ଆସାମ ଜୋରହାଟ୍ ଏୟାରବେସରେ IAFର AN-32 ବିମାନ ଦୁର୍ଘଟଣାଗ୍ରସ୍ତ: ୨ ଅଗ୍ନିବୀରଙ୍କ ସହ ୫ ଯବାନ ସହିଦ

ଜୋରହାଟ: ଆସାମ ଜୋରହାଟ୍ ଏୟାରବେସରେ ଭାରତୀୟ ବାୟୁସେନାର AN-32 ବିମାନ ଦୁର୍ଘଟଣାଗ୍ରସ୍ତ l ୨ ଜଣ ଅଗ୍ନିବୀରଙ୍କ ସହ ୫ ଜଣ ଯବାନ ସହିଦ। ଏନେଇ ଭାରତୀୟ ବାୟୁସେନା ପକ୍ଷରୁ ସୂଚନା ଦିଆଯାଇଛି। ଏହାସହ ଦୁର୍ଘଟଣାର କାରଣ ଜାଣିବା ପାଇଁ 'କୋର୍ଟ ଅଫ୍ ଇନକ୍ୱାରୀ' (ତଦନ୍ତ କମିଟି) ଗଠନ କରିବାକୁ ନିର୍ଦ୍ଦେଶ ଦିଆଯାଇଛି। ଦୁର୍ଘଟଣା କେମିତି ହେଲା?:  ବାୟୁସେନାର ୪୩ ସ୍କ୍ୱାଡ୍ରନ୍‌ର ଏହି AN-32 ବିମାନଟି ମାଲ ପରିବହନ (Cargo) କରୁଥିଲା । ଜୋରହାଟ ରୋରିଆ ଅଞ୍ଚଳରେ ଥିବା ବାୟୁସେନା ଏୟାରବେସରେ ଅବତରଣ  କରୁଥିବା ସମୟରେ ଏହି ଦୁର୍ଘଟଣା ଘଟିଥିଲା। ଘଟଣା ସ୍ଥଳରେ ତୁରନ୍ତ ଦମକଳ ବାହିନୀ ସହ ଜରୁରୀକାଳୀନ ଉଦ୍ଧାରକାରୀ ଦଳ ନିୟୋଜିତ ହୋଇଥିଲେ। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଏକ ଜୋରଦାର ବିସ୍ଫୋରଣ ଶବ୍ଦ ଶୁଣାଯାଇଥିଲା ଏବଂ ସମ୍ପୂର୍ଣ୍ଣ ଅଞ୍ଚଳ ଧୂଆଁମୟ ହୋଇଯାଇଥିଲା । IAF ଯବାନ ସହିଦ: ଦୁର୍ଘଟଣାକୁ ନେଇ ଭାରତୀୟ ବାୟୁସେନା ସୋସିଆଲ ମିଡିଆ ପ୍ଲାଟଫର୍ମ 'X' ରେ ଗଭୀର ଦୁଃଖ ପ୍ରକାଶ କରି ସହିଦ ହୋଇଥିବା ୫ ଜଣ ବୀର ଯବାନଙ୍କ ନାମ ପ୍ରକାଶ କରିଛି।

ସହିଦ ଯବାନ ହେଲେ:

୧. ସ୍କ୍ୱାଡ୍ରନ ଲିଡର ପ୍ରଶାନ୍ତ ସିଂ

୨. ଫ୍ଲାଇଟ୍ ଲେଫ୍ଟନାଣ୍ଟ ଶୁଭମ କୁମାର

୩. ସର୍ଜେଣ୍ଟ ଜିତେନ୍ଦ୍ର ଶର୍ମା

୪. ଅଗ୍ନିବୀର ବାୟୁ ଖେମାରାମ କୁମାବତ

୫. ଅଗ୍ନିବୀର ବାୟୁ ଦାନିଶ ଆଲମ 

ବାୟୁସେନା ଶୋକସନ୍ତପ୍ତ ପରିବାରବର୍ଗଙ୍କ ପ୍ରତି ଗଭୀର ସମବେଦନା ଜଣାଇବା ସହ ଏହି ଦୁଃଖଦ ସମୟରେ ସେମାନଙ୍କ ସହ ଦୃଢ଼ ଭାବରେ ଠିଆ ହୋଇଥିବା ବୋଲି କହିଛି।

ଅତୀତରେ ଘଟିଥିବା ଘଟଣା: କିଛି ମାସ ପୂର୍ବରୁ ଆସାମର କାର୍ବି ଆଙ୍ଗଲଙ୍ଗ ଜିଲ୍ଲାରେ ବାୟୁସେନାର ଏକ ସୁଖୋଇ (Sukhoi Su-30MKI) ଯୁଦ୍ଧବିମାନ ଦୁର୍ଘଟଣାଗ୍ରସ୍ତ ହୋଇଥିଲା, ଯେଉଁଥିରେ ଦୁଇଜଣ ପାଇଲଟଙ୍କ ମୃତ୍ୟୁ ହୋଇଥିଲା। ସେହି ବିମାନଟି ମଧ୍ୟ ଜୋରହାଟ୍ ଏୟାରଫୋର୍ସ ଷ୍ଟେସନରୁ ଉଡ଼ାଣ ଭରିବା ପରେ କଣ୍ଟ୍ରୋଲ ରୁମ ସହ ସମ୍ପର୍କ ବିଚ୍ଛିନ୍ନ ହୋଇଥିଲା।

AN-32 ବିମାନ କଣ?:  ଆଣ୍ଟୋନୋଭ AN-32 (Antonov AN-32) ହେଉଛି ଦୁଇଟି ଇଞ୍ଜିନ ବିଶିଷ୍ଟ ଏକ ମିଲିଟାରୀ ପରିବହନ ବିମାନ, ଯାହା ଦୀର୍ଘ ଦିନ ଧରି ଭାରତୀୟ ବାୟୁସେନାର ଏକ ପ୍ରମୁଖ ଅଂଶ ହୋଇ ରହିଛି। ଏହା ଋଷ ଦ୍ୱାରା ଭାରତର ଆବଶ୍ୟକତା ଅନୁଯାୟୀ ପ୍ରସ୍ତୁତ କରାଯାଇଥିଲା l ଯାହା ପ୍ରତିକୂଳ ପରିବେଶ ଏବଂ ପାର୍ବତ୍ୟାଞ୍ଚଳରେ ସହଜରେ ଉଡ଼ାଣ କରିପାରିବ।  ଏହି ବିମାନ ପ୍ରାୟ ୭.୫ ଟନ୍ ମାଲ୍, କିମ୍ବା ୫୦ ଜଣ ଯାତ୍ରୀ ତଥା ୪୨ ଜଣ ପାରାଟ୍ରୁପରଙ୍କୁ ନେବା ଆଣିବା କ୍ଷମତା ରଖିଥାଏ। ଦୁର୍ଗମ ଅଞ୍ଚଳକୁ ସୈନ୍ୟ ଏବଂ ରାସନ ସାମଗ୍ରୀ ପଠାଇବା ପାଇଁ ଏହା ବହୁଳ ଭାବରେ ବ୍ୟବହୃତ ହୁଏ।