ଦିଲ୍ଲୀ ସିଓ୍ୱେଜ ଟ୍ରିଟମେଣ୍ଟ ପ୍ଲାଣ୍ଟ ମାମଲା: ସତ୍ୟେନ୍ଦ୍ର ଜୈନଙ୍କ ସମେତ ୬ ଗିରଫ
ଆପ୍ ନେତା ତଥା ପୂର୍ବତନ ମନ୍ତ୍ରୀ ସତ୍ୟେନ୍ଦ୍ର ଜୈନ ପୁଣି ଗିରଫ। ଦିଲ୍ଲୀରେ ସିଓ୍ୱେଜ ଟ୍ରିଟମେଣ୍ଟ ପ୍ଲାଣ୍ଟ ର ଟେଣ୍ଡରରେ ଅନିୟମିତତା ମାମଲାରେ ଗିରଫ। ଆଣ୍ଟି କରପସନ ବ୍ୟୁରୋ କହିଲା- ନିର୍ଦ୍ଦିଷ୍ଟ କମ୍ପାନୀକୁ ଅନୁଚିତ ଅନୁଗ୍ରହ ଦିଆଯାଇଥିଲା। ଦିଲ୍ଲୀ ଜଳବୋର୍ଡ ଦୁର୍ନୀତି ମାମଲାରେ ସତ୍ୟେନ୍ଦ୍ରଙ୍କ ସମେତ ୬ ଗିରଫ। ପୂର୍ବତନ ସିଇଓ ଉଦିତ ପ୍ରକାଶ ରାୟ ବି ଗିରଫ।
ନୂଆଦିଲ୍ଲୀ: ଦିଲ୍ଲୀ ଜଳ ବୋର୍ଡର ସିୱେଜ୍ ଟ୍ରିଟମେଣ୍ଟ ପ୍ଲାଣ୍ଟ (STP) ଟେଣ୍ଡରରେ କଥିତ ଅନିୟମିତତା ଓ ଦୁର୍ନୀତି ମାମଲାରେ ଦିଲ୍ଲୀ ସରକାରଙ୍କ ଆଣ୍ଟି-କରପ୍ସନ ବ୍ରାଞ୍ଚ (ACB) ବଡ଼ କାର୍ଯ୍ୟାନୁଷ୍ଠାନ ନେଇଛି। ACB ଆମ୍ ଆଦମୀ ପାର୍ଟି (AAP) ନେତା ତଥା ପୂର୍ବତନ ଦିଲ୍ଲୀ ମନ୍ତ୍ରୀ ସତ୍ୟେନ୍ଦ୍ର କୁମାର ଜୈନଙ୍କ ସମେତ ୬ ଜଣଙ୍କୁ ଗିରଫ କରିଛି। ଅନ୍ୟ ଗିରଫ ଅଭିଯୁକ୍ତମାନେ ହେଲେ ପୂର୍ବତନ ଦିଲ୍ଲୀ ଜଳ ବୋର୍ଡ CEO ତଥା IAS ଅଧିକାରୀ ଉଦିତ ପ୍ରକାଶ ରାୟ, ପୂର୍ବତନ ଚୁକ୍ତିଭିତ୍ତିକ ପରାମର୍ଶଦାତା ଅଙ୍କିତ ଶ୍ରୀବାସ୍ତବ, AN Enterprisesର ମାଲିକ ନାଗେନ୍ଦ୍ର ଯାଦବ, Euroteck Environment Pvt Ltdର ମାଲିକ ରାଜା କୁମାର କୁର୍ରା ଏବଂ Srijanharର ମାଲିକ ପଙ୍କଜ ବର୍ମା। ଏହି ମାମଲାରେ ୨୦୨୪ ମେ ୧୧ରେ FIR ରୁଜୁ ହୋଇଥିଲା। STPର ଅଗମେଣ୍ଟେସନ୍ ଓ ଅପଗ୍ରେଡେସନ୍ ପାଇଁ ହୋଇଥିବା ଟେଣ୍ଡରରେ ସର୍ତ୍ତ ହେରଫେର, ପ୍ରତିଯୋଗିତା ସୀମିତ କରିବା ଏବଂ ନିର୍ଦ୍ଦିଷ୍ଟ ଏକ ଟେକ୍ନୋଲୋଜି ପ୍ରଦାନକାରୀଙ୍କୁ ଫାଇଦା ପହଞ୍ଚାଇବା ଭଳି ଅଭିଯୋଗ ରହିଛି। ACBର ଦାବି ଅନୁସାରେ, ଟେଣ୍ଡରରେ ଏପରି କିଛି କଠୋର ତକନିକୀ ସର୍ତ୍ତ ରଖାଯାଇଥିଲା, ଯାହା Euroteck Environment Pvt Ltdକୁ ଲାଭ ପହଞ୍ଚାଇବା ଦିଗରେ ଥିଲା। ପ୍ରସ୍ତାବିତ ପାଇଲଟ୍ ଷ୍ଟଡି କରାଯାଇନଥିବା ସହ ଟ୍ରିଟେଡ୍ ୱେଷ୍ଟୱାଟର ସମ୍ପର୍କିତ କିଛି ମୁଖ୍ୟ ମାନଦଣ୍ଡକୁ ମଧ୍ୟ ଟେଣ୍ଡରରୁ ବାଦ ଦିଆଯାଇଥିବା ଏଜେନ୍ସି ଅଭିଯୋଗ କରିଛି। ତଦନ୍ତ ବେଳେ ମିଳିଥିବା ଇଲେକ୍ଟ୍ରୋନିକ୍ ପ୍ରମାଣରେ ବେସରକାରୀ ବ୍ୟକ୍ତି, ସରକାରୀ ଅଧିକାରୀ ଓ ମଧ୍ୟସ୍ଥଙ୍କ ମଧ୍ୟରେ ଟେଣ୍ଡରକୁ ନେଇ ଯୋଗାଯୋଗ ହୋଇଥିବା ଏଜେନ୍ସି ଦାବି କରିଛି। ଟେଣ୍ଡର ନୋଟିସ୍ ଜାରି ପୂର୍ବରୁ ଟେଣ୍ଡର ସର୍ତ୍ତ ଓ ଅନ୍ୟାନ୍ୟ ଦଲିଲ ଆଦାନପ୍ରଦାନ ହୋଇଥିବା ଏବଂ ପରେ ସେଗୁଡ଼ିକୁ ଟେଣ୍ଡର ପ୍ରକ୍ରିୟାରେ ସାମିଲ କରାଯାଇଥିବା ଅଭିଯୋଗ ରହିଛି। ତଦନ୍ତରେ ଟେଣ୍ଡରକୁ ପ୍ରଭାବିତ କରିବା ପାଇଁ କଥିତ ଭାବେ ଟଙ୍କା କାରବାର ହୋଇଥିବା ଏଜେନ୍ସି ଦାବି କରିଛି। Srijanhar ଓ AN Enterprises ଭଳି ମଧ୍ୟସ୍ଥ ସଂସ୍ଥା ମାଧ୍ୟମରେ କମିଶନ୍ କିମ୍ବା ଲାଞ୍ଚ ଭାବେ ଟଙ୍କା ଦିଆଯାଇଥିବା ଅଭିଯୋଗ ରହିଛି। ACB ଅନୁସାରେ, AN Enterprisesକୁ Euroteck ସହ ସଂପୃକ୍ତ ସଂସ୍ଥାରୁ ଟଙ୍କା ଆସିଥିଲା। ପରେ ଏହି ଟଙ୍କା ସରକାରୀ ଅଧିକାରୀ ଓ ସେମାନଙ୍କ ସମ୍ପର୍କୀୟଙ୍କ ଆକାଉଣ୍ଟକୁ ଯାଇଥିବା ତଦନ୍ତକାରୀମାନେ ଦାବି କରିଛନ୍ତି। ବିଶେଷ କରି, ତତ୍କାଳୀନ ଦିଲ୍ଲୀ ଜଳ ବୋର୍ଡ CEO ଉଦିତ ପ୍ରକାଶ ରାୟ ଓ ତାଙ୍କ ସମ୍ପର୍କୀୟଙ୍କ ଆକାଉଣ୍ଟକୁ ପ୍ରାୟ ୧ କୋଟି ୫୨ ଲକ୍ଷ ଟଙ୍କା ଯାଇଥିବା ACB ଅଭିଯୋଗ କରିଛି। ଏହି ଟଙ୍କାରେ ଅଚଳ ସମ୍ପତ୍ତି କିଣାଯାଇଥିବା ମଧ୍ୟ ଦାବି କରାଯାଇଛି।
ସେପଟେ ଘଟଣାକୁ ନେଇ AAP ନେତା ଅରବିନ୍ଦ କେଜ୍ରିୱାଲ ଅଭିଯୋଗ କରିଛନ୍ତି ଯେ, BJPର ଚାପରେ ଜୈନଙ୍କୁ ଟାର୍ଗେଟ କରାଯାଉଛି। ତାଙ୍କ ଦାବି ଅନୁସାରେ, ଜୈନ ଟେଣ୍ଡର ପ୍ରକ୍ରିୟା ସମୟରେ ଜେଲ୍ରେ ଥିଲେ। ତେଣୁ ତାଙ୍କୁ ଏହି ମାମଲାରେ କିପରି ଦାୟୀ କରାଯାଇପାରିବ ବୋଲି AAP ପ୍ରଶ୍ନ ଉଠାଇଛି। ଅନ୍ୟପକ୍ଷରେ, ACB କହିଛି ଯେ ତଦନ୍ତରେ ମିଳିଥିବା ପ୍ରମାଣ ଆଧାରରେ ୬ ଜଣଙ୍କୁ ପଚରାଉଚରା ପରେ ଅଗଷ୍ଟ ୧୮ରେ ଗିରଫ କରାଯାଇଛି। ମାମଲାରେ ଟେଣ୍ଡର ହେରଫେର, ଟଙ୍କାର ସମ୍ପୂର୍ଣ୍ଣ ଟ୍ରେଲ୍ ଏବଂ ଅନ୍ୟ ସମ୍ଭାବ୍ୟ ଅଭିଯୁକ୍ତଙ୍କ ଭୂମିକା ନେଇ ତଦନ୍ତ ଜାରି ରହିଛି।
