Lakshmi Puja: ଆସୁଛି ଆଲୋକର ପର୍ବ ଦୀପାବଳି, ଜାଣନ୍ତୁ ମା’ ଲକ୍ଷ୍ମୀଙ୍କ ପୂଜା ତିଥି, ଶୁଭ ମୁହୂର୍ତ୍ତ ଓ ପୂଜାବିଧି

ବ୍ୟୁରୋ: ଆଲୋକର ପର୍ବ ଦୀପାବଳିକୁ ନେଇ ଏବେଠାରୁ ଆରମ୍ଭ ହେଲାଣି ପ୍ରସ୍ତୁତି। ହିନ୍ଦୁ ଧର୍ମରେ ଦୀପାବଳି ଅନ୍ୟତମ ପ୍ରମୁଖ ପର୍ବ। ଏହି ଦିନ ଧନ, ସମୃଦ୍ଧି ଓ ସୌଭାଗ୍ୟର ଦେବୀ ମା’ ଲକ୍ଷ୍ମୀଙ୍କ ସହ ପ୍ରଭୁ ଗଣେଶଙ୍କୁ ପୂଜା କରାଯାଏ। ୨୦୨୬ ମସିହାରେ ନଭେମ୍ବର ୮ ତାରିଖ ରବିବାର ଦିନ ପାଳନ ହେବ ଦୀପାବଳି। ଏହି ଅବସରରେ ଘରେ ଘରେ ଦୀପ ଜାଳିବା ସହ ରଙ୍ଗୋଲି, ଫୁଲ ଓ ଆଲୋକମାଳାରେ ସଜେଇ ହେବ ଘର। ୨୦୨୬ ନଭେମ୍ବର ୮ ତାରିଖ ରବିବାର ଦିନ ପାଳନ ହେବ ଦୀପାବଳି ଓ ମା’ ଲକ୍ଷ୍ମୀଙ୍କ ପୂଜା। ହିନ୍ଦୁ ପଞ୍ଚାଙ୍ଗ ଅନୁଯାୟୀ, କାର୍ତ୍ତିକ ମାସର ଅମାବାସ୍ୟା ତିଥିରେ ଏହି ପର୍ବ ପାଳନ କରାଯାଏ।

ଅମାବାସ୍ୟା ତିଥି ନଭେମ୍ବର ୮ ତାରିଖ ସକାଳ ୧୧ଟା ୨୭ ମିନିଟ୍ ରୁ ୯ ତାରିଖ ଦିନ ୧୨ଟା ୩୧ ମିନିଟ୍ ପର୍ଯ୍ୟନ୍ତ ରହୁଥିଲେ ମଧ୍ୟ ପ୍ରଦୋଷ କାଳରେ ଅମାବାସ୍ୟା ତିଥି ରହୁଥିବାରୁ ନଭେମ୍ବର ୮ ସନ୍ଧ୍ୟାରେ ଲକ୍ଷ୍ମୀ ପୂଜା କରାଯିବ।

ଲକ୍ଷ୍ମୀ ପୂଜା ୨୦୨୬: ଶୁଭ ମୁହୂର୍ତ୍ତ କେବେ?

ଦୀପାବଳିରେ ମା’ ଲକ୍ଷ୍ମୀଙ୍କ ପୂଜା ପାଇଁ ପ୍ରଦୋଷ କାଳକୁ ବିଶେଷ ଶୁଭ ମନେ କରାଯାଏ। ସୂର୍ଯ୍ୟାସ୍ତ ପରେ ଆରମ୍ଭ ହେଉଥିବା ଏହି ସମୟରେ ପୂଜା କରିବାର ବିଧି ରହିଛି। ଏହା ସହିତ ବୃଷଭ କାଳ ମଧ୍ୟ ଲକ୍ଷ୍ମୀ ପୂଜା ପାଇଁ ବିଶେଷ ଶୁଭ ବୋଲି ବିବେଚନା କରାଯାଏ। ତେବେ ସହର ଅନୁସାରେ ସୂର୍ଯ୍ୟାସ୍ତ ଓ ପୂଜାର ଶୁଭ ମୁହୂର୍ତ୍ତରେ ପାର୍ଥକ୍ୟ ରହିଥାଏ। ତେଣୁ ନିଜ ସହରର ପଞ୍ଚାଙ୍ଗ ଅନୁସାରେ ପୂଜା ସମୟ ନିର୍ଦ୍ଧାରଣ କରିବା ଉଚିତ।

ଦୀପାବଳିରେ କାହିଁକି କରାଯାଏ ମା’ ଲକ୍ଷ୍ମୀଙ୍କ ପୂଜା?

ହିନ୍ଦୁ ଧାର୍ମିକ ବିଶ୍ୱାସ ଅନୁସାରେ, ମା’ ଲକ୍ଷ୍ମୀ ହେଉଛନ୍ତି ଧନ, ଐଶ୍ୱର୍ଯ୍ୟ, ସମୃଦ୍ଧି ଓ ସୌଭାଗ୍ୟର ଦେବୀ। କାର୍ତ୍ତିକ ଅମାବାସ୍ୟା ଦିନ ମା’ଙ୍କୁ ଆରାଧନା କଲେ ଘରେ ସୁଖ, ଶାନ୍ତି ଓ ସମୃଦ୍ଧି ଆସିଥାଏ ବୋଲି ଭକ୍ତଙ୍କ ବିଶ୍ୱାସ ରହିଛି। ସେହିପରି ପ୍ରଭୁ ଗଣେଶଙ୍କୁ ବିଘ୍ନ ବିନାଶକ ଓ ଶୁଭାରମ୍ଭର ଦେବତା ଭାବେ ପୂଜା କରାଯାଏ। ତେଣୁ ଦୀପାବଳିରେ ମା’ ଲକ୍ଷ୍ମୀଙ୍କ ସହ ପ୍ରଭୁ ଗଣେଶଙ୍କୁ ମଧ୍ୟ ପୂଜା କରିବାର ପରମ୍ପରା ରହିଛି।

ଲକ୍ଷ୍ମୀ ପୂଜା ପାଇଁ ଆବଶ୍ୟକ ସାମଗ୍ରୀ

ଦୀପାବଳି ପୂଜା ପୂର୍ବରୁ ଭକ୍ତମାନେ ଘର ସଫା କରିବା ସହ ପୂଜା ସାମଗ୍ରୀ ପ୍ରସ୍ତୁତ କରିଥାନ୍ତି। ପୂଜା ପାଇଁ ଆବଶ୍ୟକ ସାମଗ୍ରୀ ମଧ୍ୟରେ ରହିଛି, ମା’ ଲକ୍ଷ୍ମୀ ଓ ପ୍ରଭୁ ଗଣେଶଙ୍କ ମୂର୍ତ୍ତି ବା ଫଟୋ। ଫୁଲ, ଫଳ। ଦୀପ, ତେଲ ବା ଘିଅ ଓ ବଳିତା। ଧୂପ, ଦୀପ, ଚନ୍ଦନ ଓ କୁଙ୍କୁମ। ଅକ୍ଷତ, ନଡ଼ିଆ ଓ ପାନଗୁଆ। ମିଠା ଓ ଅନ୍ୟାନ୍ୟ ଭୋଗ ସାମଗ୍ରୀ। ପୂଜା ଆସନ ଓ କଳସ।

ଦୀପାବଳିରେ କିପରି କରିବେ ମା’ ଲକ୍ଷ୍ମୀଙ୍କ ପୂଜା?

ଦୀପାବଳି ଦିନ ସକାଳୁ ଘର ସଫା କରିବା ସହ ସନ୍ଧ୍ୟାରେ ଘରର ମୁଖ୍ୟ ଦ୍ୱାରକୁ ଦୀପ ଓ ଫୁଲରେ ସଜାଇବାର ପରମ୍ପରା ରହିଛି। ଏହାପରେ ପୂଜା ସ୍ଥାନରେ ମା’ ଲକ୍ଷ୍ମୀ ଓ ପ୍ରଭୁ ଗଣେଶଙ୍କ ମୂର୍ତ୍ତି ସ୍ଥାପନ କରାଯାଏ। ପ୍ରଥମେ ପ୍ରଭୁ ଗଣେଶଙ୍କୁ ପୂଜା କରିବା ପରେ ମା’ ଲକ୍ଷ୍ମୀଙ୍କୁ ଫୁଲ, ଚନ୍ଦନ, କୁଙ୍କୁମ ଓ ଭୋଗ ଅର୍ପଣ କରାଯାଏ। ଏହାପରେ ଧୂପ ଓ ଦୀପ ଜାଳି ମନ୍ତ୍ର ଉଚ୍ଚାରଣ ସହ ଆଳତି କରାଯାଏ। ଶେଷରେ ପରିବାରର ସମସ୍ତ ସଦସ୍ୟ ଏକାଠି ହୋଇ ମା’ଙ୍କ ନିକଟରେ ସୁଖ, ଶାନ୍ତି, ସମୃଦ୍ଧି ଓ ମଙ୍ଗଳ କାମନା କରନ୍ତି।

ଦୀପାବଳି କେବଳ ଆଲୋକର ପର୍ବ ନୁହେଁ, ବରଂ ଏହା ପରିବାରର ଏକତା, ଆଧ୍ୟାତ୍ମିକତା ଓ ନୂଆ ଆଶାର ପ୍ରତୀକ। ମା’ ଲକ୍ଷ୍ମୀ ଓ ପ୍ରଭୁ ଗଣେଶଙ୍କ ଆରାଧନା ମାଧ୍ୟମରେ ଭକ୍ତମାନେ ନିଜ ପରିବାରର ମଙ୍ଗଳ ଓ ସମୃଦ୍ଧି କାମନା କରିଥାନ୍ତି।