ଇରାନ ଉପରେ ଆମେରିକାର ବଡ଼ ଆକ୍ରମଣ, ୮୦ରୁ ଅଧିକ ଟାର୍ଗେଟ୍ ଧ୍ୱଂସ

ଆମେରିକା : ଇରାନ ଉପରେ ଆମେରିକା ପୁଣି ଥରେ ବଡ଼ ଧରଣର ସାମରିକ ଆକ୍ରମଣ । ହର୍ମୁଜ୍ ପ୍ରଣାଳୀ ନିକଟରେ ବାଣିଜ୍ୟିକ ଜାହାଜ ଉପରେ ଆକ୍ରମଣ ପରେ ଆମେରିକା ଇରାନ ବିରୋଧରେ ବଡ଼ ଧରଣର ସାମରିକ ଅଭିଯାନ ଚଳାଇଛି ।  ଆମେରିକା ସେଣ୍ଟ୍ରାଲ୍ କମାଣ୍ଡ (CENTCOM) ଅନୁସାରେ, ଆମେରିକୀୟ ସେନା ଇରାନର ୮୦ରୁ ଅଧିକ ଟାର୍ଗେଟ୍ ଉପରେ ଆକ୍ରମଣ କରିଛି। ଆମେରିକା କହିଛି ଯେ, ଏହି ଆକ୍ରମଣରେ ଇରାନର ଏୟାର ଡିଫେନ୍ସ ସିଷ୍ଟମ, କମାଣ୍ଡ ଓ କଣ୍ଟ୍ରୋଲ୍ କେନ୍ଦ୍ର, ଉପକୂଳ ରାଡାର୍ ସାଇଟ୍, ଆଣ୍ଟି-ଶିପ୍ ମିସାଇଲ୍ କ୍ଷମତା ଏବଂ ଇରାନ ରିଭୋଲ୍ୟୁସନାରୀ ଗାର୍ଡ (IRGC)ର ୬୦ରୁ ଅଧିକ ଛୋଟ ଯୁଦ୍ଧ ନୌକାକୁ ଟାର୍ଗେଟ୍ କରାଯାଇଛି। ଆମେରିକାର ଦାବି ଅନୁସାରେ, ହର୍ମୁଜ୍ ପ୍ରଣାଳୀ ନିକଟରେ ଅନ୍ତର୍ଜାତୀୟ ବାଣିଜ୍ୟିକ ଜାହାଜ ଉପରେ ହୋଇଥିବା ଆକ୍ରମଣର ଜବାବରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି। ଓମାନ ଉପକୂଳ ନିକଟରେ ତିନିଟି ତେଲ ଟ୍ୟାଙ୍କର ଉପରେ ଡ୍ରୋନ୍ କିମ୍ବା ମିସାଇଲ୍ ଆକ୍ରମଣ ପାଇଁ ଆମେରିକା ଇରାନକୁ ଦାୟୀ କରିଛି। ଆମେରିକାର ଆକ୍ରମଣର ମୁଖ୍ୟ ଟାର୍ଗେଟ୍ ଥିଲା ଇରାନର ଦକ୍ଷିଣ ଅଞ୍ଚଳ। ଖାର୍ଗ ଦ୍ୱୀପ, ବନ୍ଦର ଆବାସ୍, ସିରିକ୍ ଏବଂ କେଶ୍ମ ଦ୍ୱୀପ ଅଞ୍ଚଳରେ ବିସ୍ଫୋରଣ ହୋଇଥିବା ଇରାନୀ ଗଣମାଧ୍ୟମ ରିପୋର୍ଟ କରିଛି। ଏହି ଅଞ୍ଚଳଗୁଡ଼ିକ ଇରାନର ସାମରିକ କାର୍ଯ୍ୟକଳାପ ଓ ତୈଳ ରପ୍ତାନି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଆମେରିକାର ଆକ୍ରମଣ ପରେ ଇରାନ କଡ଼ା ପ୍ରତିକ୍ରିୟା ଦେଇଛି। ଇରାନ ସେନା ଆମେରିକାର କାର୍ଯ୍ୟକୁ "ଖୋଲା ଆକ୍ରମଣ" ବୋଲି କହିବା ସହ ଭୟଙ୍କର ପ୍ରତିଶୋଧ ନେବାକୁ ଚେତାବନୀ ଦେଇଛି। ଇରାନ କହିଛି ଯେ, ହର୍ମୁଜ୍ ପ୍ରଣାଳୀ ଉପରେ କୌଣସି ବାହ୍ୟ ହସ୍ତକ୍ଷେପକୁ ସହ୍ୟ କରାଯିବ ନାହିଁ। ଏହାସହ ଆମେରିକା ଇରାନ ଉପରେ ଆର୍ଥିକ ଚାପ ମଧ୍ୟ ବଢ଼ାଇଛି। ଇରାନର ତୈଳ ବିକ୍ରି ଉପରେ ପୁଣି ଥରେ ସମ୍ବନ୍ଧୀୟ ସୀମିତ ଅନୁମତିକୁ ରଦ୍ଦ କରିବା ସହ ନୂଆ କଟକଣା ଲାଗୁ କରାଯାଇଛି। ଏହାର ପ୍ରଭାବ ବିଶ୍ୱ ତୈଳ ବଜାର ଉପରେ ପଡ଼ିବା ଆଶଙ୍କା କରାଯାଉଛି। ଆମେରିକା ଓ ଇରାନ ମଧ୍ୟରେ ହୋଇଥିବା ଅସ୍ଥାୟୀ ଯୁଦ୍ଧବିରତି ଚୁକ୍ତି ଏବେ ସଙ୍କଟରେ ପଡ଼ିଥିବା ଆଶଙ୍କା କରାଯାଉଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ କହିଛନ୍ତି ଯେ, ଇରାନ ସହ ହୋଇଥିବା ଅସ୍ଥାୟୀ ଚୁକ୍ତି ଏବେ ଶେଷ ହୋଇଛି। ନାଟୋ ସମ୍ମିଳନୀ ସମୟରେ ସେ ଇରାନକୁ କଡ଼ା ଭାଷାରେ ସମାଲୋଚନା କରିଛନ୍ତି। ଆଲୋଚନା ଜାରି ରହିପାରେ, କିନ୍ତୁ ଏହାର ଫଳାଫଳ ନେଇ ସେ ସନ୍ଦେହ ପ୍ରକାଶ କରିଛନ୍ତି। ଏହି ଘଟଣା ପରେ ବାହାରିନ୍ ଓ କୁଏତ ନିଜର ଏୟାର ଡିଫେନ୍ସ ବ୍ୟବସ୍ଥାକୁ ସକ୍ରିୟ କରିଛନ୍ତି। ହର୍ମୁଜ୍ ପ୍ରଣାଳୀର ସୁରକ୍ଷା ନେଇ ଆମେରିକା ଓ ମିତ୍ର ଦେଶଗୁଡ଼ିକ ମଧ୍ୟରେ ଆଲୋଚନା ଚାଲିଛି। ବର୍ତ୍ତମାନ ଆମେରିକା ଓ ଇରାନ ମଧ୍ୟରେ ତିବ୍ର ଉତ୍ତେଜନା ଜାରି ରହିଛି। ଉଭୟ ପକ୍ଷ ସଂଯମ ନ ରଖିଲେ ପଶ୍ଚିମ ଏସିଆରେ ବଡ଼ ସାମରିକ ସଂଘର୍ଷର ଆଶଙ୍କା ବଢ଼ିପାରେ। ବର୍ତ୍ତମାନ ଉଭୟ ଦେଶ ମଧ୍ୟରେ ତିବ୍ର ଉତ୍ତେଜନା ଜାରି ରହିଛି ଏବଂ ଆଗାମୀ ଦିନରେ ସ୍ଥିତି ଆହୁରି ଗମ୍ଭୀର ହୋଇପାରେ।