ମହାମହିମ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ଗସ୍ତ ଅବସରରେ ମୁଖ୍ୟମନ୍ତ୍ରୀଙ୍କ ସ୍ୱାଗତ ଅଭିଭାଷଣ

ରାଇଙ୍ଗପୁର: ଆଜିର ଏହି ମୁହୂର୍ତ୍ତଟି ଓଡ଼ିଶା ଇତିହାସର ଏକ ସ୍ୱର୍ଣ୍ଣାଭ କ୍ଷଣ। ଏହି ଐତିହାସିକ ଦିନ ଓଡ଼ିଶା ଇତିହାସରେ ଏକ ଗୌରବମୟ ଅଧ୍ୟାୟ ଭାବେ ସଦା ସ୍ମରଣୀୟ ହୋଇ ରହିବ। ଗୋଟିଏ ମଞ୍ଚରେ ଦେଶର ମହାମହିମ ରାଷ୍ଟ୍ରପତି, ପ୍ରଧାନମନ୍ତ୍ରୀ, ରାଜ୍ୟପାଳ ତଥା ମୁଖ୍ୟମନ୍ତ୍ରୀଙ୍କ ଉପସ୍ଥିତି ନିଶ୍ଚୟ ଭାବେ ଓଡ଼ିଶା ପାଇଁ ଗର୍ବର କ୍ଷଣ। ସର୍ବପ୍ରଥମେ ମହାମହିମ ରାଷ୍ଟ୍ରପତିଙ୍କ ୬୮ତମ ଜନ୍ମଦିନରେ ମୋର ହୃଦୟପୂର୍ଣ୍ଣ ଶୁଭେଚ୍ଛା ଓ ଅଭିନନ୍ଦନ ଜଣାଉଛି। ଏହି ଅବସରରେ ସାଢେ ଚାରି କୋଟି ଓଡ଼ିଶାବାସୀଙ୍କ ପକ୍ଷରୁ ମୁଁ ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କୁ ସ୍ୱାଗତ କରୁଛି। ଆପଣଙ୍କ ସମଗ୍ର ଜୀବନ ମାତୃଭୂମି ସେବାରେ ଉତ୍ସର୍ଗୀକୃତ। ତ୍ୟାଗ, ସେବା ଓ ସମର୍ପଣର ଆପଣ ମୂର୍ତ୍ତିମାନ ପ୍ରତୀକ। ଆପଣଙ୍କ ସରଳ ଓ ଶାନ୍ତ ଜୀବନ ଆଧ୍ୟାତ୍ମିକ ଶକ୍ତିର ଏକ ଉତ୍କୃଷ୍ଟ ଦୃଷ୍ଟାନ୍ତ। ମୟୂରଭଞ୍ଜର ଏକ ଅନାମ ଜନଜାତି ଗ୍ରାମରୁ ଆରମ୍ଭ କରି ଭାରତର ସର୍ବୋଚ୍ଚ ସାମ୍ବିଧାନିକ ପଦବୀ ପର୍ଯ୍ୟନ୍ତ ଆପଣଙ୍କ ଯାତ୍ରା ଆପଣଙ୍କ କଠିନ ପରିଶ୍ରମ ଓ ଜନସେବାର ପ୍ରତୀକ। ଆପଣ ଦେଶର ସମସ୍ତ ମହିଳାଙ୍କ ପାଇଁ ପ୍ରେରଣାର ସ୍ରୋତ। ଏହି ପବିତ୍ର ଅବସରରେ ମୁଁ ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ଆପଣଙ୍କ ଦୀର୍ଘ ଓ ସୁସ୍ଥ ଜୀବନ ପାଇଁ ପ୍ରାର୍ଥନା କରୁଛି। ରାଇରଙ୍ଗପୁରରେ ଆୟୋଜିତ ରାଜ୍ୟ ସରକାରଙ୍କର ଦୁଇ ବର୍ଷ ପୂର୍ତ୍ତୀ କାର୍ଯ୍ୟକ୍ରମରେ ସ୍ୱାଗତ ଅଭିଭାଷଣ ଦେଇ ଏହା କହିଛନ୍ତି ମୁଖ୍ୟମନ୍ତ୍ରୀ ମୋହନ ମାଝି । ସେହିପରି ମୁଖ୍ୟମନ୍ତ୍ରୀ କହିଛନ୍ତି ପ୍ରଧାନମନ୍ତ୍ରୀଙ୍କ ଉପସ୍ଥିତି ଏହି ଅବସରକୁ ଆହୁରି ଗୌରବମୟ କରିଛି। ମୁଁ ସମସ୍ତ ଓଡ଼ିଶାବାସୀଙ୍କ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ହୃଦୟପୂର୍ବକ ଧନ୍ୟବାଦ ଜଣାଉଛି। ଆମ ସରକାରଙ୍କ ଦୁଇ ବର୍ଷ ପୂର୍ତ୍ତି ଅବସରରେ ଆପଣଙ୍କ ଉପସ୍ଥିତି ପାଇଁ ମୁଁ କୃତଜ୍ଞତା ପ୍ରକାଶ କରୁଛି। ଆପଣ ଶପଥ ଗ୍ରହଣ ସମାରୋହରୁ ଆରମ୍ଭ କରି ଆଜି ପର୍ଯ୍ୟନ୍ତ ଅନେକଥର ଓଡ଼ିଶା ଆସିଛନ୍ତି । ପ୍ରତ୍ୟେକଥର ଓଡ଼ିଶାକୁ ବିକାଶର ନୂତନ ଉପହାର ଦେଇଛନ୍ତି। ଆପଣଙ୍କ ସହଯୋଗ ଓ ଆଶୀର୍ବାଦ ଓଡ଼ିଶା ପାଇଁ ଏକ ମହାନ ସମ୍ପଦ। ଗତ ୧୨ ବର୍ଷ ଦେଶ ପାଇଁ ଅଦ୍ୱିତୀୟ ସମୟ ଥିଲା। ୨୦୧୪ ପରେ ଆରମ୍ଭ ହୋଇଥିବା ଯୋଜନାଗୁଡ଼ିକ ଦେଶର ପ୍ରତ୍ୟେକ ବର୍ଗକୁ ଲାଭାନ୍ୱିତ  କରିଛି। ତେଣୁ ମୁଁ କହିପାରେ “There is a little bit of Modi in everyone’s life” ଗତ ଦୁଇ ବର୍ଷରେ ଆମ ସରକାର ତ୍ୱରିତ ଗତିରେ ଅନେକ କଲ୍ୟାଣକାରୀ ଯୋଜନା ଲାଗୁ କରିଛି । ସୁଭଦ୍ରା ଯୋଜନା, କନ୍ୟା ବିବାହ ଯୋଜନା, କନ୍ୟା ସୁମଙ୍ଗଳ ଯୋଜନା, କୃଷକ ସମୃଦ୍ଧି ଯୋଜନା, ଗୋଦାବରୀଶ ମିଶ୍ର ଆଦର୍ଶ ପ୍ରାଥମିକ ବିଦ୍ୟାଳୟ, ଜଗନ୍ନାଥ ଦର୍ଶନ ଯୋଜନା ଏବଂ ଆୟୁଷ୍ମାନ ଯୋଜନା। ଆମେ KG ଠାରୁ PG ପର୍ଯ୍ୟନ୍ତ ମାଗଣା ଶିକ୍ଷା ନିଷ୍ପତ୍ତି ନେଇଛୁ, ଯାହା ଦେଶରେ ପ୍ରଥମ ପଦକ୍ଷେପ ମଧ୍ୟରୁ ଗୋଟିଏ। ସମସ୍ତ ଶିକ୍ଷା, ସ୍ୱାସ୍ଥ୍ୟ ଓ ସାମାଜିକ ସଂରକ୍ଷଣ କ୍ଷେତ୍ରରେ ଆମେ ଗୁରୁତ୍ୱପୂର୍ଣ୍ଣ ସୁଧାର କରିଛୁ। ଶିଳ୍ପ କ୍ଷେତ୍ରରେ ଓଡ଼ିଶା ଆଗକୁ ବଢ଼ୁଛି।  ମେକ ଇନ ଓଡିଶା ଅଭିଯାନ ଆମକୁ ନୂତନ ଦିଗ ଦେଇଛି। ଏପର୍ଯ୍ୟନ୍ତ ୩.୧୧ ଲକ୍ଷ କୋଟି ଟଙ୍କାର ୧୫୨ଟି ପ୍ରକଳ୍ପ ହୋଇଛି, ଯାହାରୁ ୨.୫ ଲକ୍ଷରୁ ଅଧିକ ନିଯୁକ୍ତି ସୃଷ୍ଟି ହୋଇଛି।  ଆମ ଲକ୍ଷ୍ୟ ଓଡ଼ିଶାରୁ ବାହାରକୁ ମାଇଗ୍ରେସନ ନୁହେଁ, ବରଂ ରିଭର୍ସ ମାଇଗ୍ରେସନ। ରେଳ, ସଡ଼କ, ବନ୍ଦର ଓ ଶିଳ୍ପ କ୍ଷେତ୍ରରେ କେନ୍ଦ୍ର ସରକାରଙ୍କ ଅନେକ ଅବଦାନ ଓଡ଼ିଶାର ବିକାଶକୁ ତ୍ୱରାନ୍ୱିତ କରିଛି। ଗତ ଦୁଇ ବର୍ଷରେ ଆମ ସରକାର ମହିଳା, ଗରିବ, କୃଷକ, ଯୁବବର୍ଗ, SC,ST  ଓ ପଛୁଆ ବର୍ଗ ପାଇଁ ଅନେକ ଯୋଜନା ଆରମ୍ଭ କରିଛି। ଓଡ଼ିଶା ଆଜି ନିବେଶକଙ୍କ ପ୍ରଥମ ପସନ୍ଦ ହୋଇଛି। ଆମର ପ୍ରତିଶ୍ରୁତି ୨୦୩୬ ସୁଦ୍ଧା ସମୃଦ୍ଧ ଓଡ଼ିଶା ଗଢ଼ିବା। ଶେଷରେ, ମୁଁ କହିବି ଭାରତ ଏବେ ବିଶ୍ୱମଞ୍ଚରେ ଶକ୍ତିଶାଳୀ ଭାବେ ଉଭୟ ଭୂମିକା ନିଭାଉଛି। ଆମେ ଏକାସାଥି ହୋଇ ଚାଲି “ବିକଶିତ ଓଡ଼ିଶା, ବିକଶିତ ଭାରତର ସ୍ୱପ୍ନକୁ ସାକାର କରିବୁ କହିଛନ୍ତି ମୁଖ୍ୟମନ୍ତ୍ରୀ  ମୋହନ ମାଝୀ ।