ନିଜ ଜୀବନୀ ଆଧାରିତ ସର୍ଟ ଫିଲ୍ମ ନିର୍ମାଣକୁ ନେଇ ପ୍ରଯୋଜକଙ୍କ ବିରୋଧରେ ପୁଲିସର ଦ୍ୱାରସ୍ଥ ହେଲେ ଦାନ ମାଝୀ

ନିଜ ଜୀବନୀ ଆଧାରିତ ଶର୍ଟ ଫିଲ୍ମ ନିର୍ମାଣକୁ ନେଇ ପ୍ରଯୋଜକଙ୍କ ବିରୋଧରେ ପୁଲିସର ଦ୍ୱାରସ୍ଥ ହେଲେ ଦାନ ମାଝୀ

​୨୦୧୬ ମସିହାରେ ଆମ୍ବୁଲାନ୍ସ ନପାଇ ନିଜ ମୃତ ସ୍ତ୍ରୀଙ୍କ ଶବକୁ କାନ୍ଧରେ ବୋହି ପ୍ରାୟ ୧୦ କିଲୋମିଟର ଚାଲିଚାଲି ଯିବାର ଦୁଃଖଦ ଘଟଣାକୁ ନେଇ ସାରା ଦେଶରେ ଚର୍ଚ୍ଚାର ବିଷୟ ପାଲଟିଥିଲେ କଳାହାଣ୍ଡିର ଦାନ ମାଝୀ। ବର୍ତ୍ତମାନ ତାଙ୍କର ଏହି ସଂଘର୍ଷପୂର୍ଣ୍ଣ ଜୀବନୀକୁ ଆଧାର କରି ନିର୍ମାଣ କରାଯାଉଥିବା ଏକ ଶର୍ଟ ଫିଲ୍ମ (ଲଘୁ ଚଳଚ୍ଚିତ୍ର)କୁ ନେଇ ବିବାଦ ସୃଷ୍ଟି ହୋଇଛି। ନିଜ ଜୀବନର ଏହି ଅତ୍ୟନ୍ତ ସଂବେଦନଶୀଳ ଘଟଣାକୁ ନେଇ ତିଆରି ହେଉଥିବା ଚଳଚ୍ଚିତ୍ରର ପ୍ରଯୋଜକଙ୍କ ବିରୋଧରେ ଦାନ ମାଝୀ ଥାନାରେ ଏକ ଲିଖିତ ଅଭିଯୋଗ ଦାଖଲ କରିଛନ୍ତି। ଅଭିଯୋଗ ଅନୁଯାୟୀ, ତାଙ୍କର କୌଣସି ପୂର୍ବ ଅନୁମତି କିମ୍ବା ସମ୍ମତି ନନେଇ ପ୍ରଯୋଜକ ଜଣକ ଏହି ଶର୍ଟ ଫିଲ୍ମ ନିର୍ମାଣ କରିଛନ୍ତି। ନିଜର ଅସହାୟତା ଓ ଦୁଃଖଦ ଅତୀତକୁ ବ୍ୟବସାୟିକ ଫାଇଦା ପାଇଁ ବ୍ୟବହାର କରାଯାଉଥିବା ଦର୍ଶାଇ ସେ ଗଭୀର କ୍ଷୋଭ ପ୍ରକାଶ କରିଛନ୍ତି। ଏହି ଘଟଣାରେ ପୁଲିସ ତୁରନ୍ତ ହସ୍ତକ୍ଷେପ କରି ସମ୍ପୃକ୍ତ ପ୍ରଯୋଜକଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି।