ପବିତ୍ର ଶୀତଳ ଷଷ୍ଠୀ, ଭିଡ଼ିଓ ବାର୍ତ୍ତା ଯୋଗେ ଶୁଭେଛା ଜଣାଇଲେ କେନ୍ଦ୍ର ଶିକ୍ଷାମନ୍ତ୍ରୀ

ସମ୍ବଲପୁର: ପବିତ୍ର ଶୀତଳ ଷଷ୍ଠୀ ଅବସରରେ କେନ୍ଦ୍ର ଶିକ୍ଷାମନ୍ତ୍ରୀ ତଥା ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ  ଏକ ଭିଡିଓ ବାର୍ତ୍ତା ଜାରି କରି  ରାଜ୍ୟବାସୀଙ୍କୁ  ଶୁଭେଚ୍ଛା ଜଣାଇଛନ୍ତି। ନିଜ ବାର୍ତ୍ତାରେ ଧର୍ମେନ୍ଦ୍ର କହିଛନ୍ତି ଶୀତଳ ଷଷ୍ଠୀ ଓଡ଼ିଆ ସଂସ୍କୃତି, ଆଧ୍ୟାତ୍ମିକତା ଓ ଲୋକ ପରମ୍ପରାର ଏକ ବିରଳ ସମାହାର  l ଏହା କେବଳ ଏକ ଧାର୍ମିକ ପର୍ବ ନୁହେଁ, ବରଂ ଓଡ଼ିଆ ଜାତିର ଭାବ, ଭକ୍ତି ଓ ସାମାଜିକ ପରମ୍ପରାର ପ୍ରତୀକ l ସେହିପରି ଧର୍ମେନ୍ଦ୍ର କହିଛନ୍ତି ଗ୍ରୀଷ୍ମର ପ୍ରଚଣ୍ଡ ତାପରେ ପୃଥିବୀ ଅସ୍ଥିର ହୋଇଯାଏ, ସେତେବେଳେ ଶୀତଳ ଷଷ୍ଠୀ ପ୍ରଭୁ ଶିବ ଓ ମାତା ପାର୍ବତୀଙ୍କ ବିବାହ ଉତ୍ସବ ମାଧ୍ୟମରେ ସମାଜକୁ ଶୀତଳତା ଓ ଶାନ୍ତିର ବାର୍ତ୍ତା ଦେଇଥାଏ। ଏହି ପର୍ବର “ମାନବୀୟ ଲୀଳା” ଭକ୍ତ ଓ ଭଗବାନଙ୍କ ମଧ୍ୟର ଗଭୀର ସମ୍ପର୍କକୁ ପ୍ରକାଶ କରେ ବୋଲି ସେ କହିଛନ୍ତି। ଏହି ଉତ୍ସବ ସମୟରେ ସମାଜର ସମସ୍ତ ବର୍ଗର ଲୋକ ଏକାଠି ହୋଇ ଭେଦଭାବ ଭୁଲି ଉତ୍ସବ ପାଳନ କରୁଥିବାରୁ ସାମାଜିକ ଏକତା ଓ ଭାଇଚାରା ଆହୁରି ମଜବୁତ ହୋଇଥାଏ । କେନ୍ଦ୍ରମନ୍ତ୍ରୀ ଶୀତଳ ଷଷ୍ଠୀର ସାଂସ୍କୃତିକ ମହତ୍ତ୍ୱ ଉପରେ କହିଛନ୍ତି ଯେ ଥାଲ ଉଠା, ପତର ପେଣ୍ଡି, ଗୁଆ ଗୁଣ୍ଡା, ଦେବ ନିମନ୍ତ୍ରଣ, ଦେବ ବିବାହ’ ଏବଂ ‘ନଗର ପରିକ୍ରମା’ ଭଳି ରୀତିନୀତି ଏହି ପର୍ବକୁ ବିଶ୍ୱରେ ଏକ ସ୍ୱତନ୍ତ୍ର ପରିଚୟ ପ୍ରଦାନ କରିଛି। ମାତା ପାର୍ବତୀ ଓ ପ୍ରଭୁ ଶିବଙ୍କ ବିବାହ ଉତ୍ସବ କେବଳ ଧାର୍ମିକ ଆସ୍ଥାର ପ୍ରତୀକ ନୁହେଁ, ବରଂ ସମଗ୍ର ଜଗତର କଲ୍ୟାଣ ଚେତନାର ବାର୍ତ୍ତା ବହନ କରିଥାଏ। ଏହି ଅନନ୍ୟ ପରମ୍ପରାକୁ ସମ୍ମାନ ଜଣାଇ ଭାରତ ସରକାର ପକ୍ଷରୁ ସ୍ମାରକୀ ଡାକ ଟିକେଟ୍ ପ୍ରଚଳନ କରାଯାଇଥିବା ସେ କହିଛନ୍ତି। ଶୀତଳ ଷଷ୍ଠୀର ‘ଜଗତ କଲ୍ୟାଣ’ ବାର୍ତ୍ତାକୁ ସାରା ବିଶ୍ୱରେ ପହଞ୍ଚାଇବା ଏବଂ ‘ବିକଶିତ ସମ୍ବଲପୁର, ବିକଶିତ ଓଡ଼ିଶା ଓ ବିକଶିତ ଭାରତ ଗଠନ ପାଇଁ ସମସ୍ତେ ମିଳିତ ପ୍ରୟାସ କରିବା ଆବଶ୍ୟକ ବୋଲି ସେ କହିଛନ୍ତି l ଏହି ଅବସରରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଙ୍କ ‘ଏକ ପେଡ୍ ମା’ କେ ନାମ’ ଅଭିଯାନରେ ସାମିଲ ହେବା ପାଇଁ ଲୋକମାନଙ୍କୁ ଆହ୍ୱାନ କରିଛନ୍ତି। ପ୍ରତ୍ୟେକ ଲୋକ ଗୋଟିଏ ଲେଖାଏଁ ଗଛ ଲଗାଇ ପୃଥିବୀକୁ ସବୁଜିମାରେ ଭରିଦେବା ସହ ଆଗାମୀ ପିଢ଼ି ପାଇଁ ଏକ ସୁସ୍ଥ ପରିବେଶ ଗଢ଼ି ତୋଳିବାକୁ ସେ ନିବେଦନ କରିଛନ୍ତି। ଯୁବପିଢ଼ିଙ୍କ ଉଦ୍ଦେଶ୍ୟ କରି ଧର୍ମେନ୍ଦ୍ର ପ୍ରଧାନ କହିଛନ୍ତି  ଆଜିର ଡିଜିଟାଲ ଯୁଗରେ ଶୀତଳ ଷଷ୍ଠୀର ଆଧ୍ୟାତ୍ମିକ ଓ ସାଂସ୍କୃତିକ ବିଭବକୁ ସୋସିଆଲ ମିଡିଆ ଏବଂ ‘ରିଲ୍ସ’ ମାଧ୍ୟମରେ ବିଶ୍ୱ ଦରବାରରେ ପହଞ୍ଚାଇବା ସମ୍ଭବ। ଏହି ପର୍ବକୁ ନେଇ ସୃଜନଶୀଳ ଭିଡିଓ, ଫଟୋ ଓ ଡିଜିଟାଲ ବିଷୟବସ୍ତୁ ପ୍ରସ୍ତୁତ କରିବାକୁ ଆହ୍ୱାନ କରି କହିଛନ୍ତି ଯେ ଏହା ଦ୍ୱାରା ଓଡ଼ିଶା ଓ ସମ୍ବଲପୁରର ଗୌରବମୟ ପରମ୍ପରା ବିଶ୍ୱସ୍ତରରେ ଅଧିକ ପରିଚିତ ହୋଇପାରିବ। ଶେଷରେ ସେ ମହାଦେବ ଓ ମାତା ପାର୍ବତୀଙ୍କ କୃପା ସମସ୍ତଙ୍କ ଉପରେ ଅବିରତ ବର୍ଷିତ ହେଉ, ପ୍ରତ୍ୟେକ ପରିବାର ସୁଖ, ଶାନ୍ତି ଓ ସମୃଦ୍ଧିରେ ଭରିଯାଉ ବୋଲି ପ୍ରାର୍ଥନା କରି ‘ଓଁ ନମଃ ଶିବାୟ’ ଉଚ୍ଚାରଣ ସହ ନିଜର ଭିଡିଓ ବାର୍ତ୍ତା ଶେଷ କରିଛନ୍ତି।

ରିପୋର୍ଟ ସମ୍ପଦା ମିଶ୍ର