ନିଟ୍ ପୁନଃପରୀକ୍ଷା ପୂର୍ବରୁ ଟେଲିଗ୍ରାମ୍ ଉପରେ ଅସ୍ଥାୟୀ କଟକଣା,ରାୟ ସଂରକ୍ଷିତ ରଖିଲେ ଦିଲ୍ଲୀ ହାଇକୋର୍ଟ

ନୂଆଦିଲ୍ଲୀ: ନିଟ୍‌ ପୁନଃପରୀକ୍ଷା ପୂର୍ବରୁ ଟେଲିଗ୍ରାମ୍‌ ଉପରେ ଅସ୍ଥାୟୀ କଟକଣା । କେନ୍ଦ୍ର ସରକାରଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରିଥିବା ମାମଲାରେ ରାୟ ସଂରକ୍ଷିତ ରଖିଲେ ଦିଲ୍ଲୀ ହାଇକୋର୍ଟ। ନିଟ୍‌-ୟୁଜି ୨୦୨୬ ପୁନଃପରୀକ୍ଷା ପୂର୍ବରୁ ପ୍ରଶ୍ନପତ୍ର ଲିକ୍‌ ରୋକିବା ପାଇଁ କେନ୍ଦ୍ର ସରକାର ଟେଲିଗ୍ରାମ୍‌ ଆପ୍‌ ଉପରେ ଲଗାଇଥିବା ଅସ୍ଥାୟୀ କଟକଣାକୁ ନେଇ ଦିଲ୍ଲୀ ହାଇକୋର୍ଟରେ ଗୁରୁତ୍ୱପୂର୍ଣ୍ଣ ଶୁଣାଣି ହୋଇଛି। ଗୁରୁବାର ଶୁଣାଣି ପରେ ହାଇକୋର୍ଟ ନିଜ ରାୟ ସଂରକ୍ଷିତ ରଖିଛନ୍ତି। ଶୁଣାଣି ସମୟରେ ନ୍ୟାୟମୂର୍ତ୍ତି ତେଜସ କାରିଆ କେନ୍ଦ୍ର ସରକାରଙ୍କୁ ପ୍ରଶ୍ନ କରି କହିଥିଲେ ଯେ, “କେବଳ ଗୋଟିଏ ବର୍ଗର ନାଗରିକ (ନିଟ୍‌ ପରୀକ୍ଷାର୍ଥୀ) ପରୀକ୍ଷା ଦେଉଥିବାରୁ ୧୫ କୋଟିରୁ ଅଧିକ ଟେଲିଗ୍ରାମ୍‌ ବ୍ୟବହାରକାରୀଙ୍କ ଅଧିକାରକୁ ବନ୍ଦ କରାଯାଇପାରିବ କି? ଏହା କେତେ ଦୂର ଯୁକ୍ତିସଙ୍ଗତ ଓ ସମାନୁପାତିକ?” ଅନ୍ୟପଟେ, ଟେଲିଗ୍ରାମ୍‌ ପକ୍ଷରୁ ବରିଷ୍ଠ ଆଇନଜୀବୀ ଧ୍ରୁବ ମେହେତା ଯୁକ୍ତି ଦେଇ କହିଥିଲେ ଯେ, ସରକାର ସମ୍ପୂର୍ଣ୍ଣ ପ୍ଲାଟଫର୍ମକୁ ବନ୍ଦ କରିବା ପରିବର୍ତ୍ତେ ନିର୍ଦ୍ଦିଷ୍ଟ ଚ୍ୟାନେଲ୍‌, ଗ୍ରୁପ୍‌ କିମ୍ବା ଅବୈଧ ବିଷୟବସ୍ତୁକୁ ହଟାଇବା ପଦକ୍ଷେପ ନେଇପାରୁଥିଲେ। ସେ କହିଥିଲେ, ଟେଲିଗ୍ରାମ୍‌ ନିଟ୍‌ ସମ୍ବନ୍ଧୀୟ ୯୦୦ରୁ ଅଧିକ ଅବୈଧ ଲିଙ୍କ୍‌ ଓ କଣ୍ଟେଣ୍ଟ ହଟାଇଛି ଏବଂ ଏଥିପାଇଁ ଏଆଇ ଓ ମେସିନ୍‌ ଲର୍ଣ୍ଣିଂ ଭିତ୍ତିକ ପ୍ରଯୁକ୍ତି ବ୍ୟବହାର କରୁଛି। ତେବେ କେନ୍ଦ୍ର ସରକାର ପକ୍ଷରୁ ସଲିସିଟର ଜେନେରାଲ୍‌ ତୁଷାର ମେହେତା କହିଥିଲେ ଯେ, ଟେଲିଗ୍ରାମ୍‌ର ବିଶେଷ ପ୍ରଯୁକ୍ତିଗତ ଗଠନ, ବଟ୍‌ ନେଟୱାର୍କ ଓ ଗୋପନୀୟତା ବୈଶିଷ୍ଟ୍ୟ ଯୋଗୁଁ ଆଇନ ପ୍ରୟୋଗକାରୀ ସଂସ୍ଥାଗୁଡ଼ିକ ପାଇଁ ଅବୈଧ କାର୍ଯ୍ୟକଳାପ ରୋକିବା କଷ୍ଟକର ହେଉଛି। ଗୋଟିଏ ବଟ୍‌ କିମ୍ବା ଚ୍ୟାନେଲ୍‌ ବନ୍ଦ ହେଲେ ମଧ୍ୟ ତାହା ତୁରନ୍ତ ଅନ୍ୟ ଚ୍ୟାନେଲ୍‌କୁ ସ୍ଥାନାନ୍ତର ହୋଇପାରୁଛି। ଏହା ପ୍ରଶ୍ନପତ୍ର ଲିକ୍‌ ଓ ଭୁଲ୍‌ ସୂଚନା ପ୍ରସାରକୁ ରୋକିବାରେ ବଡ଼ ବାଧା ବୋଲି ସେ ଦାବି କରିଥିଲେ। ସରକାର କହିଛନ୍ତି ଯେ, ଏହି କଟକଣା ସ୍ଥାୟୀ ନୁହେଁ ବରଂ ଜୁନ୍‌ ୨୧ରେ ହେବାକୁ ଥିବା ନିଟ୍‌ ପୁନଃପରୀକ୍ଷାକୁ କେନ୍ଦ୍ର କରି ଜୁନ୍‌ ୨୨ ପର୍ଯ୍ୟନ୍ତ ଅସ୍ଥାୟୀ ଭାବେ ଲାଗୁ କରାଯାଇଛି। ଶୁଣାଣି ସମୟରେ ଆଟର୍ଣ୍ଣି ଜେନେରାଲ୍‌ ଆର୍‌. ଭେଙ୍କଟରମଣୀ ମଧ୍ୟ ଟେଲିଗ୍ରାମ୍‌ର ପ୍ରଯୁକ୍ତିଗତ ଗଠନକୁ ନେଇ ପ୍ରଶ୍ନ ଉଠାଇଥିଲେ। ସେ କହିଥିଲେ, ଯଦି ଏକ ପ୍ଲାଟଫର୍ମ ନିଜ ଦାୟିତ୍ୱ ପାଳନ କରିପାରୁନାହିଁ, ତେବେ ସେ ସମାନୁପାତିକତାର ଯୁକ୍ତି ଦେଇପାରିବ ନାହିଁ। ଏପରିକି ଟେଲିଗ୍ରାମ୍‌ର ସିଇଓ ପାଭେଲ୍‌ ଦୁରୋଭ୍‌ ସରକାରଙ୍କ ଏହି ପଦକ୍ଷେପକୁ ସମାଲୋଚନା କରି କହିଛନ୍ତି ଯେ, ଏହା ଲକ୍ଷାଧିକ ସାଧାରଣ ବ୍ୟବହାରକାରୀଙ୍କୁ ଦଣ୍ଡିତ କରୁଛି, ଯେଉଁମାନେ ପ୍ରଶ୍ନପତ୍ର ଲିକ୍‌ ସହ ଜଡ଼ିତ ନୁହନ୍ତି। ସେ ଦାବି କରିଛନ୍ତି ଯେ, ଟେଲିଗ୍ରାମ୍‌ ଅବୈଧ କଣ୍ଟେଣ୍ଟ ହଟାଇବା ଓ ଭୁଲ୍‌ ସୂଚନା ରୋକିବା ପାଇଁ ସକ୍ରିୟ ପଦକ୍ଷେପ ନେଇଆସୁଛି। ବର୍ତ୍ତମାନ ଏହି ମାମଲାରେ ହାଇକୋର୍ଟଙ୍କ ରାୟକୁ ଅପେକ୍ଷା କରାଯାଉଛି। ଏହି ରାୟ କେବଳ ଟେଲିଗ୍ରାମ୍‌ର ଭାରତରେ କାର୍ଯ୍ୟକଳାପ ଉପରେ ନୁହେଁ, ବରଂ ଆଇଟି ଆଇନ ଅନୁଯାୟୀ ସରକାରଙ୍କ ଜରୁରୀକାଳୀନ ବ୍ଲକିଂ କ୍ଷମତା ଓ ଡିଜିଟାଲ୍‌ ଅଧିକାରର ସୀମା ନିର୍ଦ୍ଧାରଣରେ ମଧ୍ୟ ଗୁରୁତ୍ୱପୂର୍ଣ୍ଣ ହେବ।