ହସ୍ପିଟାଲ ସ୍ଥାନାନ୍ତର ହେଲେ ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ

ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ପାଇଁ ଆଶ୍ୱସ୍ତି ଖବର। ଜେଲରେ ଥିବା ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ସ୍ୱାସ୍ଥ୍ୟ ଓ ଚିକିତ୍ସାକୁ ନେଇ ମଙ୍ଗଳବାର ସୁପ୍ରିମକୋର୍ଟରେ ଶୁଣାଣି ହୋଇଛି। କୋର୍ଟଙ୍କ ନିର୍ଦ୍ଦେଶ ପରେ ଇମ୍ରାନଙ୍କୁ ଚିକିତ୍ସା ଓ ଆବଶ୍ୟକ ପରୀକ୍ଷା ପାଇଁ ଶିଫା ଇଣ୍ଟରନ୍ୟାସନାଲ ହସ୍ପିଟାଲକୁ ପଠାଯାଇଥିବା ଜଣାପଡ଼ିଛି। ତାଙ୍କ ସ୍ୱାସ୍ଥ୍ୟ ପରୀକ୍ଷା ଏବଂ ଆବଶ୍ୟକ ଚିକିତ୍ସା ପାଇଁ ଏକ ମେଡିକାଲ ବୋର୍ଡ ଗଠନ କରାଯାଇଥିଲା। ଓଡିଆଲା ଜେଲ ପ୍ରଶାସନ ପକ୍ଷରୁ ଦାଖଲ ହୋଇଥିବା ରିପୋର୍ଟରେ ଇମ୍ରାନଙ୍କ ପଲ୍ସ ଓ ହୃଦୟ ସମ୍ପର୍କିତ କିଛି ଚିନ୍ତା ପ୍ରକାଶ କରାଯାଇଥିବା କୁହାଯାଇଛି। ଏହା ସହିତ ଏନଜିଓଗ୍ରାଫି କରିବାକୁ ମଧ୍ୟ ପରାମର୍ଶ ଦିଆଯାଇଥିବା ରିପୋର୍ଟରେ ଉଲ୍ଲେଖ ଅଛି। ଶୁଣାଣି ସମୟରେ ସୁପ୍ରିମକୋର୍ଟ ଓଡିଆଲା ଜେଲ ପ୍ରଶାସନକୁ ଇମ୍ରାନଙ୍କ ସମ୍ପୂର୍ଣ୍ଣ ମେଡିକାଲ ରିପୋର୍ଟ ଦାଖଲ କରିବାକୁ କହିଥିଲେ। ତେବେ କୋର୍ଟଙ୍କୁ ସମ୍ପୂର୍ଣ୍ଣ ରିପୋର୍ଟ ବଦଳରେ କେବଳ ଏକ ସାରାଂଶ ଦିଆଯାଇଥିବାରୁ ଜଷ୍ଟିସ ସାହିଦ ୱାହିଦ ଅସନ୍ତୋଷ ପ୍ରକାଶ କରିଥିଲେ। ଏହି ମାମଲାରେ ତିନିଜଣିଆ ଖଣ୍ଡପୀଠ ଶୁଣାଣି କରୁଥିଲେ। ଖଣ୍ଡପୀଠରେ ଜଷ୍ଟିସ ସାହିଦ ୱାହିଦଙ୍କ ସହ ଜଷ୍ଟିସ ନଇମ ଅଖତର ଅଫଗାନ ଏବଂ ଜଷ୍ଟିସ ଇସ୍ତିଆକ ଇବ୍ରାହିମ ରହିଥିଲେ।

ଶୁଣାଣି ସମୟରେ ଇସଲାମାବାଦର ଆଡଭୋକେଟ ଜେନେରାଲ କହିଥିଲେ ଯେ ଇମ୍ରାନଙ୍କ ଆବଶ୍ୟକ ଚିକିତ୍ସା ପରୀକ୍ଷା ଜେଲ ବାହାରେ ମଧ୍ୟ କରାଯାଇପାରିବ। ଅନ୍ୟପକ୍ଷରେ ପାକିସ୍ତାନ ତହରିକ-ଏ-ଇନସାଫ (PTI) ପକ୍ଷର ଓକିଲ ଇମ୍ରାନଙ୍କ ଶରୀରରେ ରକ୍ତ ଜମାଟ ହେବା ସମ୍ପର୍କିତ ଆଶଙ୍କା ଉଠାଇବା ସହ ତାଙ୍କ ପସନ୍ଦର ଡାକ୍ତରଙ୍କ ଦ୍ୱାରା ମଧ୍ୟ ଯାଞ୍ଚ କରାଇବାକୁ ଦାବି କରିଥିଲେ। ଇମ୍ରାନ ଖାନଙ୍କ ପରିବାର ସହ ସାକ୍ଷାତ ଅଧିକାରକୁ ନେଇ ମଧ୍ୟ ସୁପ୍ରିମକୋର୍ଟରେ ଆଲୋଚନା ହୋଇଥିଲା। ଇମ୍ରାନଙ୍କ ଭଉଣୀଙ୍କୁ ତାଙ୍କ ସହ ଦେଖା କରିବା ନେଇ ପ୍ରଶ୍ନ ଉଠିଥିଲା। ଜଷ୍ଟିସ ସାହିଦ ୱାହିଦ କହିଥିଲେ ଯେ ଭଉଣୀଙ୍କୁ ଦେଖା କରିବା କୌଣସି ଦୟାର ବିଷୟ ନୁହେଁ, ବରଂ ଏହା ତାଙ୍କର ମୌଳିକ ଅଧିକାର। କୋର୍ଟ ଗତ ତିନି ବର୍ଷ ମଧ୍ୟରେ ଇମ୍ରାନ ଓ ତାଙ୍କ ଭଉଣୀଙ୍କ ମଧ୍ୟରେ ହୋଇଥିବା ସାକ୍ଷାତର ବିସ୍ତୃତ ତଥ୍ୟ ମାଗିଛନ୍ତି। ଏହା ସହିତ ଇମ୍ରାନଙ୍କ ଝିଅଙ୍କ ସହ ହୋଇଥିବା କଥାବାର୍ତ୍ତା ଓ ଫୋନ କଲ୍‌ର ବିବରଣୀ ମଧ୍ୟ ଦାଖଲ କରିବାକୁ କହିଛନ୍ତି। ଇମ୍ରାନ ଖାନଙ୍କ ଚିକିତ୍ସା ସମ୍ପର୍କିତ ବିଷୟକୁ ରାଜନୈତିକ ପ୍ରସଙ୍ଗରେ ପରିଣତ ନକରିବାକୁ PTIକୁ ସୁପ୍ରିମକୋର୍ଟ ପରାମର୍ଶ ଦେଇଛନ୍ତି। ଇମ୍ରାନଙ୍କ ସ୍ୱାସ୍ଥ୍ୟକୁ ନେଇ ଦଳୀୟ ସଦସ୍ୟ, ପରିବାର ଓ ଗଣମାଧ୍ୟମରେ ଦିଆଯାଉଥିବା ବୟାନକୁ ନେଇ ମଧ୍ୟ କୋର୍ଟ ପ୍ରଶ୍ନ ଉଠାଇଥିଲେ। ସୂଚନା ଅନୁଯାୟୀ, ଓଡିଆଲା ଜେଲର ସୁପରିଟେଣ୍ଡେଣ୍ଟ ସୋମବାର ସୁପ୍ରିମକୋର୍ଟରେ ଇମ୍ରାନ ଖାନଙ୍କ ଦୁଇ ପୃଷ୍ଠାର ମେଡିକାଲ ରିପୋର୍ଟ ଦାଖଲ କରିଥିଲେ। ଏବେ କୋର୍ଟ ସମ୍ପୂର୍ଣ୍ଣ ମେଡିକାଲ ରିପୋର୍ଟ ଓ ଅନ୍ୟାନ୍ୟ ତଥ୍ୟ ଉପରେ ଆଗାମୀ ଶୁଣାଣିରେ ବିଚାର କରିବେ।

ରିପୋର୍ଟ- ସ୍ବର୍ଣ୍ଣଲତା ଗିରି