ବୈତରଣୀ ବନ୍ୟାରେ ବଳିପୁର ଗାଁ ବିଚ୍ଛିନ୍ନ, ତୁରନ୍ତ ରିଲିଫ୍ ଓ ସ୍ଥାୟୀ ସମାଧାନ ଦାବି

ଭଣ୍ଡାରିପୋଖରୀ: ବୈତରଣୀ ନଦୀର ବନ୍ୟା ଜଳରେ ଭଦ୍ରକ ଜିଲ୍ଲା ଭଣ୍ଡାରିପୋଖରୀ ବ୍ଲକ୍ ଅନ୍ତର୍ଗତ ବଳିପୁର ଗ୍ରାମର ମୁଖ୍ୟ ସଂଯୋଗ ରାସ୍ତା ସମ୍ପୂର୍ଣ୍ଣ ଧୋଇଯାଇଛି। ନଦୀ ମଧ୍ୟବର୍ତ୍ତୀ ଅଞ୍ଚଳରେ ଅବସ୍ଥିତ ଏହି ଗାଁ ବର୍ତ୍ତମାନ ବାହ୍ୟ ଜଗତରୁ ସମ୍ପୂର୍ଣ୍ଣ ବିଚ୍ଛିନ୍ନ ହୋଇପଡ଼ିଛି। ରାସ୍ତା ଯୋଗାଯୋଗ ବନ୍ଦ ହୋଇଯିବାରୁ ଗ୍ରାମବାସୀ ଜରୁରୀ ସ୍ୱାସ୍ଥ୍ୟ ସେବା, ଖାଦ୍ୟ ସାମଗ୍ରୀ ଓ ନିତ୍ୟବ୍ୟବହାର୍ଯ୍ୟ ସାମଗ୍ରୀ ପାଇବାରେ ନାନା ସମସ୍ୟାର ସମ୍ମୁଖୀନ ହେଉଛନ୍ତି। ସେପଟେ ବନ୍ୟା ଜଳ ଗାଁ ଭିତରକୁ ପ୍ରବେଶ କରିବା ସହ ଚାଷଜମି ଜଳମଗ୍ନ ହୋଇଯାଇଥିବାରୁ ଫସଲର ବ୍ୟାପକ କ୍ଷତି ଘଟିଛି। ଫଳରେ ଜୀବିକା ହରାଇ ଚିନ୍ତାରେ ଚାଷୀ। ସ୍ଥାନୀୟ ଲୋକଙ୍କ କହିବା ଅନୁଯାୟୀ, ପ୍ରତିବର୍ଷ ବନ୍ୟା ସମୟରେ ଏଭଳି ପରିସ୍ଥିତି ସୃଷ୍ଟି ହେଉଥିଲେ ମଧ୍ୟ ରାସ୍ତାର ସ୍ଥାୟୀ ସୁରକ୍ଷା ବ୍ୟବସ୍ଥା କିମ୍ବା ପ୍ରତିକାର କରାଯାଉନାହିଁ। ଫଳରେ ପ୍ରତିବର୍ଷ ଗାଁବାସୀଙ୍କୁ ସମାନ ଦୁର୍ଦ୍ଦଶାର ସମ୍ମୁଖୀନ ହେବାକୁ ପଡ଼ୁଛି। ଗ୍ରାମବାସୀମାନେ ପ୍ରଶାସନ ନିକଟରେ ତୁରନ୍ତ ରିଲିଫ୍ ସାମଗ୍ରୀ ପହଞ୍ଚାଇବା, ଭଙ୍ଗା ରାସ୍ତାର ଶୀଘ୍ର ମରାମତି, କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ଓ ଗୃହହରା ପରିବାରଙ୍କୁ ସରକାରୀ ସହାୟତା ଯୋଗାଇବା ସହ ଏହି ସମସ୍ୟାର ସ୍ଥାୟୀ ସମାଧାନ ପାଇଁ ପଦକ୍ଷେପ ନେବାକୁ ଦାବି କରିଛନ୍ତି।