ଆଧ୍ୟାତ୍ମିକ ଚିକିତ୍ସା ଓ ସମସ୍ୟାର ସମାଧାନ ନାଁରେ ଜଣେ ୨୧ ବର୍ଷୀୟା ଯୁବତୀଙ୍କୁ ଶାରୀରିକ, ମାନସିକ ଏବଂ ଆର୍ଥିକ ଭାବେ ଶୋଷଣ କରାଯାଇଥିବା ଏକ ଚାଞ୍ଚଲ୍ୟକର ଘଟଣା ମହାରାଷ୍ଟ୍ରର ପୁଣେରୁ ସାମ୍ନାକୁ ଆସିଛି। ଏହି ମାମଲାରେ ପୋଲିସ ନିଜକୁ "ମାଉଲି ବାବା" ବୋଲି ପରିଚୟ ଦେଉଥିବା ଜଣେ ଭଣ୍ଡ ବାବାଙ୍କ ସହ ତାଙ୍କର ୭ ଜଣ ସହଯୋଗୀଙ୍କୁ ଗିରଫ କରିଛି। ଗିରଫ ମୁଖ୍ୟ ଅଭିଯୁକ୍ତର ନାଁ ରଘୁନାଥ ରାମଚନ୍ଦ୍ର ୟେଭାଲେ (୪୨)। ସେ ପୁଣେର ହାଭେଲି ତାଲୁକା ଅଞ୍ଚଳରେ ଏକ ଆଶ୍ରମ ଚଳାଉଥିଲା ଏବଂ ପାରିବାରିକ, ଆର୍ଥିକ କିମ୍ବା ବ୍ୟକ୍ତିଗତ ସମସ୍ୟାରେ ଥିବା ଲୋକଙ୍କୁ ଟାର୍ଗେଟ କରୁଥିବା ଅଭିଯୋଗ ହୋଇଛି।

କେମିତି ଚାଲିଥିଲା ଠକେଇର ସାମ୍ରାଜ୍ୟ?

ପୋଲିସ ତଦନ୍ତ ଅନୁସାରେ, ପୀଡ଼ିତା ଜଣକ ୨୦୨୪ ମସିହାରେ ପାରିବାରିକ ସମସ୍ୟାର ସମାଧାନ ପାଇଁ ବାବାଙ୍କ ଆଶ୍ରମକୁ ଯାଇଥିଲେ। ସେଠାରେ ବାବା ଏବଂ ତାଙ୍କ ସହଯୋଗୀମାନେ ଯୁବତୀଙ୍କୁ "କଳା ଯାଦୁ"ର ପ୍ରଭାବ ରହିଥିବା କହି ଭୟଭୀତ କରିଥିଲେ। ଏହାପରେ ସେହି ଦୋଷ ଦୂର କରିବା ଏବଂ ଜୀବନର ସମସ୍ୟା ସମାଧାନ କରିବା ନାଁରେ ବିଭିନ୍ନ ପୂଜାପାଠ ଓ ତନ୍ତ୍ରମନ୍ତ୍ର କରାଯିବ ବୋଲି କହି ପୀଡ଼ିତାଙ୍କଠାରୁ ପ୍ରାୟ ୪.୫ ଲକ୍ଷ ଟଙ୍କା ଆଦାୟ କରାଯାଇଥିଲା।

ଟଙ୍କା ନଦେବାରୁ ଯୌନ ନିର୍ଯାତନା!

ଅଭିଯୋଗ ଅନୁଯାୟୀ, ଯୁବତୀ ଜଣକ ଆଉ ଟଙ୍କା ଦେବାକୁ ଅସମର୍ଥ ହେବା ପରେ ତାଙ୍କୁ ଧମକ ଦିଆଯାଇଥିଲା। ପରବର୍ତ୍ତୀ ସମୟରେ ତାଙ୍କୁ ଆଶ୍ରମରେ ଅଟକ ରଖି ଜୋରଜବରଦସ୍ତି ଯୌନ ନିର୍ଯାତନା ଦିଆଯାଇଥିବା ଅଭିଯୋଗ ହୋଇଛି। ପୀଡ଼ିତାଙ୍କ ଅଭିଯୋଗ ପରେ ଲୋନି କାଲଭୋର ପୋଲିସ ତୁରନ୍ତ କାର୍ଯ୍ୟାନୁଷ୍ଠାନ ନେଇ ମୁଖ୍ୟ ଅଭିଯୁକ୍ତ ସମେତ ୮ ଜଣଙ୍କୁ ଗିରଫ କରିଛି।

କେଉଁ କେଉଁ ଧାରାରେ ମାମଲା?

ଅଭିଯୁକ୍ତମାନଙ୍କ ବିରୋଧରେ ଭାରତୀୟ ନ୍ୟାୟ ସଂହିତାର ଦୁଷ୍କର୍ମ, ଠକେଇ ଏବଂ ଧମକ ଦେବା ସମ୍ବନ୍ଧୀୟ ବିଭିନ୍ନ ଧାରା ସହ ମହାରାଷ୍ଟ୍ର ଅନ୍ଧବିଶ୍ୱାସ ଓ କଳାଯାଦୁ ନିରୋଧୀ ଆଇନ ଅନୁଯାୟୀ ମାମଲା ରୁଜୁ କରାଯାଇଛି। କୋର୍ଟ ମୁଖ୍ୟ ଅଭିଯୁକ୍ତକୁ ପୋଲିସ ହେପାଜତକୁ ପଠାଇଥିବା ବେଳେ ଆଶ୍ରମର ଆର୍ଥିକ କାରବାର ଓ ଅନ୍ୟ ସମ୍ଭାବ୍ୟ ପୀଡ଼ିତଙ୍କ ସମ୍ପର୍କରେ ଖୋଳତାଡ଼ ଜାରି ରହିଛି।

ଏହି ଘଟଣା ପୁଣିଥରେ ଅନ୍ଧବିଶ୍ୱାସ ଓ ଭଣ୍ଡ ବାବାଙ୍କ ଜାଲରେ ନପଡ଼ିବାକୁ ସଚେତନ ରହିବାର ଆବଶ୍ୟକତାକୁ ସାମ୍ନାକୁ ଆଣିଛି।