ମିଥୁନ @୭୬ । ଶୁଭେଚ୍ଛା ଜଣାଇଲେ ଅସଂଖ୍ୟ ଫ୍ୟାନ୍ସ।

ଭାରତୀୟ ସିନେମାର ଇତିହାସରେ କିଛି ନାମ ଏପରି ରହିଛି, ଯେଉଁମାନେ କେବଳ ଅଭିନେତା ନୁହଁନ୍ତି ବରଂ ଏକ ଯୁଗର ପରିଚୟ। ସେହିଭଳି ଏକ ନାମ ହେଉଛି ମିଥୁନ ଚକ୍ରବର୍ତ୍ତୀ। ଭାରତୀୟ ସିନେମାର “ଡିସ୍କୋ କିଙ୍ଗ”, ଲକ୍ଷ ଲକ୍ଷ ଦର୍ଶକଙ୍କ ହୃଦୟର ନାୟକ ଏବଂ ଚାରି ଦଶନ୍ଧିରୁ ଅଧିକ ସମୟ ଧରି ଚଳଚ୍ଚିତ୍ର ଜଗତରେ ନିଜର ଅପରିହାର୍ଯ୍ୟ ସ୍ଥାନ ବଜାୟ ରଖିଥିବା ମିଥୁନ ଚକ୍ରବର୍ତ୍ତୀ ଆଜି ତାଙ୍କର ୭୬ତମ ଜନ୍ମଦିନ ପାଳନ କରୁଛନ୍ତି। ଏହି ଅବସରରେ ସାରା ଦେଶରୁ ତାଙ୍କ ପ୍ରତି ଶୁଭେଚ୍ଛାର ସୁଅ ଛୁଟିଛି। ସୋସିଆଲ ମିଡିଆରେ ଫ୍ୟାନ୍ସ ମାନେ ତାଙ୍କର ଜୀବନ ସଂଘର୍ଷ, ପରିଶ୍ରମ ଓ ଅଦମ୍ୟ ଇଚ୍ଛାଶକ୍ତିକୁ ସ୍ମରଣ କରି ଭାବବିହ୍ୱଳ ହୋଇପଡ଼ିଛନ୍ତି। ୧୯୭୬ ମସିହାରେ ପ୍ରଖ୍ୟାତ ନିର୍ଦ୍ଦେଶକ ମୃଣାଳ ସେନଙ୍କ ଚଳଚ୍ଚିତ୍ର ‘ମୃଗୟା’ ମାଧ୍ୟମରେ ମିଥୁନ ଚକ୍ରବର୍ତ୍ତୀ ସିନେମା ଜଗତରେ ପ୍ରବେଶ କରିଥିଲେ। ମିଥୁନ ପ୍ରଥମ ଚଳଚ୍ଚିତ୍ରରେ ହିଁ ଏମିତି ଅଭିନୟ କରିଥିଲେ ଯାହା ତାଙ୍କୁ ଜାତୀୟ ପୁରସ୍କାର ଦେଇଥିଲା। ୧୯୮୨ ମସିହାରେ ମୁକ୍ତିଲାଭ କରିଥିବା ‘ଡିସ୍କୋ ଡାନ୍ସର’ କେବଳ ମିଥୁନଙ୍କ କ୍ୟାରିୟର ନୁହେଁ, ଭାରତୀୟ ସିନେମାର ଇତିହାସକୁ ମଧ୍ୟ ବଦଳାଇ ଦେଇଥିଲା। ମିଥୁନଙ୍କ ନୃତ୍ୟ ଶୈଳୀ, ତାଙ୍କର ଷ୍ଟେଜ୍ ପରଫର୍ମାନ୍ସ ଓ ଅଦ୍ଭୁତ ଉର୍ଜା ଯୁବପିଢ଼ିକୁ ପାଗଳ କରିଦେଇଥିଲା। ବିବାହ ଉତ୍ସବ, ସାଂସ୍କୃତିକ କାର୍ଯ୍ୟକ୍ରମ ଓ ସ୍କୁଲ ମଞ୍ଚରେ ତାଙ୍କର ଗୀତ ବାଜୁଥିଲା। କେବଳ ଭାରତ ନୁହେଁ, ସୋଭିଏତ୍ ୟୁନିଅନ୍‌ ଓ ଅନ୍ୟାନ୍ୟ ଦେଶରେ ମଧ୍ୟ ଏହି ଚଳଚ୍ଚିତ୍ର ଅପାର ସଫଳତା ହାସଲ କରିଥିଲା। ରୁଷିଆରେ ମିଥୁନଙ୍କ ଲୋକପ୍ରିୟତା ଏପରି ଥିଲା ଯେ ଅନେକ ଲୋକ ଭାରତୀୟ ସିନେମାକୁ “ମିଥୁନଙ୍କ ସିନେମା” ବୋଲି ଜାଣୁଥିଲେ। ମିଥୁନ ଚକ୍ରବର୍ତ୍ତୀଙ୍କୁ କେବଳ ଜଣେ ଅଭିନେତା କହିଲେ ଭୁଲ୍ ହେବ। ସେ ଏକ ଭାବନା। ସେ ପ୍ରମାଣ କରିଛନ୍ତି ଯେ ପ୍ରତିଭା ଓ ପରିଶ୍ରମ ଥିଲେ ସଫଳତା ନିଶ୍ଚିତ ଭାବେ ଆସେ। ସେ ଏମିତି ଏକ ସମୟରେ ନିଜର ପରିଚୟ ସୃଷ୍ଟି କରିଥିଲେ ଯେତେବେଳେ ବଲିଉଡ୍‌ରେ ଅନେକ ବଡ଼ ବଡ଼ ତାରକାଙ୍କ ରାଜ ଚାଲିଥିଲା। ତଥାପି ସେ ନିଜର ସ୍ୱତନ୍ତ୍ର ଶୈଳୀ ଓ ପରିଚୟ ଗଢ଼ିବାରେ ସଫଳ ହୋଇଥିଲେ। ତାଙ୍କ ଜୀବନର କାହାଣୀ ଆଜି ମଧ୍ୟ ଅନେକ ଯୁବ କଳାକାରଙ୍କ ପାଇଁ ଏକ ପ୍ରେରଣା। ଭାରତୀୟ ସିନେମା ପ୍ରତି ତାଙ୍କର ଅସାଧାରଣ ଅବଦାନକୁ ସ୍ୱୀକୃତି ଦେଇ ୨୦୨୨ ମସିହାରେ ତାଙ୍କୁ ଦାଦାସାହେବ ଫାଲକେ ପୁରସ୍କାର ପ୍ରଦାନ କରାଯାଇଥିଲା। ତାଙ୍କ ଜନ୍ମଦିନରେ ସୋସିଆଲ ମିଡିଆରେ ହେଉଥିବା ଅସଂଖ୍ୟ ପୋଷ୍ଟ, ଭିଡିଓ ଓ ଶୁଭେଚ୍ଛା ବାର୍ତ୍ତା ପ୍ରମାଣ କରୁଛି ଯେ ମିଥୁନ ଚକ୍ରବର୍ତ୍ତୀ କେବଳ ଜଣେ ଅଭିନେତା ନୁହେଁ, ସେ ଏକ ଯୁଗର ନାମ, ଏକ ଭାବନା ଏବଂ ଭାରତୀୟ ସିନେମାର ଗୌରବମୟ ପରିଚୟ।

ରିପୋର୍ଟ- ସମ୍ପଦା ମିଶ୍ର