବ ଖେଳାଳିଙ୍କ ପାଇଁ ପ୍ରେରଣା ହେବ। ବିହାର ପାରା ସ୍ପୋର୍ଟ୍ସ ଆସୋସିଏସନର ସଚିବ ସନ୍ଦୀପ କୁମାର ମଧ୍ୟ ଝଣ୍ଡୁଙ୍କୁ ଅଭିନନ୍ଦନ ଜଣାଇ କହିଛନ୍ତି ଯେ ତାଙ୍କର ନିରନ୍ତର ପରିଶ୍ରମ ଓ ଶୃଙ୍ଖଳା ତାଙ୍କୁ ଏହି ସଫଳତା ଦେଇଛି। ଆଗାମୀ ଦିନରେ ମଧ୍ୟ ସଂଘ ପକ୍ଷରୁ ସମସ୍ତ ପ୍ରକାର ସହଯୋଗ ଜାରି ରହିବ।

ଗତ କିଛି ବର୍ଷ ଧରି ଝଣ୍ଡୁ କୁମାର ଜାତୀୟ ଓ ଆନ୍ତର୍ଜାତୀୟ ସ୍ତରରେ ଲଗାତାର ଭଲ ପ୍ରଦର୍ଶନ କରୁଛନ୍ତି। କ୍ରୀଡ଼ା ବିଶେଷଜ୍ଞଙ୍କ ମତରେ, ଯଦି ତାଙ୍କୁ ଏଭଳି ସୁଯୋଗ ଓ ସମ୍ପଦ ମିଳିଚାଲିବ, ତେବେ ସେ ଭବିଷ୍ୟତରେ ପାରାଲିମ୍ପିକ୍ ଓ ବିଶ୍ୱ ଚାମ୍ପିଅନଶିପ୍‌ରେ ମଧ୍ୟ ଭାରତ ପାଇଁ ପଦକ ଜିତିପାରିବେ।

ତେବେ ଝଣ୍ଡୁ କୁମାରଙ୍କ ପ୍ରମୁଖ ସଫଳତା ମଧ୍ୟରୁ 2021ମସିହାରେ କୋଲକାତା ଠାରେ ଆୟୋଜିତ 19ତମ ସିନିୟର ଜାତୀୟ ପାରା ପାୱାରଲିଫ୍ଟିଂ ଚାମ୍ପିଅନଶିପ୍ ରେ କାଂସ୍ୟ ପଦକ ହାସଲ  କରିଥିବା ବେଳେ, 2025 ଗ୍ରେଟର ନଏଡାରେ 22ତମ ସିନିୟର ଜାତୀୟ ପାରା ପାୱରଲିଫ୍ଟିଂ ଚାମ୍ପିଅନଶିପ୍ ରେ 72 କିଲୋଗ୍ରାମ ବର୍ଗରେ 205 କିଲୋଗ୍ରାମ ଭାର ଉଠାଇ ସ୍ୱର୍ଣ୍ଣ ପଦକ ଜିତିଛନ୍ତି। ସେହିପରି ଖେଲୋ ଇଣ୍ଡିଆ ପାରା ଗେମ୍ସ (ନୂଆଦିଲ୍ଲୀ) – 72 କିଲୋଗ୍ରାମ ବର୍ଗରେ ସ୍ୱର୍ଣ୍ଣ ପଦକ। 2025 ବେଇଜିଂ ୱର୍ଲ୍ଡ ପାରା ପାୱାରଲିଫ୍ଟିଂ ୱର୍ଲ୍ଡ କପ୍ (ଚୀନ) – 192 କିଲୋଗ୍ରାମ ଭାର ଉଠାଇ କାଂସ୍ୟ ପଦକ। 2025 କାଇରୋ ୱର୍ଲ୍ଡ ପାରା ପାୱାରଲିଫ୍ଟିଂ ଚାମ୍ପିଅନଶିପ୍ (ଇଜିପ୍ଟ) – ଭାରତର ପ୍ରତିନିଧିତ୍ୱ। 2026 23ତମ ସିନିୟର ଜାତୀୟ ପାରା ପାୱାରଲିଫ୍ଟିଂ ଚାମ୍ପିଅନଶିପ୍ (ରୁଡକି) – 72 କିଲୋଗ୍ରାମ ବର୍ଗରେ ସ୍ୱର୍ଣ୍ଣ ପଦକ। 2026 ଏସିଆ–ଓସିନିଆ ଓପେନ୍ ପାରା ପାୱାରଲିଫ୍ଟିଂ ଚାମ୍ପିଅନଶିପ୍ (ବ୍ୟାଙ୍କକ୍) – ଏସିଆ ଓ ଓପେନ୍ ଇଭେଣ୍ଟରେ କାଂସ୍ୟ ପଦକ। 2026 କମନୱେଲ୍ଥ ପ୍ରତିଯୋଗିତା (ଗ୍ଲାସଗୋ, ସ୍କଟଲ୍ୟାଣ୍ଡ) – 72 କିଲୋଗ୍ରାମ ପାରା ପାୱାରଲିଫ୍ଟିଂ ବର୍ଗରେ କାଂସ୍ୟ ପଦକ ଆଦି ସବୁ ହାସଲ କରିଛନ୍ତି।