ଇଞ୍ଜିନିୟର ମୃତ୍ୟୁ ମାମଲାରେ ନୂଆ ମୋଡ଼: ଦୁଇଟି ଅଲଗା କାଳିରେ ଲେଖାଯାଇଛି ସୁଇସାଇଡ୍ ନୋଟ୍,

ବାଲେଶ୍ୱର: ବାଲେଶ୍ୱରରେ ଓଡ଼ିଶାର ଜଣେ ୩୪ ବର୍ଷୀୟ ଇଞ୍ଜିନିୟର ରଶ୍ମିରଞ୍ଜନ ସେଠୀଙ୍କ ସନ୍ଦେହଜନକ ମୃତ୍ୟୁକୁ ନେଇ ରହସ୍ୟ ଆହୁରି ଘନୀଭୂତ ହେବାରେ ଲାଗିଛି। ଘଟଣାସ୍ଥଳରୁ ମିଳିଥିବା ଏକ ସୁଇସାଇଡ୍ ନୋଟ୍ ଏବେ ସନ୍ଦେହକୁ ଦ୍ଵିଗୁଣିତ କରିଦେଇଛି, କାରଣ ଏହି ଚିଠିରେ ଦୁଇଟି ଭିନ୍ନ ରଙ୍ଗର କାଳି ବା ପେନ୍ ବ୍ୟବହାର କରାଯାଇଛି। ଚିଠିର ମୁଖ୍ୟ ଭାଗ ଏକ ଅଲଗା ପେନ୍‌ରେ ଲେଖାଯାଇଥିବା ବେଳେ, ଦସ୍ତଖତ ଏବଂ ତାରିଖ ଅନ୍ୟ ଏକ ପେନ୍‌ରେ କରାଯାଇଛି। ଏହାକୁ ନେଇ ପୋଲିସ ଏବେ ଫୋରେନ୍ସିକ୍ ତଦନ୍ତ ପାଇଁ ଚିଠିକୁ ପଠାଇଛି।

​ହତ୍ୟା ଅଭିଯୋଗ ଆଣିଲେ ପରିବାର:

ଜଗତସିଂହପୁରର ବାସିନ୍ଦା ତଥା କଟକରେ କାର୍ଯ୍ୟରତ ଇଞ୍ଜିନିୟର ରଶ୍ମିରଞ୍ଜନ, ଜୁଲାଇ ୧୬ ତାରିଖ ରାତିରେ ବାଲେଶ୍ୱରରେ ସରକାରୀ ଇଞ୍ଜିନିୟର ଥିବା ନିଜ ପତ୍ନୀ ରଶ୍ମି ରେଖାଙ୍କୁ ଜନ୍ମଦିନର ସରପ୍ରାଇଜ୍ ଦେବାକୁ ଆସିଥିଲେ। ମାତ୍ର ସେଠାରେ ତାଙ୍କର ଝୁଲନ୍ତା ମୃତଦେହ ମିଳିଥିଲା। ରଶ୍ମିରଞ୍ଜନଙ୍କ ପରିବାର ଏହାକୁ ଆତ୍ମହତ୍ୟା ବୋଲି ସ୍ୱୀକାର କରିନାହାନ୍ତି। ସେମାନଙ୍କ ଅଭିଯୋଗ ଅନୁସାରେ, ପତ୍ନୀଙ୍କର ଅନ୍ୟ ଜଣେ ପୁରୁଷ ବନ୍ଧୁ (ସେ ମଧ୍ୟ ଜଣେ NHM ଇଞ୍ଜିନିୟର)ଙ୍କ ସହ ପରକୀୟା ପ୍ରୀତି ଥିଲା, ଯାହାକୁ ନେଇ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ବିବାଦ ଚାଲିଥିଲା। ପରିବାର ଲୋକେ ସହଦେବଖୁଣ୍ଟା ଥାନାରେ ପତ୍ନୀ ଏବଂ ତାଙ୍କ ପୁରୁଷ ବନ୍ଧୁଙ୍କ ବିରୋଧରେ ହତ୍ୟା ମାମଲା ରୁଜୁ କରିଛନ୍ତି। ​ମୃତଦେହର ବେକ ଓ କାନ ପାଖରେ ଆଘାତର ଚିହ୍ନ ଥିବାରୁ, ପ୍ରଥମେ ହତ୍ୟା କରି ପରେ ଏହାକୁ ଆତ୍ମହତ୍ୟାର ରୂପ ଦେବାକୁ ଚେଷ୍ଟା କରାଯାଇଥିବା ପରିବାର ଲୋକେ ସନ୍ଦେହ କରୁଛନ୍ତି। ବର୍ତ୍ତମାନ ପୋଲିସ ମୃତଦେହର ବ୍ୟବଚ୍ଛେଦ (Postmortem) ରିପୋର୍ଟ ଏବଂ ହାତଲେଖାର ଫୋରେନ୍ସିକ୍ ରିପୋର୍ଟକୁ ଅପେକ୍ଷା କରି ଘଟଣାର ତଦନ୍ତ ଚଳାଇଛି।