ଡାକ୍ତରଙ୍କ ଉପରେ ଆକ୍ରମଣ, ପ୍ରତିବାଦରେ କଳାବ୍ୟାଜ୍ ପିନ୍ଧି ନିରବ ଆନ୍ଦୋଳନ

ମାଲକାନଗିରି: ସମସ୍ତ ଡାକ୍ତର କଳାବ୍ୟାଜ୍ ପିନ୍ଧି ନିରବ ପ୍ରତିବାଦ । ମାଲକାନଗିରି ଜିଲ୍ଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟରତ ଜଣେ ଡାକ୍ତର ଓ ସୁରକ୍ଷା କର୍ମୀଙ୍କ ଉପରେ ଆକ୍ରମଣ ଘଟଣା। ଆକ୍ରମଣକୁ ନେଇ ଡାକ୍ତରମାନଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏହାର ପ୍ରତିବାଦରେ ଗୁରୁବାର ସକାଳ ଚିକିତ୍ସାଳୟର ସମସ୍ତ ଡାକ୍ତର କଳାବ୍ୟାଜ୍ ପିନ୍ଧି ନିରବ ପ୍ରତିବାଦ କରିବା ସହ ସରକାର ଓ ପ୍ରଶାସନଙ୍କ ନିକଟରେ ଦୋଷୀଙ୍କ ଗିରଫ ଓ ସୁରକ୍ଷା ବ୍ୟବସ୍ଥା ସୁଦୃଢ଼ କରିବାକୁ ଦାବି କରିଛନ୍ତି। ସୂଚନା ଅନୁଯାୟୀ, ଗତକାଲି ଜଣେ ଗର୍ଭବତୀ ମହିଳାଙ୍କ ମୃତ୍ୟୁକୁ କେନ୍ଦ୍ର କରି ଉତ୍ତେଜିତ ପରିବାର ଲୋକେ କାର୍ଯ୍ୟରତ ଡାକ୍ତର ସିଦ୍ଧାର୍ଥ ଏବଂ ଜଣେ ସୁରକ୍ଷା କର୍ମୀଙ୍କୁ ଆକ୍ରମଣ କରିଥିଲେ। ଏହି ଘଟଣା ପରେ ଡାକ୍ତର ସଂଘ ଗଭୀର ଚିନ୍ତା ଓ କ୍ଷୋଭ ପ୍ରକାଶ କରିଛି। ଡାକ୍ତରମାନଙ୍କ କହିବା ଅନୁଯାୟୀ, କୌଣସି ଡାକ୍ତର କେବେ ମଧ୍ୟ ରୋଗୀଙ୍କ ଅବସ୍ଥା ଖରାପ ହେଉ କିମ୍ବା ମୃତ୍ୟୁ ଘଟୁ ବୋଲି ଚାହାନ୍ତି ନାହିଁ। ରୋଗୀଙ୍କୁ ବଞ୍ଚାଇବା ପାଇଁ ସେମାନେ ସର୍ବୋତ୍ତମ ଚେଷ୍ଟା କରିଥାନ୍ତି। ତଥାପି ବାରମ୍ବାର ଡାକ୍ତରମାନଙ୍କୁ ଲକ୍ଷ୍ୟ କରି ଆକ୍ରମଣ ହେବା ଫଳରେ ସେମାନେ ନିଜକୁ ଅସୁରକ୍ଷିତ ମନେ କରୁଛନ୍ତି। ଏଭଳି ଘଟଣା ଚିକିତ୍ସା ସେବା ପ୍ରଦାନରେ ବାଧା ସୃଷ୍ଟି କରୁଥିବା ବୋଲି ସେମାନେ ମତ ପ୍ରକାଶ କରିଛନ୍ତି। ଡାକ୍ତର ସଂଘ ଜଣାଇଛି ଯେ, ଚିକିତ୍ସାକୁ ନେଇ କୌଣସି ଅସନ୍ତୋଷ ଥିଲେ ଆଇନସମ୍ମତ ଉପାୟରେ ଅଭିଯୋଗ କରାଯାଇପାରେ। କିନ୍ତୁ ଆଇନକୁ ହାତକୁ ନେଇ ହସ୍ପିଟାଲ ଭିତରେ ଗଣ୍ଡଗୋଳ କରିବା ଓ ଡାକ୍ତରଙ୍କୁ ଆକ୍ରମଣ କରିବା ସମାଜ ପାଇଁ ଭୁଲ୍ ବାର୍ତ୍ତା ଦେଉଛି। ସେମାନେ ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଓ ତୁରନ୍ତ ଗିରଫଦାରୀ ଦାବି କରିଛନ୍ତି। ଅନ୍ୟପଟେ, ମାଲକାନଗିରି ଆଦର୍ଶ ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଥିବା ବେଳେ ଆଇନ ଅନୁଯାୟୀ ଦୃଢ଼ ପଦକ୍ଷେପ ଗ୍ରହଣ କରାଯିବ ବୋଲି ସୂଚନା ଦେଇଛିନ୍ତି। ଏହି ପ୍ରତିବାଦ ସମୟରେ ଚିକିତ୍ସା ସେବା ସ୍ୱାଭାବିକ ଭାବେ ଜାରି ରହିଛି ଏବଂ ରୋଗୀ ସେବାରେ କୌଣସି ବାଧା ସୃଷ୍ଟି ହୋଇନାହିଁ। ତେବେ ଆଗାମୀ ୨୪ ଘଣ୍ଟା ମଧ୍ୟରେ ଦୋଷୀଙ୍କୁ ଗିରଫ କରାନଗଲେ, ‘ଓମସା’ ସହ ଆଲୋଚନା କରି ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ଡାକ୍ତର ସଂଘ ଚେତାବନୀ ଦେଇଛି।