ଯୁବକଙ୍କ ସନ୍ଦେହ ଜନକ ମୃତ୍ୟୁ, ପରିବାର ଆଣିଲେ ପଥରରେ ଛେଚି ହତ୍ୟା ଅଭିଯୋଗ

କେନ୍ଦୁଝର: ଯୁବକଙ୍କ ସନ୍ଦେହଜନକ ମୃତ୍ୟୁ, ପଥରରେ ଛେଚି ହତ୍ୟା ଅଭିଯୋଗ । କେନ୍ଦୁଝର ଜିଲ୍ଲା ସଦର ଥାନା ଅନ୍ତର୍ଗତ ବାଂଶପାଳ ବ୍ଲକ ଉପରରାଇଗୋଡ଼ା ପଞ୍ଚାୟତର ଆମୁଣି ଗାଁରେ ଜଣେ ଯୁବକଙ୍କ ସନ୍ଦେହଜନକ ମୃତ୍ୟୁକୁ ନେଇ ଚାଞ୍ଚଲ୍ୟ ସୃଷ୍ଟି ହୋଇଛି। ମୃତକ ହେଲେ ଆମୁଣି ଭରାଳି ସାହିର ଶ୍ରୀକାନ୍ତ ମହାକୁଡ଼। ସୂଚନା ଅନୁଯାୟୀ, ଶ୍ରୀକାନ୍ତ ଶୁକ୍ରବାର ସକାଳେ ଗାଁ ପୋଖରୀ ନିକଟକୁ ଶୌଚ ପାଇଁ ଯାଇଥିଲେ। ତେବେ କିଛି ସମୟ ପରେ ପୋଖରୀ ନିକଟରେ ତାଙ୍କର ରକ୍ତାକ୍ତ ମୃତଦେହ ପଡ଼ିଥିବା ଗ୍ରାମବାସୀ ଦେଖିଥିଲେ। ଘଟଣା ପରେ ଅଞ୍ଚଳରେ ଉତ୍ତେଜନା ଦେଖାଦେଇଛି। ପ୍ରାଥମିକ ଭାବେ ପଥରରେ ଛେଚି ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି। ମୃତକଙ୍କ ପରିବାର ଲୋକଙ୍କ କହିବା ଅନୁସାରେ, ଗତ କିଛି ଦିନ ଧରି ଜମିବାଡ଼ି ବିବାଦକୁ ନେଇ ଗାଁର ଜଣେ ଯୁବକଙ୍କ ସହ ଶ୍ରୀକାନ୍ତଙ୍କର ବିବାଦ ଲାଗି ରହିଥିଲା। ସମ୍ପୃକ୍ତ ଯୁବକ ତାଙ୍କୁ ବାରମ୍ବାର ଜୀବନରୁ ମାରିଦେବାକୁ ଧମକ ଦେଉଥିବା ପରିବାର ଲୋକେ ଅଭିଯୋଗ କରିଛନ୍ତି । ଏହି ଘଟଣା ପଛରେ ଯୁବକଙ୍କ ହାତ ଥାଇପାରେ ବୋଲି ପରିବାର ଲୋକେ ସନ୍ଦେହ ପ୍ରକାଶ କରିଛନ୍ତି। ପୋଲିସକୁ ଖବର ଦେଇଥିବା ସୁଦ୍ଧା ଘଟଣାସ୍ଥଳରେ ପହଞ୍ଚି ନ ଥିବାରୁ ଗାଁରେ ଚାପା ଉତ୍ତେଜନା ଲାଗି ଲାଗିରହିଥିଲା। ପରେ ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାଶୁଝା କରିବା ସହିତ ଶବ ଜବତ କରି ତଦନ୍ତ କରୁଛି । ଏବେ ଅପେକ୍ଷା ମୃତକଙ୍କ ପରିବାର ଅଭିଯୋଗକୁ ନେଇ ପୋଲିସ କଣ କାର୍ଯ୍ୟାନୁଷ୍ଠାନ ହେଉଛି, କେବେ ପରିବାରକୁ ନ୍ୟାୟ ମିଳୁଛି ।