ରାମ ମନ୍ଦିର ଦାନ ଅର୍ଥ ହେରଫେର ମାମଲା: SIT ରିପୋର୍ଟ ପରେ ଚମ୍ପତ ରାୟ ଓ ଅନିଲ ମିଶ୍ରଙ୍କ ଇସ୍ତଫା

ଅଯୋଧ୍ୟା: ଅଯୋଧ୍ୟା ରାମ ମନ୍ଦିର ଦାନ ଅର୍ଥ ହେରଫେର ମାମଲାରେ ବଡ଼ ଖବର। ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଟ୍ରଷ୍ଟକୁ ନେଇ ଏକାଧିକ ଅଭିଯୋଗ ଭିତରେ ଟ୍ରଷ୍ଟର ସାଧାରଣ ସମ୍ପାଦକ ଚମ୍ପତ ରାୟ ନିଜ ପଦରୁ ଇସ୍ତଫା ଦେଇଛନ୍ତି। ଚମ୍ପତ ରାୟ ଓ ଅନିଲ ମିଶ୍ରଙ୍କ ସହ ଅନ୍ୟତମ ପ୍ରମୁଖ ସଦସ୍ୟ ତଥା ଟ୍ରଷ୍ଟି ଅନିଲ ମିଶ୍ର ମଧ୍ୟ ଇସ୍ତଫା ଦେଇଛନ୍ତି । ଶ୍ରୀରାମ ଜନ୍ମଭୂମି ତୀର୍ଥ କ୍ଷେତ୍ର ଦାନ ବାକ୍ସରୁ କୋଟି କୋଟି ଟଙ୍କା ଚୋରି ଅଭିଯୋଗରେ ଏସଆଇଟି ରିପୋର୍ଟ ଆସିବା ପରେ ନୈତିକତା ଦୃଷ୍ଟିରୁ ଉଭୟ ନିଜ ନିଜ ପଦରୁ ଇସ୍ତଫା ଦେଇଥିବା ସୂଚନା ମିଳିଛି। ଏହି ଘଟଣାକୁ ନେଇ ଏବେ ୟୁପି ସମେତ ସମଗ୍ର ଦେଶର ରାଜନୀତି ସରଗରମ ହୋଇଛି। ଅଭିଯୋଗ ଅନୁସାରେ ମନ୍ଦିରର ଦାନ ବାକ୍ସରୁ ପ୍ରାୟ ସାଢ଼େ ୭ କୋଟି ଟଙ୍କାର ଚୋରି ଓ ହେରଫେର ଅଭିଯୋଗ ଆସିବା ପରେ, ସରକାରଙ୍କ ପକ୍ଷରୁ ଗଠିତ ଏସଆଇଟି  ଏହାର ପ୍ରାଥମିକ ରିପୋର୍ଟ ଦାଖଲ କରିଥିଲା। ରିପୋର୍ଟ ଆଧାରରେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କଡ଼ା ଆଭିମୁଖ୍ୟ ଗ୍ରହଣ କରିବା ପରେ ଉଭୟ ନୈତିକତା ଦୃଷ୍ଟିରୁ ନିଜ ପଦ ଛାଡ଼ିଛନ୍ତି। ମିଳିଥିବା ସୂଚନା ମୁତାବକ, ରାମ ମନ୍ଦିରରେ ଟଙ୍କା ଗଣତି କରୁଥିବା ୧୪ ଜଣିଆ ଟିମ ମଧ୍ୟରୁ ୮ ଜଣ କର୍ମଚାରୀ ସିସିଟିଭି କ୍ୟାମେରାରେ ଟଙ୍କା ଗାଏବ କରୁଥିବା ବେଳେ ଧରାପଡ଼ିଥିଲେ। ଏହି ମାମଲାରେ ବ୍ୟାଙ୍କ କର୍ମଚାରୀ ଓ ମନ୍ଦିରର ସେବକଙ୍କ ସମେତ ୮ ଜଣଙ୍କୁ ଗତକାଲି ହିଁ ଗିରଫ କରିଛି ଅଯୋଧ୍ୟା ପୋଲିସ । ସେମାନଙ୍କ ବିରୋଧରେ ଅପରାଧିକ ଷଡ଼ଯନ୍ତ୍ର ଓ ବିଶ୍ୱାସଘାତକତା ଭଳି ସଙ୍ଗୀନ ଦଫା ଲଗାଯାଇଛି। ଅନ୍ୟପଟେ ଏହି ଘଟଣାକୁ ନେଇ ବିରୋଧୀ ଦଳ ଗୁଡ଼ିକ ଯୋଗୀ ସରକାର ଏବଂ ଟ୍ରଷ୍ଟକୁ ଘେରିବା ଆରମ୍ଭ କରିଛନ୍ତି। ସମାଜବାଦୀ ପାର୍ଟିର ସାଂସଦ ରାମଜୀ ଲାଲ ସୁମନ ଅଭିଯୋଗ କରିଛନ୍ତି ଯେ, କେବଳ ତଳସ୍ତରର କର୍ମଚାରୀଙ୍କ ବିରୋଧରେ ମାମଲା ରୁଜୁ କରି ଉପରସ୍ତରର ପ୍ରଭାବଶାଳୀ ଲୋକଙ୍କୁ ସୁରକ୍ଷା ଦିଆଯାଉଛି। କେବଳ ‘ନୈତିକତାଆଧାରରେ ଇସ୍ତଫା ଯଥେଷ୍ଟ ନୁହେଁ, ବରଂ ଟ୍ରଷ୍ଟର ବରିଷ୍ଠ କର୍ମକର୍ତ୍ତାଙ୍କ ଭୂମିକାର ମଧ୍ୟ ନିରପେକ୍ଷ ତଦନ୍ତ ହେବା ଦରକାର ବୋଲି ସେ ଦାବି କରିଛନ୍ତି। ମନ୍ଦିରର ଦାନ ଅର୍ଥ ହେରଫେରକୁ ନେଇ କିଛି ଦିନ ହେବ ଉତ୍ତରପ୍ରଦେଶ ରାଜନୀତି ସରଗରମ ରହିଛି । ପୂର୍ବତନ ସମାଜବାଦୀ ପାର୍ଟି ବିଧାୟକ ପବନ ପାଣ୍ଡେ ପ୍ରାୟ ୭ ରୁ ୭.୫ କୋଟି ଟଙ୍କାର ହେରଫେର ହୋଇଥିବା ଅଭିଯୋଗ ଆଣିଥିଲେ। ଏହାସହ ଅଯୋଧ୍ୟା ନିବାସୀ ମଧ୍ୟ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ଚିଠି ଲେଖି ଦାନ ଅର୍ଥ ହେରଫେର ଅଭିଯୋଗ ଆଣି ତଦନ୍ତ କରିବାକୁ ଦାବି କରିଥିଲେ  । ଘଟଣାର ସମ୍ବେଦନଶୀଲତାକୁ ଦେଖି ୟୁପି ସରକାର ଜୁନ ୧୪ରେ ୩ ଜଣିଆ ସ୍ପେଶାଲ ଇନଭେଷ୍ଟିଗେସନ ଟିମ୍ ବା SIT ଗଠନ କରିଥିଲେ। ଗତ ମଙ୍ଗଳବାର ଦିନ ଏସଆଇଟି ନିଜର ପ୍ରାଥମିକ ରିପୋର୍ଟ ସରକାରଙ୍କୁ ହସ୍ତାନ୍ତର କରିଥିଲା। ଯେଉଁଥିରେ ଦାନ ଅର୍ଥ ଗଣତି ଓ ରକ୍ଷଣାବେକ୍ଷଣରେ ବ୍ୟାପକ ଅନିୟମିତତା ହୋଇଥିବା ଦର୍ଶାଯାଇଥିଲା। ଗୁରୁବାର ଦିନ ପୋଲିସ ଏହି ମାମଲାରେ ୮ ଜଣଙ୍କୁ ଗିରଫ କରିଛି। ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରେ ଚମ୍ପତ ରାୟଙ୍କ ପୂର୍ବତନ ଡ୍ରାଇଭର ତିନ୍ନୁ ଯାଦବ ମଧ୍ୟ ସାମିଲ ଅଛି। ଜାନୁଆରୀ ୨୦୨୪ରେ ଉଦଘାଟନ ହେବା ପରଠାରୁ ରାମ ମନ୍ଦିରକୁ ପ୍ରତିଦିନ ହଜାର ହଜାର ଭକ୍ତ ଆସୁଛନ୍ତି। ବିପୁଳ ପରିମାଣର ଦାନ ରାମଲାଲାଙ୍କୁ ସମର୍ପଣ କରୁଛନ୍ତି ଭକ୍ତ । ଗତ ଆର୍ଥିକ ବର୍ଷରେ ହିଁ ଟ୍ରଷ୍ଟ ପାଖାପାଖି ୩୨୭ କୋଟି ଟଙ୍କାର ଆୟ କରିଥିଲା। ଏଭଳି ପରିସ୍ଥିତିରେ ଏତେ ବଡ଼ ଦାନ ଅର୍ଥ ହେରଫେର ମାମଲା ସାମ୍ନାକୁ ଆସିବା ରାମଭକ୍ତଙ୍କ ସମେତ ପୁରା ହିନ୍ଦୁ ସମାଜରେ ଆଲୋଡନ ସୃଷ୍ଟି ହୋଇଛି । ଦାନ ଅର୍ଥ ଲୁଟ ଘଟଣାକୁ ସହଜରେ ଗ୍ରହଣ କରିପାରିନାହାଁନ୍ତି ରାମଭକ୍ତ ।