ତେନ୍ଦୁଲକରଙ୍କ ରେକର୍ଡ ଭାଙ୍ଗିପାରନ୍ତି,କିନ୍ତୁ ୧୪ ବର୍ଷୀୟ ଖେଳାଳୀଙ୍କ ରେକର୍ଡ ଭାଙ୍ଗିପାରିବେନି ବୈଭବ

ସଚିନ ତେନ୍ଦୁଲକରଙ୍କ ୩୭ ବର୍ଷର ରେକର୍ଡ ଭାଙ୍ଗିଲେ ବୈଭବ। ୧୬ ବର୍ଷ୨୦୫ ଦିନରେ କରାଚିରେ ପାକିସ୍ତାନ ବିରୁଦ୍ଧରେ ଐତିହାସିକ ଟେଷ୍ଟ ଡେବ୍ୟୁ କରିଥିଲେ ସଚିନ ତେନ୍ଦୁଲକର। ନଭେମ୍ୱର ୧୫, ୧୯୮୯ର କଥା। ଗଲା ୩୫ ବର୍ଷ ଭିତରେ କୌଣସି ଭାରତୀୟ ପୁରୁଷ କ୍ରିକେଟର ଏହି ରେକର୍ଡର ଆଖପାଖରେ ବି ପହଞ୍ଚିପାରିନଥିଲେ। ବୈଭବ ମାତ୍ର ୧୫ ବର୍ଷ ୭୧ ଦିନ ବୟସରେ ଟିମ୍ ଇଣ୍ଡିଆରେ ସ୍ଥାନ ପାଇ ସେହି ରେକର୍ଡକୁ ଅତିକ୍ରମ କରିଛନ୍ତି। ଶୁକ୍ରବାର ବିସିସିଆଇ ଜୁନ୍ ୬ରୁ ଆୟରଲ୍ୟାଣ୍ଡ ଓ ଇଂଲଣ୍ଡ ଗସ୍ତ ବ୍ୟତୀତ ଏସିଆନ ଗେମ୍ସ ପାଇଁ ଭାରତୀୟ ସ୍କ୍ୱାଡର ଘୋଷଣା କରିଛି। ଏହି ତିନୋଟି ଟିମରେ ବୈଭବଙ୍କୁ ମଉକା ଦେଇଛି ବିସିସିଆଇ। ସେ ଆୟରଲ୍ୟାଣ୍ଡ ବିପକ୍ଷ ସିରିଜରେ ଡେବ୍ୟୁ କଲେ ଭାରତର ସର୍ବକନିଷ୍ଠ ଆନ୍ତର୍ଜାତୀୟ କ୍ରିକେଟର ହେବେ। ବୈଭବଙ୍କ ଜନ୍ମ ମାର୍ଚ୍ଚରେ ହୋଇଥିଲା। ତେନ୍ଦୁଲକରଙ୍କ ରେକର୍ଡ ଭାଙ୍ଗିବାକୁ ହେଲେ ଅକ୍ଟୋବର-ନଭେମ୍ୱର ୨୦୨୭ ପୂର୍ବରୁ ଭାରତର କୌଣସି ଫର୍ମାଟରେ ବୈଭବଙ୍କୁ ଇଣ୍ଟରନାସନାଲ ଡେବ୍ୟୁ କରିବାକୁ ପଡ଼ିବ। ଯଦି ଆଗାମୀ ଦେଢ଼ ବର୍ଷ ଭିତରେ ସେ ନୀଳ ଜର୍ସି ପିନ୍ଧିବାକୁ ସଫଳ ହେବେ। ତାହେଲେ ଭାରତର ମହାନ ବ୍ୟାଟ୍ସମ୍ୟାନଙ୍କୁ ପଛରେ ପକାଇ ଇତିହାସ ରଚିବେ। ସବୁଠୁ କମ୍ ବୟସରେ ଡେବ୍ୟୁ କରିଥିବା ଖେଳାଳୀଙ୍କ ତାଲିକାରେ ତେନ୍ଦୁଲକରଙ୍କ ପରେ ଓ୍ୱିକେଟକିପର ତଥା ବ୍ୟାଟ୍ସମ୍ୟାନ୍ ପାର୍ଥିବ ପଟେଲ ଅଛନ୍ତି। ପାର୍ଥିବ ୨୦୦୨ରେ ଇଂଲଣ୍ଡ ବିରୁଦ୍ଧରେ ୧୭ବର୍ଷ୧୫୩ ଦିନରେ ଡେବ୍ୟୁ କରିଥିଲେ। ତୃତୀୟ ସ୍ଥାନରେ ସ୍ପିନର ମନିନ୍ଦର ସିଂ ଅଛନ୍ତି। ୧୯୮୨ରେ ପାକିସ୍ତାନ ବିରୁଦ୍ଧରେ ୧୭ ବର୍ଷ୧୯୩ ଦିନରେ ନିଜର ପ୍ରଥମ ମ୍ୟାଚ୍ ଖେଳିଥିଲେ। ହେଲେ ବୈଭବ ବିଶ୍ୱରେକର୍ଡ ଭାଙ୍ଗିପାରିବେନି। କ୍ରିକେଟର ପାରମ୍ପରିକ ଫର୍ମାଟର କଥା କହିଲେ,ହସନ ରାଜାଙ୍କ ନାଁ ଇତିହାସରେ ରେକର୍ଡ ଅଛି। ଯିଏ ୧୯୯୬ରେ ଜିମ୍ୱାଓ୍ୱେ ବିରୁଦ୍ଧରେ ୧୪ ବର୍ଷ୨୨୭ ଦିନରେ ନିଜର ଟେଷ୍ଟ ଡେବ୍ୟୁ କରିଥିଲେ। ଏହାର କିଛି ଦିନ ପରେ ସେହି ବର୍ଷ ଜିମ୍ୱାଓ୍ୱେ ବିରୁଦ୍ଧରେ ୧୪ ବର୍ଷ ୨୩୩ ଦିନ ବୟସରେ ଓ୍ୱାନଡେ ଡେବ୍ୟୁ କରିଥିଲେ। ହସନ ରାଜା ଆଜି ବି ଟେଷ୍ଟ ଓ ଓ୍ୱାନ-ଡେ ଇତିହାସରେ ସବୁଠୁ ଯୁବା ଖେଳାଳୀ ଅଟନ୍ତି। ବୈଭବଙ୍କ ବୟସ ୧୫ ବର୍ଷରୁ ଅଧିକ ହୋଇସାରିଛି। ଆଉ ତିନୋଟିଯାକ ଫର୍ମାଟ- ଟେଷ୍ଟ, ଓ୍ୱାନ-ଡେ ଓ ଟି-ଟ୍ୱେଣ୍ଟିରେ ସବୁଠୁ କମ୍ ବୟସରେ ଇଣ୍ଟରନାସନାଲ ଡେବ୍ୟୁ କରିଥିବା ବିଶ୍ୱ ରେକର୍ଡ ରୋମାନିଆର ମାରିଆନ ଘେରାସିମଙ୍କ ନାଁରେ ଅଛି। ମାରିଆନ ଅକ୍ଟୋବର ୧୬, ୨୦୨୦ରେ ବୁଲଗାରିଆ ବିରୁଦ୍ଧରେ ୧୪ ବର୍ଷ ୧୬ ଦିନରେ ନିଜର ଟି-ଟ୍ୱେଣ୍ଟି ଡେବ୍ୟୁ କରିଥିଲେ।