ସୀମାବର୍ତ୍ତୀରେ ଓଡ଼ିଆ ଭାଷା ଅବହେଳିତ, ନୂଆ ପୁସ୍ତକରେ ତ୍ରୁଟି! ତଦନ୍ତ ଦାବି କଲା ବିଜେଡି

ଭୁବନେଶ୍ୱର: ସୀମାବର୍ତ୍ତୀ ଓ ବିଚ୍ଛିନ୍ନାଞ୍ଚଳ ଜିଲ୍ଲାଗୁଡ଼ିକରେ ଓଡ଼ିଆ ଭାଷାଭାଷୀ ଲୋକଙ୍କ ଅବହେଳା ହେଉଥିବା ଅଭିଯୋଗ କରି ରାଜ୍ୟ ସରକାରଙ୍କୁ କଟାକ୍ଷ କରିଛି ବିଜେଡି। ଦଳର ମୁଖପାତ୍ର ଲେନିନ୍ ମହାନ୍ତି କହିଛନ୍ତି ଯେ ସୀମାବର୍ତ୍ତୀ ଜିଲ୍ଲାଗୁଡ଼ିକରେ ଓଡ଼ିଆ ଭାଷାର ସୁରକ୍ଷା ଓ ପ୍ରଚାର ପାଇଁ ୬୫୨ ଜଣ ଶିକ୍ଷକ ଓ ୧୧ ଜଣ ପର୍ଯ୍ୟବେକ୍ଷକ କାର୍ଯ୍ୟ କରୁଥିଲେ ମଧ୍ୟ ସେମାନଙ୍କୁ ଗତ ଦୁଇ ବର୍ଷ ଧରି ଦରମା ମିଳିନଥିବା ଅଭିଯୋଗ ମଧ୍ୟ ଉଠାଇଛନ୍ତି। ଲେନିନ ମହାନ୍ତିଙ୍କ ଅଭିଯୋଗ ଅନୁସାରେ, ଶିକ୍ଷକ ଓ ପର୍ଯ୍ୟବେକ୍ଷକମାନେ ନିଜ ସମସ୍ୟା ନେଇ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ ମଧ୍ୟ କୌଣସି ସମାଧାନ ହୋଇନାହିଁ। ଫଳରେ ଓଡ଼ିଆ ଭାଷାର ସୁରକ୍ଷା ପାଇଁ କାର୍ଯ୍ୟ କରୁଥିବା କର୍ମଚାରୀମାନେ ଆର୍ଥିକ ସଙ୍କଟର ସମ୍ମୁଖୀନ ହେଉଛନ୍ତି। ସେହିପରି, ନୂଆ ଶିକ୍ଷା ନୀତି (NEP) ଲାଗୁ ହେବା ପରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ପାଠ୍ୟପୁସ୍ତକରେ ବ୍ୟାପକ ତ୍ରୁଟି ଥିବା ଅଭିଯୋଗ ନେଇ ଶିକ୍ଷା ମହଳରେ ଚିନ୍ତା ପ୍ରକାଶ ପାଇଛି। ଲେନିନ କହିଛନ୍ତି ଯେ ଛାତ୍ରଛାତ୍ରୀଙ୍କ ପାଇଁ ପ୍ରସ୍ତୁତ ହେଉଥିବା  ପାଠ୍ୟପୁସ୍ତକଗୁଡ଼ିକରେ ମୋଟ ୧୬୬୮ଟି ତ୍ରୁଟି ଚିହ୍ନଟ ହୋଇଛି। ଅଷ୍ଟମ ଶ୍ରେଣୀର ପାଠ୍ୟପୁସ୍ତକରେ ମାତ୍ର ୭୦୮ଟି ତ୍ରୁଟି ରହିଥିବା ସେ ଦାବି କରିଛନ୍ତି। ଏହାକୁ ନେଇ ପ୍ରାଥମିକ ଶିକ୍ଷକ ସଂଘ ଓ ବିଜେଡି ପକ୍ଷରୁ ଉଦ୍ବେଗ ପ୍ରକାଶ କରାଯାଇଛି। ପ୍ରାଥମିକ ଶିକ୍ଷକ ସଂଘର ସଭାପତି କହିଛନ୍ତି ଯେ, ଛାତ୍ରଛାତ୍ରୀଙ୍କ ପାଇଁ ପ୍ରସ୍ତୁତ ପାଠ୍ୟପୁସ୍ତକରେ ଏତେ ସଂଖ୍ୟକ ତ୍ରୁଟି ରହିବା ଅତ୍ୟନ୍ତ ଦୁର୍ଭାଗ୍ୟଜନକ। ଏହା ଶିକ୍ଷାର ଗୁଣାତ୍ମକ ମାନକୁ ପ୍ରଭାବିତ କରିବା ସହ ଛାତ୍ରଛାତ୍ରୀଙ୍କ ଶିକ୍ଷା ଉପରେ ମଧ୍ୟ କୁପ୍ରଭାବ ପକାଇବ ବୋଲି ସେ ମତ ପ୍ରକାଶ କରିଛନ୍ତି। ସଂଘ ପକ୍ଷରୁ ଆହୁରି ଅଭିଯୋଗ କରାଯାଇଛି ଯେ, ପାଠ୍ୟପୁସ୍ତକ ପ୍ରସ୍ତୁତି କାର୍ଯ୍ୟରେ ସରକାରୀ ବ୍ୟବସ୍ଥାକୁ ଏଡ଼ାଇ କିଛି ଘରୋଇ ସ୍କୁଲର ଶିକ୍ଷକଙ୍କୁ ସାମିଲ କରାଯାଇଥିଲା। ଏହା ଯୋଗୁଁ ପୁସ୍ତକରେ ବହୁ ଭୁଲ ରହିଯାଇଥିବା ଅଭିଯୋଗ ଉଠିଛି। ଏହି ପ୍ରସଙ୍ଗରେ ବିଜେଡି ମୁଖପାତ୍ର ଲେନିନ୍ ମହାନ୍ତି ମଧ୍ୟ ରାଜ୍ୟ ସରକାରଙ୍କୁ ଘେରିଛନ୍ତି। ଓଡ଼ିଆ ଅସ୍ମିତାର କଥା କହୁଥିବା ସରକାରଙ୍କ ଅମଳରେ ଏଭଳି ଭୁଲ କିପରି ଘଟିଲା। ସେ State Council of Educational Research and Training (SCERT)ର ନିର୍ଦ୍ଦେଶକ ଓ ଉପନିର୍ଦ୍ଦେଶକଙ୍କ ଭୂମିକା ନେଇ ମଧ୍ୟ ପ୍ରଶ୍ନ ଉଠାଇଛନ୍ତି। ସରକାର କଣ ଓଡ଼ିଆ ଭାଷା କୁ ମାରିଦେବା କୁ ଚାହୁଁଛନ୍ତି କି! ଏଭଳି ତ୍ରୁଟି କୁ ତୁରନ୍ତ ସୁଧାର ଆଣନ୍ତୁ।  ପାଠ୍ୟପୁସ୍ତକରେ ତ୍ରୁଟି ପାଇଁ କେଉଁ ଅଧିକାରୀ ଦାୟୀ, ତାହାର ତୁରନ୍ତ ତଦନ୍ତ କରାଯାଇ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି। ଏହା ସହିତ ଯୁଦ୍ଧକାଳୀନ ଭିତ୍ତିରେ ସମସ୍ତ ତ୍ରୁଟି ସଂଶୋଧନ କରି ନୂତନ ପୁସ୍ତକ ଛାତ୍ରଛାତ୍ରୀଙ୍କୁ ଯୋଗାଇ ଦେବାକୁ ମଧ୍ୟ ଦାବି କରାଯାଇଛି। ବିଜେଡି ଦାବି କରିଛି ଯେ ପାଠ୍ୟପୁସ୍ତକରେ ଥିବା ସମସ୍ତ ତ୍ରୁଟିକୁ ତୁରନ୍ତ ସୁଧାରାଯାଉ ଏବଂ ସୀମାବର୍ତ୍ତୀ ଜିଲ୍ଲାରେ ଓଡ଼ିଆ ଭାଷାର ସୁରକ୍ଷା ପାଇଁ କାର୍ଯ୍ୟରତ ଶିକ୍ଷକ ଓ ପର୍ଯ୍ୟବେକ୍ଷକଙ୍କ ବକେୟା ଦରମା ଶୀଘ୍ର ପ୍ରଦାନ କରାଯାଉ।