ସହରାଞ୍ଚଳର ଦୁର୍ବଳ ବର୍ଗଙ୍କ ପାଇଁ ‘ସହଯୋଗ’ କାର୍ଯ୍ୟକ୍ରମକୁ ଆହୁରି ସୁଦୃଢ଼ କରିବାକୁ କର୍ମଶାଳା

ଭୁବନେଶ୍ୱର: ସହରାଞ୍ଚଳରେ ବସବାସ କରୁଥିବା ଆର୍ଥିକ ଦୃଷ୍ଟିରୁ ଦୁର୍ବଳ ଏବଂ ବଞ୍ଚିତ ବର୍ଗର ଲୋକମାନଙ୍କୁ ବିଭିନ୍ନ ସରକାରୀ କଲ୍ୟାଣକାରୀ ଯୋଜନା ସହ ଯୋଡ଼ିବା ଲକ୍ଷ୍ୟରେ ଗୃହ ଓ ନଗର ଉନ୍ନୟନ ବିଭାଗ, ଟାଟା ଷ୍ଟିଲ୍ ଫାଉଣ୍ଡେସନର ସହଯୋଗରେ ପରିଚାଳନା କରୁଥିବା ‘ସହଯୋଗ’ କାର୍ଯ୍ୟକ୍ରମ ଏବେ ହଜାର ହଜାର ପରିବାରଙ୍କ ପାଇଁ ଆଶାର ସେତୁ ପାଲଟିଛି। ଏହି କାର୍ଯ୍ୟକ୍ରମକୁ ଆହୁରି ପ୍ରଭାବଶାଳୀ କରିବା ଉଦ୍ଦେଶ୍ୟରେ ଆଜି ଭୁବନେଶ୍ୱରସ୍ଥିତ ଓଡ଼ିଶା ଅର୍ବାନ୍ ଏକାଡେମୀରେ ତୃଣମୂଳ ସ୍ତରରେ କାର୍ଯ୍ୟରତ ଫ୍ରଣ୍ଟଲାଇନ୍ କର୍ମୀମାନଙ୍କ ପାଇଁ ଏକ ଦିନିକିଆ କର୍ମଶାଳା ଆୟୋଜିତ ହୋଇଥିଲା। ଏହି ଅବସରରେ ‘ସହଯୋଗ’ ସର୍ଭେ ସମୟରେ ସାଧାରଣତଃ ପଚରାଯାଉଥିବା ପ୍ରଶ୍ନ ଓ ସେଗୁଡ଼ିକର ଉତ୍ତର ସମ୍ବଳିତ ଏକ FAQ ପୁସ୍ତିକାର ଉନ୍ମୋଚନ କରାଯାଇଥିଲା। କାର୍ଯ୍ୟକ୍ରମରେ ଗୃହ ଓ ନଗର ଉନ୍ନୟନ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ଉଷା ପାଢୀ ମୁଖ୍ୟ ଅତିଥି ଭାବେ ଯୋଗଦେଇ କହିଥିଲେ ଯେ, ‘ସହଯୋଗ’ କେବଳ ସରକାରୀ ଯୋଜନାର ସୁବିଧା ପହଞ୍ଚାଇବାରେ ସୀମିତ ନୁହେଁ, ବରଂ ସହରାଞ୍ଚଳର ଦୁର୍ବଳ ବର୍ଗଙ୍କ ଜୀବନମାନର ଉନ୍ନତିରେ ଏକ ପ୍ରଭାବଶାଳୀ ସେତୁ ଭାବେ କାର୍ଯ୍ୟ କରୁଛି। ସେ କହିଥିଲେ ଯେ, ସ୍ୱଚ୍ଛସାଥୀ, ଏସ୍.ଏ.ଜି. ସଦସ୍ୟା ଏବଂ ବସ୍ତି ବାସିନ୍ଦା ସଂଘର ସଦସ୍ୟମାନଙ୍କ ନିଷ୍ଠା, ପରିଶ୍ରମ ଓ ଲୋକଙ୍କ ସହ ନିରନ୍ତର ସମ୍ପର୍କ ଯୋଗୁଁ ଏହି କାର୍ଯ୍ୟକ୍ରମ ସଫଳତାର ସହ ଆଗକୁ ବଢ଼ିପାରିଛି। କର୍ମଶାଳାରେ ରାଜ୍ୟର ବିଭିନ୍ନ ପୌରାଞ୍ଚଳରୁ ଆସିଥିବା ସ୍ୱଚ୍ଛସାଥୀ, ଏସ୍.ଏ.ଜି. ସଦସ୍ୟା ଓ ବସ୍ତି ବାସିନ୍ଦା ସଂଘର ପ୍ରତିନିଧିମାନେ ନିଜ ଅଞ୍ଚଳରେ ‘ସହଯୋଗ’ କାର୍ଯ୍ୟକ୍ରମର ପ୍ରଭାବ ଏବଂ ଅନୁଭୂତି ସମ୍ପର୍କରେ ମତବ୍ୟକ୍ତ କରିଥିଲେ । ଏହାସହ କାର୍ଯ୍ୟକ୍ରମ ଦ୍ୱାରା ଲୋକଙ୍କ ଜୀବନଶୈଳୀରେ ଆସିଥିବା ସକାରାତ୍ମକ ପରିବର୍ତ୍ତନ ଓ ଏହାକୁ ଆହୁରି ଫଳପ୍ରସୂ କରିବା ପାଇଁ ବିଭିନ୍ନ ପରାମର୍ଶ ମଧ୍ୟ ଦେଇଥିଲେ। ଅନ୍ୟମାନଙ୍କ ମଧ୍ୟରେ ସୌରଭ ରାୟ, ଗୃହ ଓ ନଗର ଉନ୍ନୟନ ବିଭାଗର ଅତିରିକ୍ତ ଶାସନ ସଚିବ ଶତୃଘ୍ନ କର ଏବଂ ‘ସହଯୋଗ’ କାର୍ଯ୍ୟକ୍ରମର ନୋଡାଲ ଅଫିସର ସୌରିନ୍ଧ୍ର ରାଉତରାୟ ଯୋଗଦେଇ କାର୍ଯ୍ୟକ୍ରମର ଉଦ୍ଦେଶ୍ୟ, ଅଗ୍ରଗତି ଓ ଭବିଷ୍ୟତ କାର୍ଯ୍ୟଯୋଜନା ସମ୍ପର୍କରେ ଆଲୋକପାତ କରିଥିଲେ। କାର୍ଯ୍ୟକ୍ରମ ଶେଷରେ ଶ୍ରୀମତୀ ପାଢୀ ଫ୍ରଣ୍ଟଲାଇନ୍ କର୍ମୀମାନଙ୍କ ସହ ସିଧାସଳଖ ଆଲୋଚନା କରି ସେମାନଙ୍କ ଅଭିଜ୍ଞତା ଓ ପରାମର୍ଶକୁ ଗୁରୁତ୍ୱର ସହ ବିଚାର କରିବା ପାଇଁ ବିଭାଗୀୟ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। କର୍ମଶାଳାରେ ‘ସହଯୋଗ’ ରାଜ୍ୟ ମୁଖ୍ୟାଳୟର ଶିଶିର ରଞ୍ଜନ ଦାଶଙ୍କ ସମେତ ବିଭିନ୍ନ ପୌରାଞ୍ଚଳର ପ୍ରତିନିଧି ଏବଂ କର୍ମଚାରୀମାନେ ଉପସ୍ଥିତ ଥିଲେ।