ଦେଶର ପ୍ରଥମ ପ୍ରାଇଭେଟ ସୁନା ଖଣି କାର୍ଯ୍ୟକ୍ଷମ: ମାଇନିଂ କ୍ଷେତ୍ରରେ ସ୍ଵର୍ଣ୍ଣିମ ଅଧ୍ୟାୟ

ବିଶାଖାପାଟ୍ଟଣମ : ଦେଶର ଖଣିଜ ଉତ୍ପାଦନ କ୍ଷେତ୍ରରେ ଏକ ଐତିହାସିକ ଦିନ । ସ୍ଵାଧୀନତା ପରେ ପ୍ରଥମ ଥର ପାଇଁ ଭାରତରେ ଆରମ୍ଭ ହୋଇଛି ପ୍ରଥମ ବୃହତ ବେସରକାରୀ ସୁନା ଖଣିର ବାଣିଜ୍ୟିକ କାର୍ଯ୍ୟକ୍ଷମ । ଆନ୍ଧ୍ରପ୍ରଦେଶର କୁର୍ଣ୍ଣୁଲ ଜିଲ୍ଲା ଜନ୍ନଗିରି ଗାଁରେ ଏହି ମେଗା ସୁନା ପ୍ରକଳ୍ପର ଶୁଭାରମ୍ଭ କରିଛନ୍ତି  ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ । ଭାରତୀୟ ଖଣି ଶିଳ୍ପ ଇତିହାସରେ ଯୋଡ଼ି ହୋଇଛି ଏକ ସ୍ଵର୍ଣ୍ଣିମ ଅଧ୍ୟାୟ । ଦେଶ ଭିତରେ ସୁନା ଉତ୍ପାଦନ ବଢ଼ାଇବା ଦିଗରେ ମିଳିଛି ଏକ ବଡ଼ ସଫଳତା । ଆନ୍ଧ୍ରପ୍ରଦେଶର କୁର୍ଣ୍ଣୁଲ ଜିଲ୍ଲା ଜନ୍ନଗିରି ଗ୍ରାମରେ ବିଧିବଦ୍ଧ ଭାବେ କାର୍ଯ୍ୟକ୍ଷମ ହୋଇଛି ଦେଶର ପ୍ରଥମ ବେସରକାରୀ ସୁନା ଖଣି ଗୁରୁବାର ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ଏହି ବହୁ ପ୍ରତୀକ୍ଷିତ ‘ଜନ୍ନଗିରି ଗୋଲ୍ଡ ପ୍ରୋଜେକ୍ଟ’ର ଉଦଘାଟନ କରିଛନ୍ତି । ସ୍ଵାଧୀନତା ପରେ ପ୍ରଥମ ଥର ପାଇଁ କୌଣସି ଘରୋଇ କମ୍ପାନୀ ବୃହତ ମାପରେ କମର୍ସିଆଲ ଗୋଲ୍ଡ ମାଇନିଂ ଆରମ୍ଭ କରିଛି । ଏହି ସୁନା ଖଣି ପ୍ରକଳ୍ପକୁ ‘ଜିଓମୈସୁର ସର୍ଭିସେସ୍ ଇଣ୍ଡିଆ ପ୍ରାଇଭେଟ୍ ଏବଂ ‘ଡେକାନ ଗୋଲ୍ଡ ମାଇନ୍ସ ଲିମିଟେଡ୍’ର ମିଳିତ ସହଭାଗିତାରେ ପ୍ରତିଷ୍ଠା କରାଯାଇଛି । ଏହି ମେଗା ପ୍ରକଳ୍ପ ପାଇଁ ପ୍ରାୟ ୪୦୫ କୋଟି ଟଙ୍କାର ପୁଞ୍ଜିନିବେଶ କରାଯାଇଛି । ଯାହା ଭାରତୀୟ ଅର୍ଥନୀତି ପାଇଁ ଏକ ଶୁଭ ସଙ୍କେତ । ପ୍ରାୟ ୧୫୦୦ ଏକର ପରିମିତ ଅଞ୍ଚଳରେ ବ୍ୟାପିଛି ଏହି ସୁନା ଖଣି ପ୍ରକଳ୍ପ । ବାର୍ଷିକ ପ୍ରାୟ ୪୦୦ କିଲୋଗ୍ରାମ ସୁନା ଉତ୍ପାଦନ  ଲକ୍ଷ୍ୟ ରହିଛି । ମାଇନିଂ ଓ ପ୍ରୋସେସିଂ ବୃଦ୍ଧି ସହ ବାର୍ଷିକ ୯୦୦ ରୁ ୧୦୦୦ କିଲୋଗ୍ରାମ ସୁନା ଉତ୍ପାଦନ କରିବା ଲକ୍ଷ୍ୟ ରହିଛି । ଏହି ପ୍ରକଳ୍ପ ଦ୍ଵାରା କେବଳ ସୁନା ଉତ୍ପାଦନ ହେବ ନାହିଁ, ବରଂ ସ୍ଥାନୀୟ ଅଞ୍ଚଳରେ ଅର୍ଥନୈତିକ ବିକାଶର ଏକ ନୂଆ ଭିତ୍ତିଭୂମି ପଡିବ । ଖଣି ଖନନ, ପ୍ରୋସେସିଂ ଏବଂ ପରିବହନ କ୍ଷେତ୍ରରେ ପ୍ରାୟ ୭୦୦ ରୁ ଅଧିକ ଲୋକଙ୍କ ପାଇଁ ପ୍ରତ୍ୟକ୍ଷ ଓ ପରୋକ୍ଷ ରୋଜଗାରର ସୁଯୋଗ ସୃଷ୍ଟି ହେବ । ଏହା ସହିତ ପ୍ରଚଳିତ ନିୟମ ଅନୁଯାୟୀ, ଉତ୍ପାଦିତ ସୁନାର ମୂଲ୍ୟ ଆଧାରରେ ଆନ୍ଧ୍ରପ୍ରଦେଶ ସରକାରଙ୍କୁ ୪ ପ୍ରତିଶତ ରୟାଲଟି ମିଳିବ, ଯାହା ଆଗାମୀ ଦିନରେ ରାଜ୍ୟ ରାଜକୋଷ ସମୃଦ୍ଧ କରିବ । ଭାରତ ବାର୍ଷିକ ବହୁ ପରିମାଣର ସୁନା ବାହାର ଦେଶରୁ ଆମଦାନୀ କରିଥାଏ । ଏଭଳି ସ୍ଥିତିରେ ଆନ୍ଧ୍ରପ୍ରଦେଶର ଏହି ପ୍ରଥମ ଘରୋଇ ସୁନା ଖଣି କାର୍ଯ୍ୟକ୍ଷମ ହେବା ଫଳରେ ଦେଶର ନିଜସ୍ଵ ଉତ୍ପାଦନ ବଢ଼ିବ ।  ଆମଦାନୀ ଉପରେ ନିର୍ଭରଶୀଳତା କିଛି ମାତ୍ରାରେ ହ୍ରାସ ପାଇପାରେ ।