ରକ୍ଷକ ସାଜିଛି ଭକ୍ଷକ! ଗଞ୍ଜେଇ ମାମଲାରେ ବୌଦ୍ଧ ପୋଲିସ କର୍ମଚାରୀଙ୍କ ସମ୍ପୃକ୍ତି ନେଇ ହଲଚଲ
ବୌଦ୍ଧ ଗଞ୍ଜେଇ ମାମଲାରେ ଭାଇରାଲ ଅଡିଓରେ ୪ ଲକ୍ଷ ଟଙ୍କା ଡିଲ୍ ଅଭିଯୋଗ; ୩ ପୋଲିସ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ, ୪ ବର୍ଷରେ ଏକାଧିକ କର୍ମଚାରୀ ଗଞ୍ଜେଇ ମାମଲାରେ ଫସିଥିବା ଦାବି।
ବୌଦ୍ଧ: ଗଞ୍ଜେଇ କାରବାରକୁ ନେଇ ବୌଦ୍ଧ ଜିଲ୍ଲା ପୋଲିସ ବିଭାଗରେ ପୁଣି ଚର୍ଚ୍ଚା ଜୋର ଧରିଛି। ହରଭଙ୍ଗା ବ୍ଲକ୍ ହାଟଗାଁ ଅଞ୍ଚଳରେ ଗଞ୍ଜେଇ ରେଡ୍କୁ କେନ୍ଦ୍ର କରି ଭାଇରାଲ ହୋଇଥିବା ଅଡିଓ ବାର୍ତ୍ତାଳାପରେ ଟଙ୍କା ଡିଲ୍ ନେଇ ଅଭିଯୋଗ ସାମ୍ନାକୁ ଆସିଛି। ଅଡିଓରେ ୪ ଲକ୍ଷ ଟଙ୍କାର ଡିଲ୍ ସମ୍ପର୍କରେ କଥାବାର୍ତ୍ତା ଥିବା ଦାବି ହେଉଥିବା ବେଳେ, ଏଥିରେ ଜଣେ ‘ସାହେବ’ଙ୍କ ନାଁ ଉଠୁଥିବା ନେଇ ମଧ୍ୟ ଚର୍ଚ୍ଚା ଚାଲିଛି। ଘଟଣାକୁ ଗୁରୁତ୍ୱର ସହ ନେଇ ପୋଲିସ ମହାନିର୍ଦ୍ଦେଶକ ସମ୍ବଲପୁର ରେଞ୍ଜ ଆଇଜିଙ୍କୁ ତଦନ୍ତ ପାଇଁ ନିର୍ଦ୍ଦେଶ ଦେଇଥିବା ସୂଚନା ମିଳିଛି। ଭାଇରାଲ ଅଡିଓରେ ନାଁ ଆସୁଥିବା ନଳିନୀକାନ୍ତ ଦାଶ ଓ ଫାଣ୍ଡି ଅଧିକାରୀ ପ୍ରାଣବନ୍ଧୁ ସାହୁଙ୍କୁ ବଦଳି କରାଯାଇଥିବା ବେଳେ, ଚାର୍ଜସିଟ୍ ଦାଖଲରେ ବିଳମ୍ବ ଅଭିଯୋଗରେ SI ଚନ୍ଦନ ଜେନାଙ୍କୁ ନିଲମ୍ବନ କରାଯାଇଥିବା ଜଣାପଡ଼ିଛି।
୪ ବର୍ଷରେ ଏକାଧିକ ପୋଲିସ କର୍ମଚାରୀଙ୍କ ନାଁ
ବୌଦ୍ଧରେ ଗଞ୍ଜେଇ କାରବାର ସହ ପୋଲିସ କର୍ମଚାରୀଙ୍କ ସମ୍ପୃକ୍ତି ନେଇ ଗତ କିଛି ବର୍ଷ ଧରି ଏକାଧିକ ଘଟଣା ସାମ୍ନାକୁ ଆସିଛି। ଉପଲବ୍ଧ ତଥ୍ୟ ଅନୁସାରେ, ଏଥିରେ ଥାନା ଅଧିକାରୀ, ସବ୍ଇନ୍ସପେକ୍ଟର, ଏଏସ୍ଆଇ, IRB ଯବାନ, କନେଷ୍ଟବଳ, DVF ଯବାନ ଓ ହୋମଗାର୍ଡଙ୍କ ନାଁ ରହିଛି।
୨୦ ଜାନୁଆରୀ ୨୦୨୩: ବାଘିଆପଡ଼ା ଫାଣ୍ଡି ଅଧିକାରୀ ସନାତନ ପ୍ରଧାନଙ୍କ ସମେତ ୨ କନେଷ୍ଟବଳ ୧୬ କେଜି ଗଞ୍ଜେଇ ସହ ଧରାପଡ଼ିଥିବା ଦାବି।
୧ ନଭେମ୍ବର ୨୦୨୩: DVF ଯବାନ ହରିଶ୍ଚନ୍ଦ୍ର ସାହୁ ୬ ଲକ୍ଷ ଟଙ୍କା ଲାଞ୍ଚ ନେବା ଅଭିଯୋଗରେ ଭିଜିଲାନ୍ସ ହାତରେ ଗିରଫ।
୭ ଏପ୍ରିଲ ୨୦୨୪: DVF ଯବାନ ଡିଙ୍ଗର ମାଝୀ ୫୪ କେଜି ଗଞ୍ଜେଇ ସହ ଗିରଫ ହୋଇଥିବା ଦାବି।
୨୫ ମାର୍ଚ୍ଚ ୨୦୨୫: ମନମୁଣ୍ଡା ଥାନାର ୩ IRB ଯବାନ ୧୫ କେଜି ଗଞ୍ଜେଇ ସହ ଗିରଫ ହୋଇଥିବା ସୂଚନା।
୧୦ ଏପ୍ରିଲ ୨୦୨୫: ହୋମଗାର୍ଡ ସମାରୁ ସେଠୀ ୧୦ କେଜି ଗଞ୍ଜେଇ ସହ ଜେଲ୍ ଯାଇଥିବା ଦାବି।
ଏପ୍ରିଲ ୨୦୨୬: ରିଜର୍ଭ କନେଷ୍ଟବଳ ନିଧି ସାହୁ ଓ ହୋମଗାର୍ଡ ଯସକେତନ ରଣା ଗଞ୍ଜେଇ ମାମଲାରେ ଗିରଫ ହୋଇଥିବା ସୂଚନା।
ଜୁଲାଇ–ଅଗଷ୍ଟ ୨୦୨୬: ପୂର୍ବତନ IIC ସସ୍ମିତା ମଗର, କନେଷ୍ଟବଳ ଯଶମୋହନ ମାଝୀ ଓ SI ଚନ୍ଦନ ଜେନାଙ୍କ ବିରୋଧରେ ନିଲମ୍ବନ ସମ୍ପର୍କିତ କାର୍ଯ୍ୟାନୁଷ୍ଠାନ ହୋଇଥିବା ଦାବି।
ବାରମ୍ବାର ପୋଲିସ କର୍ମଚାରୀଙ୍କ ନାଁ ଗଞ୍ଜେଇ ମାମଲାରେ ସାମ୍ନାକୁ ଆସିବା ପରେ ବିଭାଗୀୟ ସ୍ୱଚ୍ଛତା ଉପରେ ପ୍ରଶ୍ନ ଉଠିଛି। କିଛି କର୍ମଚାରୀ ନିଲମ୍ବିତ ହେବା ପରେ ପୁଣି କାର୍ଯ୍ୟରେ ଯୋଗ ଦେଇଥିବା ନେଇ ମଧ୍ୟ ଚର୍ଚ୍ଚା ରହିଛି। ଆଇନଜୀବୀ ମହଲର ମତରେ, ଯଦି ତଦନ୍ତରେ କୌଣସି ପୋଲିସ କର୍ମଚାରୀଙ୍କ ଗଞ୍ଜେଇ କାରବାରରେ ପ୍ରତ୍ୟକ୍ଷ ସମ୍ପୃକ୍ତି ପ୍ରମାଣିତ ହୁଏ, ତେବେ ଆଇନ ଅନୁଯାୟୀ କଠୋର ପଦକ୍ଷେପ ନିଆଯିବା ଆବଶ୍ୟକ।
ବୌଦ୍ଧ ପୋଲିସ ଗଞ୍ଜେଇ ଜବତ ଓ ନଷ୍ଟ କରିବା କ୍ଷେତ୍ରରେ ଉଲ୍ଲେଖନୀୟ କାମ କରିଥିବା ଦାବି ହେଉଥିବା ବେଳେ, କିଛି କର୍ମଚାରୀଙ୍କ ବିରୋଧରେ ଏଭଳି ଅଭିଯୋଗ ବିଭାଗର ଭାବମୂର୍ତ୍ତି ଉପରେ ପ୍ରଭାବ ପକାଇଛି। ଭାଇରାଲ ଅଡିଓରେ ଉଲ୍ଲେଖ ହେଉଥିବା ‘ସାହେବ’ କିଏ ଏବଂ ୪ ଲକ୍ଷ ଟଙ୍କାର ଡିଲ୍ ଅଭିଯୋଗର ସତ୍ୟତା କେତେ, ତାହା ତଦନ୍ତ ପରେ ହିଁ ସ୍ପଷ୍ଟ ହେବ। ଅଭିଯୋଗ ସତ ପ୍ରମାଣିତ ହେଲେ କେଉଁମାନଙ୍କ ବିରୋଧରେ କେତେ କଠୋର କାର୍ଯ୍ୟାନୁଷ୍ଠାନ ହେବ ଏବଂ ପୋଲିସ ବିଭାଗ ନିଜ ଭିତରୁ ଦୁର୍ନୀତିକୁ ରୋକିବା ପାଇଁ କି ପଦକ୍ଷେପ ନେବ, ତାହା ଉପରେ ରହିଛି ସମସ୍ତଙ୍କ ନଜର।
