ହରମଠ ଗାଁରେ ଗୋଠଛଡ଼ା ଦନ୍ତା ହାତୀର ଉପଦ୍ରବ, ୧୦ରୁ ଊର୍ଦ୍ଧ୍ୱ ଘର ଭାଙ୍ଗିଲା; ଫସଲ ନଷ୍ଟ

ଯୋଡ଼ା ବ୍ଲକ୍‌ର ହରମଠ ଗାଁରେ ଏବେ ଗୋଠଛଡ଼ା ଏକ ଦନ୍ତା ହାତୀର ଉପଦ୍ରବ ଗ୍ରାମବାସୀଙ୍କ ନିଦ ହଜାଇ ଦେଇଛି। ବିଳମ୍ବିତ ରାତିରେ ହାତୀଟି ଗାଁ ଭିତରେ ପଶି ବ୍ୟାପକ ଭଙ୍ଗାରୁଜା କରିଛି। ଗାଁରେ ପଶି ଦନ୍ତା ହାତୀଟି ୧୦ରୁ ଊର୍ଦ୍ଧ୍ୱ ଘର ଭାଙ୍ଗି ଦେଇଥିବାବେଳେ ଅନେକ ଫସଲ ମଧ୍ୟ ନଷ୍ଟ କରିଦେଇଛି। ହାତୀ ଆକ୍ରମଣରେ ଘରଦ୍ୱାର ହରାଇଥିବା କ୍ଷତିଗ୍ରସ୍ତ ପରିବାରଗୁଡ଼ିକ ଏବେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏପଟେ ଖବର ପାଇ ସ୍ଥାନୀୟ କିଛି ଯୁବକ ଗାଁରେ ପହଞ୍ଚି କ୍ଷତିଗ୍ରସ୍ତ ପରିବାରଙ୍କୁ ତୁରନ୍ତ ସହାୟତାର ହାତ ବଢ଼ାଇଛନ୍ତି। ପ୍ରତ୍ୟେକ କ୍ଷତିଗ୍ରସ୍ତ ପରିବାରକୁ ଗୋଟିଏ ଲେଖାଏଁ ପଲିଥିନ୍ ଯୋଗାଇ ଦିଆଯାଇଛି। ତେବେ ଦନ୍ତା ହାତୀର ଉପଦ୍ରବକୁ ନେଇ ଗାଁରେ ଆତଙ୍କର ପରିବେଶ ସୃଷ୍ଟି ହୋଇଛି। କ୍ଷତିଗ୍ରସ୍ତ ପରିବାରଙ୍କୁ ତୁରନ୍ତ ସରକାରୀ ସହାୟତା ଓ କ୍ଷତିପୂରଣ ଦେବା ସହ ହାତୀଟିକୁ ଜନବସତି ଅଞ୍ଚଳରୁ ଦୂରେଇବା ପାଇଁ ବନ ବିଭାଗ ପକ୍ଷରୁ ପଦକ୍ଷେପ ନେବାକୁ ଦାବି ହୋଇଛି।