Mahabir Akhada Khela : ବାଲେଶ୍ୱରରେ ମହାବୀର ଆଖଡ଼ାର ଜଲୱା

ବୀରାଷ୍ଟମୀ ଅବସରରେ ଆରମ୍ଭ ହୋଇଛି ବାଲେଶ୍ୱରର ପ୍ରସିଦ୍ଧ ମହାବୀର ଆଖଡ଼ା ଖେଳ। ମହାବୀର ମନ୍ଦିର ପରିସରରେ ବିଭିନ୍ନ ପୂଜା ମଣ୍ଡପରୁ ଗୋଟିଏ ପରେ ଗୋଟିଏ ଆଖଡ଼ା ଦଳ ପହଞ୍ଚି ନିଜ ନିଜର କଳାକୌଶଳ ଓ ନୈପୁଣ୍ୟ ପ୍ରଦର୍ଶନ କରିଛନ୍ତି |ବାଲେଶ୍ୱରର ଐତିହ୍ୟ, ପରମ୍ପରା ଓ ସଂସ୍କୃତିର ପ୍ରତୀକ ଏହି ଆଖଡ଼ା ଖେଳକୁ ଦେଖିବା ପାଇଁ ମହାବୀର ମନ୍ଦିର ପରିସରରେ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଛି | ଆଖଡ଼ା ଦଳଗୁଡ଼ିକର ଚିତ୍ତାକର୍ଷକ କଳାକୌଶଳ ଦର୍ଶକଙ୍କ ମନ ମୋହିଥିବା ବେଳେ ପାରମ୍ପରିକ ଉତ୍ସବର ଉତ୍ସାହରେ ମୁଖରିତ ହୋଇଉଠିଛି ସମଗ୍ର ପରିବେଶ | ଏହି ପାରମ୍ପରିକ ଆଖଡ଼ା ଖେଳକୁ ଶାନ୍ତିଶୃଙ୍ଖଳାର ସହ ସମ୍ପନ୍ନ କରିବା ପାଇଁ ପୋଲିସ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି | ଶ୍ରଦ୍ଧାଳୁଙ୍କ ଭିଡ଼କୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଇଛି | ଚଳିତ ବର୍ଷ ମହାବୀର ଆଖଡ଼ା ଖେଳ ୧୦୧ ବର୍ଷରେ ପଦାର୍ପଣ କରିଛି। ଦୀର୍ଘ ବର୍ଷ ଧରି ଚାଲିଆସୁଥିବା ଏହି ପରମ୍ପରା ବାଲେଶ୍ୱରର ସାଂସ୍କୃତିକ ପରିଚୟକୁ ଆହୁରି ସମୃଦ୍ଧ କରିବା ସହ ପରବର୍ତ୍ତୀ ପିଢ଼ି ପାଇଁ ଐତିହ୍ୟ ଓ ପରମ୍ପରାର ବାର୍ତ୍ତା ବହନ କରୁଛି |