ଅନେକ ରାଜ୍ୟରେ ମୌସୁମୀ ପ୍ରକୋପ, ଭୂସ୍ଖଳନ ପାଇଁ ସତର୍କତା; ୨୧ ରାଜ୍ୟକୁ IMDର ଆଲର୍ଟ

ମଧ୍ୟପ୍ରଦେଶ : ଦେଶର ବିଭିନ୍ନ ରାଜ୍ୟରେ ମୌସୁମୀ ବାୟୁ ସକ୍ରିୟ ପ୍ରକୋପ ।  ଏହାକୁ ଦୃଷ୍ଟିରେ ରଖି ଭାରତୀୟ ପାଣିପାଗ ବିଭାଗ (IMD) ୨୧ଟି ରାଜ୍ୟ ପାଇଁ ବର୍ଷା, ବଜ୍ରପାତ, ପ୍ରବଳ ପବନ ଓ ଭୂସ୍ଖଳନ ସମ୍ଭାବନା ନେଇ ସତର୍କ ସୂଚନା ଜାରି କରିଛି। ଖୁବ୍ ଶୀଘ୍ର ମଧ୍ୟ ଉତ୍ତରପ୍ରଦେଶ ଏବଂ ରାସ୍ଥାନରେ ମୌସୁମୀ ବାୟୁ ପ୍ରବେଶ କରିବାକୁ ଯାଉଛି । ମୌସୁମୀ ଯୋଗୁଁ ଅନେକ ସ୍ଥାନରେ ପ୍ରବଳ ବର୍ଷା ଲାଗି ରହିଛି ।  ବିହାର, ଓଡ଼ିଶା, ସିକ୍କିମ, ପଶ୍ଚିମବଙ୍ଗର କିଛି ଅଞ୍ଚଳ, ପୂର୍ବ ରାଜସ୍ଥାନ ଓ ପଶ୍ଚିମ ମଧ୍ୟପ୍ରଦେଶରେ ପ୍ରବଳରୁ ଅତି ପ୍ରବଳ ବର୍ଷା ହେବାର ଆଶଙ୍କା ଥିବାରୁ ଅରେଞ୍ଜ ଆଲର୍ଟ ଜାରି କରାଯାଇଛି। ଜୁଲାଇ ୧ ତାରିଖ ପର୍ଯ୍ୟନ୍ତ ମୌସୁମୀ ବର୍ଷା ସକ୍ରିୟ ରହିବ ବୋଲି IMD ପୂର୍ବାନୁମାନ କରିଛି। ଅନ୍ୟପକ୍ଷରେ ଆସାମ, ମେଘାଳୟ, ଅରୁଣାଚଳ ପ୍ରଦେଶ, ସିକ୍କିମ, ଦାର୍ଜିଲିଂ, କାଲିମ୍ପୋଙ୍ଗ, ହିମାଚଳ ପ୍ରଦେଶ ଓ ଉତ୍ତରାଖଣ୍ଡରେ ଅତି ପ୍ରବଳ ବର୍ଷା ଯୋଗୁଁ ଭୂସ୍ଖଳନ, ଆକସ୍ମିକ ବନ୍ୟା ଓ ନଦୀ ଜଳସ୍ତର ବୃଦ୍ଧିର ଆଶଙ୍କା ରହିଛି। ପଶ୍ଚିମବଙ୍ଗ ଏବଂ ସିକିମ ସମେତ ସମସ୍ତ ଉତ୍ତର-ପୂର୍ବ ରାଜ୍ୟଗୁଡ଼ିକରେ ପ୍ରବଳ ବର୍ଷା ହେବା ନେଇ ପାଣିପାଗ ବିଭାଗ ସତର୍କ ସୂଚନା ଜାରି କରିଛି । ଲଗାତାର ବର୍ଷା ଯୋଗୁଁ ଏହି ରାଜ୍ୟଗୁଡ଼ିକରେ ଭୂସ୍ଖଳନର ଆଶଙ୍କା ମଧ୍ୟ ରହିଛି । ଏଥିସହ ପ୍ରବଳ ବର୍ଷା ଯୋଗୁଁ ହିମାଚଳ ପ୍ରଦେଶର ରାଜଧାନୀ ସିମଲାରେ ରାସ୍ତା ଜଳମଗ୍ନ ରହିଛି । ଫଳରେ ଲୋକମାନଙ୍କ ଯାତାୟତ ବାଧାପ୍ରାପ୍ତ ହୋଇଛି । ପାହାଡ଼ିଆ ଅଞ୍ଚଳରେ ଲୋକମାନଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି। ପ୍ରବଳ ବର୍ଷା ଯୋଗୁଁ ଡ୍ରେନ୍ ଭିତରେ ୩ଟି ଗାଡ଼ି ଭଗ୍ନାବଶେଷରେ ପୋତି ହୋଇଯାଇଥିବା ଜଣାପଡିଛି । ଏହା ବ୍ୟତୀତ ପ୍ରବଳ ବର୍ଷା ଯୋଗୁଁ ସ୍କୁଲ ପିଲା, ଅଫିସ୍ କର୍ମଚାରୀ  ଏବଂ ଅନ୍ୟାନ୍ୟ ଯାତ୍ରୀମାନେ ମଧ୍ୟ ଅସୁବିଧାର ସମ୍ମୁଖୀନ ହେଉଛନ୍ତି । ଏହାରି ମଧ୍ୟରେ ପାଣିପାଗ ବିଭାଗ ଚମ୍ବା, ଶିମଲା, କୁଲୁ, ମାଣ୍ଡି ଏବଂ ସିରମୌର ଜିଲ୍ଲାରେ ବର୍ଷା ଏବଂ ବଜ୍ରପାତ ପାଇଁ ୟେଲୋ ୱାର୍ଣ୍ଣିଂ ଜାରି କରିଛି । ଦିଲ୍ଲୀ, ହରିୟାଣା, ପଞ୍ଜାବ, ଉତ୍ତରପ୍ରଦେଶ ଓ ରାଜସ୍ଥାନର କିଛି ଅଞ୍ଚଳରେ ବଜ୍ରପାତ ସହ ୪୦ରୁ ୮୦ କିଲୋମିଟର ବେଗରେ ପବନ ବହିବା ସମ୍ଭାବନା ଥିବାବେଳେ, ଭାରୀ ବର୍ଷା ଯୋଗୁଁ ଜଳବନ୍ଦୀ, ଯାତାୟାତ ବାଧା ଓ ବିଦ୍ୟୁତ୍ ସେବା ବ୍ୟାହତ ହେବାର ଆଶଙ୍କା ରହିଛି। ସମୁଦ୍ର ଅଞ୍ଚଳରେ ମଧ୍ୟ ସତର୍କତା ଜାରି କରାଯାଇଛି। ଆରବ ସାଗର ଓ ବଙ୍ଗୋପସାଗରରେ ଘଣ୍ଟାପ୍ରତି ୪୫ରୁ ୬୫ କିଲୋମିଟର ବେଗରେ ପବନ ବହିବା ସମ୍ଭାବନା ଥିବାରୁ ମତ୍ସ୍ୟଜୀବୀଙ୍କୁ ସମୁଦ୍ରକୁ ନଯିବାକୁ ପରାମର୍ଶ ଦିଆଯାଇଛି। IMD ଲୋକମାନଙ୍କୁ ପାଣିପାଗ ସମ୍ବନ୍ଧୀୟ ସରକାରୀ ସୂଚନା ଉପରେ ନଜର ରଖିବା, ବଜ୍ରପାତ ସମୟରେ ଖୋଲା ସ୍ଥାନରୁ ଦୂରେ ରହିବା ଏବଂ ଅନାବଶ୍ୟକ ଯାତ୍ରାକୁ ଏଡ଼ାଇବାକୁ ପରାମର୍ଶ ଦେଇଛି। ଆଗାମୀ ସାତ ଦିନ ପର୍ଯ୍ୟନ୍ତ ରାଜ୍ୟରେ ବର୍ଷା ଋତୁ ଜାରି ରହିପାରେ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ତେଣୁ ପ୍ରବଳ ବର୍ଷାକୁ ଦୃଷ୍ଟିରେ ରଖି ନଦୀ, ଝରଣା, ଭୂସ୍ଖଳନ ପ୍ରବଣ ଅଞ୍ଚଳ ଏବଂ ପର୍ବତ ଢାଲ ଅଞ୍ଚଳକୁ ପର୍ଯ୍ୟଟକ ଏବଂ ସ୍ଥାନୀୟ ଲୋକଙ୍କୁ ନଯିବାକୁ ପ୍ରଶାସନ ଓ ପାଣିପାଗ ବିଭାଗ ଅନୁରୋଧ କରିଛନ୍ତି ।