Hegseth Impeachment:ବର୍ତ୍ତିଗଲେ ପିଟ୍- ଟ୍ରମ୍ପ ସରକାର ଆଶ୍ୱସ୍ତ

ୱାଶିଂଟନ: ଆମେରିକାର ପ୍ରତିରକ୍ଷା ସଚିବ ପିଟ୍ ହେଗସେଥ୍‌ଙ୍କ ବିରୋଧରେ ମହାଭିଯୋଗ ପ୍ରସ୍ତାବକୁ ନେଇ ଆମେରିକା ରାଜନୀତିରେ ହଟଚମଟ। ଇରାନ ବିରୋଧରେ ଆମେରିକାର ସାମରିକ ଅଭିଯାନ, ସାଧାରଣ ନାଗରିକଙ୍କ ମୃତ୍ୟୁ ଏବଂ କଂଗ୍ରେସର ଅନୁମତି ବିନା ସାମରିକ କାର୍ଯ୍ୟାନୁଷ୍ଠାନ ଭଳି ଅଭିଯୋଗକୁ ନେଇ ହେଗସେଥ୍‌ଙ୍କୁ ଘେରିଛନ୍ତି ତାଙ୍କ ନିଜ ଦଳର ଜଣେ ସାଂସଦ। ତେବେ  ଆମେରିକାର ହାଉସ୍ ଅଫ୍ ରିପ୍ରେଜେଣ୍ଟେଟିଭ୍‌ରେ ହୋଇଥିବା ଭୋଟିଂରେ ମହାଭିଯୋଗ ପ୍ରସ୍ତାବକୁ ଆଗକୁ ବଢ଼ାଇବା ଉଦ୍ୟମ ଅଟକି ଯାଇଛି। ଫଳରେ ଏବେ ପାଇଁ ନିଜ ପଦ ବଜାୟ ରଖିଛନ୍ତି ହେଗସେଥ୍।

କିଏ ଏହି ପିଟ୍ ହେଗସେଥ୍?

ପିଟ୍ ହେଗସେଥ୍- ପଦବୀ: ଆମେରିକାର ପ୍ରତିରକ୍ଷା ସଚିବ। ପୂର୍ବ ପରିଚୟ: ଆମେରିକା ସେନାର ନ୍ୟାସନାଲ ଗାର୍ଡରେ କାର୍ଯ୍ୟ କରିଥିଲେ। ପୂର୍ବରୁ ଟେଲିଭିଜନ୍‌ରେ ସମ୍ୱାଦ ଉପସ୍ଥାପକ ଓ ରାଜନୈତିକ ମନ୍ତବ୍ୟକାର ଥିଲେ। ଜାନୁଆରୀ ୨୦୨୫ରେ ଡୋନାଲ୍ଡ ଟ୍ରମ୍ପଙ୍କ ଦ୍ୱିତୀୟ ପ୍ରଶାସନରେ ପ୍ରତିରକ୍ଷା ସଚିବ ଭାବେ ଦାୟିତ୍ୱ ନେଇଥିଲେ ହେଗସେଥ୍। ଟ୍ରମ୍ପଙ୍କ ସାମରିକ ଏବଂ ଜାତୀୟ ସୁରକ୍ଷା ନୀତିର ସେ ଜଣେ ପ୍ରମୁଖ ସମର୍ଥକ।

କାହିଁକି ହେଗସେଥ୍‌ଙ୍କ ବିରୋଧରେ ମହାଭିଯୋଗ ଦାବି?

ଆମେରିକାର ରିପବ୍ଲିକାନ୍ ସାଂସଦ ଥୋମାସ୍ ମାସି ହେଗସେଥ୍‌ଙ୍କ ବିରୋଧରେ ମହାଭିଯୋଗ ପ୍ରସ୍ତାବ ଆଣିଥିଲେ। ଏଥିରେ ମୋଟ ୮ଟି ମହାଭିଯୋଗ ସମ୍ପର୍କିତ ଅଭିଯୋଗ ବା ଆର୍ଟିକିଲ୍ ରହିଛି। ମାସିଙ୍କ ଅଭିଯୋଗ ଅନୁସାରେ ହେଗସେଥ୍ ଆମେରିକାର ସମ୍ବିଧାନ ଏବଂ ସଂଘୀୟ ଆଇନର ଉଲ୍ଲଂଘନ କରିଛନ୍ତି।

୧. କଂଗ୍ରେସର ଅନୁମତି ବିନା ଇରାନ ବିରୋଧରେ ଯୁଦ୍ଧ

ହେଗସେଥ୍‌ଙ୍କ ଉପରେ ଅଭିଯୋଗ ଯେ, ଇରାନ ବିରୋଧରେ ଆମେରିକାର ସାମରିକ ଅଭିଯାନ ଆରମ୍ଭ କରିବା ପୂର୍ବରୁ କଂଗ୍ରେସର ଆବଶ୍ୟକୀୟ ଅନୁମତି ନିଆଯାଇନଥିଲା। ମାସିଙ୍କ ମତରେ ଆମେରିକାର ସମ୍ବିଧାନ ଅନୁସାରେ ଯୁଦ୍ଧ ଘୋଷଣା ଏବଂ ସାମରିକ କାର୍ଯ୍ୟାନୁଷ୍ଠାନ ଉପରେ କଂଗ୍ରେସର ଗୁରୁତ୍ୱପୂର୍ଣ୍ଣ କ୍ଷମତା ରହିଛି।

୨. ଇରାନରେ ସାଧାରଣ ନାଗରିକଙ୍କ ମୃତ୍ୟୁ

ଇରାନର ଏକ ପ୍ରାଥମିକ ବିଦ୍ୟାଳୟ ଉପରେ ଆମେରିକାର ସାମରିକ ଆକ୍ରମଣକୁ ନେଇ ମଧ୍ୟ ପ୍ରଶ୍ନ ଉଠିଛି। ଏହି ଆକ୍ରମଣରେ ୨୦୦ରୁ ଅଧିକ ଲୋକ ମୃତାହତ ହୋଇଥିବା ଅଭିଯୋଗ ରହିଛି। ସାଧାରଣ ନାଗରିକଙ୍କ ସୁରକ୍ଷା ପାଇଁ ଥିବା ଆଇନକୁ ପାଳନ କରାଯାଇନଥିବା ମାସି ଅଭିଯୋଗ କରିଛନ୍ତି।

୩. ୟେମେନ୍‌ରେ ସାମରିକ ଅଭିଯାନ

ୟେମେନ୍‌ର ହୁତି ବିଦ୍ରୋହୀଙ୍କ ବିରୋଧରେ ଆମେରିକାର ସାମରିକ ଆକ୍ରମଣକୁ ନେଇ ମଧ୍ୟ ଆପତ୍ତି ଉଠିଛି। ଏହି ଅଭିଯାନର ଆଇନଗତ ବୈଧତା ଉପରେ ପ୍ରଶ୍ନ ଉଠାଇଛନ୍ତି ମାସି।

୪. ଭେନେଜୁଏଲାରେ ସାମରିକ କାର୍ଯ୍ୟାନୁଷ୍ଠାନ

ଭେନେଜୁଏଲାର ରାଷ୍ଟ୍ରପତି ନିକୋଲାସ୍ ମାଦୁରୋଙ୍କୁ ଧରିବା ପାଇଁ ଆମେରିକା କରିଥିବା ସାମରିକ ଅଭିଯାନକୁ ନେଇ ମଧ୍ୟ ପ୍ରଶ୍ନ ଉଠିଛି। ଏହି ଅଭିଯାନ ଆମେରିକାର ସାମରିକ ଶକ୍ତି ପ୍ରୟୋଗ ସମ୍ପର୍କିତ ଆଇନକୁ ଉଲ୍ଲଂଘନ କରିଥିବା ମାସିଙ୍କ ଅଭିଯୋଗ।

୫. ଡ୍ରଗ୍ସ ଚାଲାଣ ସନ୍ଦେହରେ ଡଙ୍ଗା ଉପରେ ଆକ୍ରମଣ

କାରିବିଆନ୍ ଏବଂ ପ୍ରଶାନ୍ତ ମହାସାଗରରେ ଡ୍ରଗ୍ସ ଚାଲାଣ ସନ୍ଦେହରେ କିଛି ଡଙ୍ଗା ଉପରେ ଆମେରିକାର ସାମରିକ ଆକ୍ରମଣକୁ ନେଇ ମଧ୍ୟ ବିବାଦ ଦେଖାଦେଇଛି। ଏହି ଆକ୍ରମଣରେ ଆଇନଗତ ପ୍ରକ୍ରିୟା ପାଳନ ହୋଇଛି କି ନାହିଁ, ତାହା ଉପରେ ପ୍ରଶ୍ନ ଉଠିଛି।

୬. ସାଂସଦ ମାର୍କ କେଲିଙ୍କ ବିରୋଧରେ ପ୍ରତିଶୋଧ ଅଭିଯୋଗ

ଆମେରିକାର ଡେମୋକ୍ରାଟିକ୍ ସାଂସଦ ତଥା ଅବସରପ୍ରାପ୍ତ ନୌସେନା ଅଧିକାରୀ ମାର୍କ କେଲିଙ୍କ ବିରୋଧରେ ହେଗସେଥ୍ ପ୍ରତିଶୋଧମୂଳକ ପଦକ୍ଷେପ ନେଇଥିବା ଅଭିଯୋଗ ହୋଇଛି। ସାମରିକ କର୍ମଚାରୀମାନେ ଅବୈଧ ଆଦେଶକୁ ମାନିବା ଉଚିତ ନୁହେଁ ବୋଲି କେଲି ଓ ଅନ୍ୟ କିଛି ସାଂସଦ ଏକ ଭିଡିଓରେ କହିଥିଲେ। ଏହାପରେ ହେଗସେଥ୍ ତାଙ୍କ ବିରୋଧରେ ପଦକ୍ଷେପ ନେଇଥିବା ଅଭିଯୋଗ ରହିଛି।

ଆମେରିକା କଂଗ୍ରେସରେ କ'ଣ ହେଲା?

ହେଗସେଥ୍‌ଙ୍କ ବିରୋଧରେ ଆସିଥିବା ମହାଭିଯୋଗ ପ୍ରସ୍ତାବକୁ ହାଉସ୍ ଜୁଡିସିଆରି କମିଟିକୁ ପଠାଇବା ପାଇଁ ଭୋଟିଂ ହୋଇଥିଲା।

ଭୋଟିଂ ବିବରଣୀ

ସଂଖ୍ୟା

ପ୍ରସ୍ତାବକୁ କମିଟିକୁ ପଠାଇବା ସପକ୍ଷରେ

୨୧୧

ବିପକ୍ଷରେ

୨୦୪

ଭୋଟ୍ ବ୍ୟବଧାନ

୭

ଏହି ଭୋଟିଂରେ ରିପବ୍ଲିକାନ୍ ନେତୃତ୍ୱ ହେଗସେଥ୍‌ଙ୍କୁ ସମର୍ଥନ କରିଥିଲା। ଥୋମାସ୍ ମାସି ନିଜ ଦଳର ନେତୃତ୍ୱର ଆଭିମୁଖ୍ୟର ବିରୋଧ କରିଥିଲେ। ଏହି ପ୍ରକ୍ରିୟା ଯୋଗୁଁ ମହାଭିଯୋଗ ପ୍ରସ୍ତାବ ଉପରେ ସିଧାସଳଖ ନିଷ୍ପତ୍ତି ହୋଇପାରିନଥିଲା।

 ଡୋନାଲ୍ଡ ଟ୍ରମ୍ପଙ୍କ ପ୍ରତିକ୍ରିୟା କ'ଣ?

ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ହେଗସେଥ୍‌ଙ୍କ ସମର୍ଥନରେ ଆଗକୁ ଆସିଥିଲେ। ଟ୍ରମ୍ପ ହେଗସେଥ୍‌ଙ୍କ କାର୍ଯ୍ୟକୁ ସମର୍ଥନ କରିବା ସହ ଥୋମାସ୍ ମାସିଙ୍କ ମହାଭିଯୋଗ ଉଦ୍ୟମକୁ ସମାଲୋଚନା କରିଥିଲେ। ଆମେରିକା ଉପରାଷ୍ଟ୍ରପତି ଜେଡି ଭାନ୍ସ ମଧ୍ୟ ହେଗସେଥ୍‌ଙ୍କ ପକ୍ଷ ନେଇଥିଲେ। ତାଙ୍କ ବିରୋଧରେ ଆସିଥିବା ଅଭିଯୋଗକୁ ସେ ଅଯୌକ୍ତିକ ବୋଲି କହିଥିଲେ।

ହେଗସେଥ୍ କ'ଣ କହିଛନ୍ତି?

ହେଗସେଥ୍ ନିଜ ବିରୋଧରେ ଆସିଥିବା ସମସ୍ତ ଅଭିଯୋଗକୁ ଖାରଜ କରିଛନ୍ତି। ତାଙ୍କ କହିବା ଅନୁସାରେ, ଏହି ମହାଭିଯୋଗ ଉଦ୍ୟମ ରାଜନୈତିକ ଉଦ୍ଦେଶ୍ୟରେ କରାଯାଇଛି। ଏହାର ପଛରେ ପ୍ରକୃତ ଆଇନଗତ ଆଧାର ନାହିଁ ବୋଲି ସେ ଯୁକ୍ତି ରଖିଛନ୍ତି। ସେ ଆମେରିକାର ସାମରିକ ଅଭିଯାନ ଏବଂ ସେନାର କାର୍ଯ୍ୟକୁ ସମର୍ଥନ କରିଛନ୍ତି।

ଆମେରିକାରେ ମହାଭିଯୋଗ ପ୍ରକ୍ରିୟା କିପରି ହୋଇଥାଏ?

ଆମେରିକାର ସମ୍ବିଧାନ ଅନୁସାରେ ରାଷ୍ଟ୍ରପତିଙ୍କ ସମେତ ଅନ୍ୟ ସଂଘୀୟ ସରକାରୀ ଅଧିକାରୀ ଓ କ୍ୟାବିନେଟ୍ ମନ୍ତ୍ରୀଙ୍କ ବିରୋଧରେ ମହାଭିଯୋଗ ଆସିପାରିବ।

ମହାଭିଯୋଗର ୩ଟି ପର୍ଯ୍ୟାୟ

1.   ପ୍ରଥମ ପର୍ଯ୍ୟାୟ – ହାଉସ୍ ଅଫ୍ ରିପ୍ରେଜେଣ୍ଟେଟିଭ୍

ଏଠାରେ ସାଧାରଣ ସଂଖ୍ୟାଗରିଷ୍ଠତାରେ ମହାଭିଯୋଗ ପ୍ରସ୍ତାବ ପାରିତ ହେଲେ ଅଧିକାରୀଙ୍କୁ ଆନୁଷ୍ଠାନିକ ଭାବେ ଇମ୍ପିଚ୍ କରାଯାଏ। କିନ୍ତୁ ତୁରନ୍ତ ପଦରୁ ହଟାଯାଏ ନାହିଁ।

2.   ଦ୍ୱିତୀୟ ପର୍ଯ୍ୟାୟ – ସିନେଟ୍‌ରେ ବିଚାର

ସିନେଟ୍‌ରେ ଅଭିଯୋଗ ଉପରେ ବିଚାର ହୁଏ। ଉପସ୍ଥିତ ସଦସ୍ୟଙ୍କ ଦୁଇ-ତୃତୀୟାଂଶ ସମର୍ଥନ ଆବଶ୍ୟକ।

3.   ତୃତୀୟ ପର୍ଯ୍ୟାୟ – ପଦରୁ ବହିଷ୍କାର

ସିନେଟ୍‌ରେ ଦୋଷୀ ସାବ୍ୟସ୍ତ ହେଲେ ସମ୍ପୃକ୍ତ ଅଧିକାରୀଙ୍କୁ ପଦରୁ ହଟାଯାଏ।

ଅର୍ଥାତ୍ ହାଉସ୍‌ରେ ମହାଭିଯୋଗ ପ୍ରସ୍ତାବ ପାରିତ ହେବା ଏବଂ ସିନେଟ୍‌ରେ ଦୋଷୀ ସାବ୍ୟସ୍ତ ହେବା ଦୁଇଟି ଭିନ୍ନ ପ୍ରକ୍ରିୟା।

ତେବେ ଏହି ବିବାଦ ଏତିକିରେ ଶେଷ ହେବାର ସମ୍ଭାବନା ନାହିଁ। ଡେମୋକ୍ରାଟ୍ ସାଂସଦମାନେ ପେଣ୍ଟାଗନ୍‌ର କାର୍ଯ୍ୟକଳାପ ଉପରେ ତଦନ୍ତ ଦାବି କରିପାରନ୍ତି। ଆଗାମୀ କଂଗ୍ରେସରେ ପୁଣି ମହାଭିଯୋଗ ପ୍ରସ୍ତାବ ଆସିପାରେ। ଇରାନ ଏବଂ ଅନ୍ୟ ଦେଶରେ ଆମେରିକାର ସାମରିକ କାର୍ଯ୍ୟକୁ ନେଇ ବିତର୍କ ଜାରି ରହିପାରେ।

କାହିଁକି ଏହି ଘଟଣା ଗୁରୁତ୍ୱପୂର୍ଣ୍ଣ?

ଏହି ମହାଭିଯୋଗ ବିବାଦ କେବଳ ଜଣେ ପ୍ରତିରକ୍ଷା ସଚିବଙ୍କ ପଦବୀକୁ ନେଇ ନୁହେଁ। ଏହା ଆମେରିକାର ଗଣତାନ୍ତ୍ରିକ ବ୍ୟବସ୍ଥା, ସମ୍ବିଧାନ ଏବଂ ସାମରିକ କ୍ଷମତାକୁ ନେଇ ମଧ୍ୟ ଏକ ବଡ଼ ପ୍ରଶ୍ନ ସୃଷ୍ଟି କରିଛି। ପ୍ରଥମ ପ୍ରଶ୍ନ: ଆମେରିକା ରାଷ୍ଟ୍ରପତି କଂଗ୍ରେସର ଅନୁମତି ବିନା କେତେଦୂର ସାମରିକ ଶକ୍ତି ପ୍ରୟୋଗ କରିପାରିବେ? ଦ୍ୱିତୀୟ ପ୍ରଶ୍ନ: ଦେଶର ପ୍ରତିରକ୍ଷା ସଚିବଙ୍କ ସାମରିକ ନିଷ୍ପତ୍ତି ପାଇଁ କଂଗ୍ରେସ କେତେଦୂର ଉତ୍ତରଦାୟିତ୍ୱ ନିର୍ଦ୍ଧାରଣ କରିପାରିବ? ତୃତୀୟ ପ୍ରଶ୍ନ: ଯୁଦ୍ଧ ସମୟରେ ସାଧାରଣ ନାଗରିକଙ୍କ ସୁରକ୍ଷା ଏବଂ ଅନ୍ତର୍ଜାତୀୟ ଆଇନ ପାଳନ କରିବାର ଦାୟିତ୍ୱ କାହାର?