ଜନ୍ମମାଟିକୁ ଫେରିଲେ ଚେନ୍ନାଇ ଗ୍ୟାସ ଲିକ୍ର ମୃତକ; ଶ୍ରଦ୍ଧାଞ୍ଜଳି ଜଣାଇଲେ ମୁଖ୍ୟମନ୍ତ୍ରୀ

କେନ୍ଦୁଝର : ସ୍ୱପ୍ନ ନେଇ ଯାଇଥିଲେ, ନିରବ ହୋଇ ଫେରିଲେ । ଶୋକାକେଳୁ ପରିବେଶ  କେନ୍ଦୁଝର ଜିଲ୍ଲା ବାଂଶପାଳ ବ୍ଲକ କୋଡ଼ିପଷା ଗାଁ। ଚେନ୍ନାଇର ଆମୋନିଆ ଗ୍ୟାସ ଲିକ୍ ଦୁର୍ଘଟଣାରେ ପ୍ରାଣ ହରାଇଥିବା ୫ ଜଣ ଓଡ଼ିଆ ମହିଳା ଶ୍ରମିକଙ୍କ ମୃତଦେହ ଗାଁକୁ ପହଞ୍ଚିବା ପରେ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି। ଏହି ମଧ୍ୟରେ ଫୁଲମଣି ଜୁଆଙ୍ଗଙ୍କ ମୃତଦେହ ମଧ୍ୟ ଘରକୁ ପହଞ୍ଚିଛି। ରୋଜଗାର କରି ପରିବାରର ଦୁଃଖ ଦୂର କରିବା ସ୍ୱପ୍ନ ନେଇ ଚେନ୍ନାଇ ଯାଇଥିବା ଫୁଲମଣି ମାତ୍ର ତିନି ମାସ ପରେ ନିରବ ହୋଇ ଫେରିଛନ୍ତି। ଜନ୍ମମାଟିରେ ଆଜି ତାଙ୍କ ସହିତ ଅନ୍ୟ ମୃତକମାନଙ୍କ ଅନ୍ତିମ ସଂସ୍କାର ହେବାକୁ ଯାଉଛି। ବାଂଶପାଳ ବ୍ଲକର କୋଡ଼ିପଷା ଗାଁରେ ଫୁଲମଣିଙ୍କ ପରିବାର ଉପରେ ଦୁଃଖର ପାହାଡ଼ ଭାଙ୍ଗି ପଡ଼ିଛି। ପୂର୍ବରୁ ବାପାଙ୍କ ମୃତ୍ୟୁ, ଦୁଇ ଭଉଣୀଙ୍କ ବିବାହ ପରେ ଆର୍ଥିକ ସମସ୍ୟାରେ ପରିବାର ଚାଲୁଥିଲା। ଏହି କାରଣରୁ ଫୁଲମଣି ଚେନ୍ନାଇ ଯାଇ ଚାକିରି କରୁଥିଲେ। ସୂଚନା ଅନୁସାରେ ତାମିଲନାଡୁର ତିରୁଭଲ୍ଲୁର ଅଞ୍ଚଳରେ ଥିବା କମ୍ପାନୀର କୁଲିଂ ପ୍ଲାଣ୍ଟରୁ ହଠାତ୍ ଆମୋନିଆ ଗ୍ୟାସ ଲିକ୍ ହୋଇଥିଲା। ବିଷାକ୍ତ ଗ୍ୟାସର ପ୍ରଭାବରେ ୭ ଜଣ ଓଡ଼ିଆ ମହିଳା ଶ୍ରମିକଙ୍କ ମୃତ୍ୟୁ ଘଟିଥିଲା, ଯାହା ମଧ୍ୟରୁ ୫ ଜଣଙ୍କ ମୃତଦେହ ଓଡ଼ିଶାକୁ ଫେରିଛି। ମୃତଦେହଗୁଡ଼ିକ ଭୁବନେଶ୍ୱର ସ୍ୱତନ୍ତ୍ର କାର୍ଗୋ ବିମାନରେ ପହଞ୍ଚିବା ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସହ ମନ୍ତ୍ରିପରିଷଦ ସଦସ୍ୟମାନେ ଶ୍ରଦ୍ଧାଞ୍ଜଳି ଜଣାଇଥିଲେ। ସରକାର ପକ୍ଷରୁ ପୂର୍ବରୁ ଘୋଷିତ ୪ ଲକ୍ଷ ଟଙ୍କା ସହାୟତାକୁ ବୃଦ୍ଧି କରି ୧୦ ଲକ୍ଷ ଟଙ୍କା କରାଯାଇଛି। ଜନ୍ମମାଟି କୋଡ଼ିପଷା ଗାଁରେ ଫୁଲମଣି ଓ ଅନ୍ୟ ମୃତକମାନଙ୍କ ଅନ୍ତିମ ସଂସ୍କାର ପାଇଁ ପ୍ରସ୍ତୁତି ଚାଲିଛି। ସମଗ୍ର ଅଞ୍ଚଳ ଶୋକର ଛାୟା ଖେଳି ଯାଇଥିବା ବେଳେ ଏହି ଘଟଣା ପ୍ରବାସୀ ଶ୍ରମିକଙ୍କ ସୁରକ୍ଷା ଓ କାର୍ଯ୍ୟସ୍ଥଳ ନିରାପତ୍ତାକୁ ନେଇ ଗମ୍ଭୀର ପ୍ରଶ୍ନ ଉଠାଇଛି।