ଜନ୍ମମାଟି ରାଇରଙ୍ଗପୁର ଆସୁଛନ୍ତି ରାଷ୍ଟ୍ରପତି, ଏକାଧିକ ଉନ୍ନୟନ ପ୍ରକଳ୍ପର ଉଦଘାଟନ ସହ କରିବେ ଶିଳାନ୍ୟାସ ।

ଭୁବନେଶ୍ୱର: ରାଷ୍ଟ୍ରପତି ଦ୍ରୌପଦୀ ମୁର୍ମୁ  ଶୁକ୍ରବାର ନିଜ ଜନ୍ମଭୂମି ଓଡ଼ିଶା ଗସ୍ତରେ ଆସୁଛନ୍ତି। ରାଷ୍ଟ୍ରପତିଙ୍କ ଗସ୍ତକୁ ନେଇ ସ୍ୱାଗତ ପାଇଁ ସଜେଇ ହୋଇଛି ମୟୂରଭଞ୍ଜ ଜିଲ୍ଲା । ଆଜିଠୁ ଦୁଇଦିନିଆ ଓଡ଼ିଶା ଗସ୍ତରେ ଆସୁଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ । ସୂଚନା ଅନୁଯାୟୀ, ରାଷ୍ଟ୍ରପତି ଶୁକ୍ରବାର ଅପରାହ୍ନ ୩ଟା ୪୫ରେ ମୟୂରଭଞ୍ଜ ଜିଲ୍ଲା ଦାଣ୍ଡବୋଷ ଏୟାରଷ୍ଟ୍ରିପରେ ପହଞ୍ଚିବେ। ସଂଧ୍ୟାରେ ରାଇରଙ୍ଗପୁରରେ ପହଞ୍ଚି ଏମ୍ସ ସାଟେଲାଇଟ୍ ସେଣ୍ଟରର ଏବଂ ସେଠାରେ ବିଭିନ୍ନ ସରକାରୀ ପ୍ରକଳ୍ପର ଉଦଘାଟନ କରିବେ। ନିଜ ଜନ୍ମମାଟିକୁ ରାଷ୍ଟ୍ରପତିଙ୍କ ଏହି ଗସ୍ତ ସ୍ଥାନୀୟ ଲୋକଙ୍କ ପାଇଁ ଗୌରବର ବିଷୟ ହୋଇଥିବାବେଳେ, ପ୍ରଶାସନ ପକ୍ଷରୁ ମଧ୍ୟ ବ୍ୟାପକ ପ୍ରସ୍ତୁତି କରାଯାଇଛି। ରାଷ୍ଟ୍ରପତିଙ୍କ ଏହି ଦୁଇ ଦିନିଆ ଗସ୍ତ ସମୟରେ ଅନେକ ଉନ୍ନୟନମୂଳକ ଏବଂ ଧାର୍ମିକ କାର୍ଯ୍ୟକ୍ରମ ଆୟୋଜିତ ହେବ। କାଲି ସକାଳ ୧୦ଟାରେ ନିଜ ଶ୍ବଶୂର ଘର ଗାଁ ପାହାଡ଼ପୁର ଯିବା କାର୍ଯ୍ୟକ୍ରମ ରହିଛି। ଶନିବାର ଓଡ଼ିଶା ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ୨୦ରେ ପାହାଡ଼ପୁର ଆସୁଛନ୍ତି । ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ସ୍ଥାନୀୟ ଅଞ୍ଚଳରେ ଉତ୍ସାହର ମାହୋଲ ଥିବା ବେଳେ ପ୍ରଶାସନ ପକ୍ଷରୁ ପ୍ରସ୍ତୁତି ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି। ହାଇପ୍ରୋଫାଇଲ ଗସ୍ତ ପାଇଁ ତ୍ରିସ୍ତରୀୟ ସୁରକ୍ଷା ବଳୟରେ ରହିଛି ରାଇରଙ୍ଗପୁର । ଏହି ଅବସରରେ ଉଭୟ ନେତା ଏକ ପ୍ରମୁଖ ଧାର୍ମିକ ସ୍ଥଳୀ ପରିଦର୍ଶନ କରିବା ସହ ବହୁ ଉନ୍ନୟନ ପ୍ରକଳ୍ପର ଶିଳାନ୍ୟାସ ଓ ଉଦଘାଟନ କରିବେ। ଏହାସହ ଏକ ବିଶାଳ ଜନସଭାରେ ଉଦବୋଧନ ଦେଇ ଅଞ୍ଚଳର ଉନ୍ନତି ଓ ଭବିଷ୍ୟତ ବିକାଶ ଯୋଜନା ସମ୍ପର୍କରେ ଲୋକଙ୍କୁ ଅବଗତ କରାଇବେ। ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ପାଇଁ ରାଇରଙ୍ଗପୁର କେବଳ ଏକ ସହର ନୁହେଁ, ବରଂ ତାଙ୍କ ରାଜନୈତିକ ଓ ସାମାଜିକ ଜୀବନର ଆରମ୍ଭ ସ୍ଥଳୀ । ଏହି ଅଞ୍ଚଳରୁ ସେ ନିଜର ରାଜନୈତିକ ଯାତ୍ରା ଆରମ୍ଭ କରିଥିଲେ ଏବଂ ପରବର୍ତ୍ତୀ ସମୟରେ ରାଜ୍ୟପାଳ ଠାରୁ ଆରମ୍ଭ କରି ଦେଶର ସର୍ବୋଚ୍ଚ ସାମ୍ବିଧାନିକ ପଦବୀ ପର୍ଯ୍ୟନ୍ତ ପହଞ୍ଚିଥିଲେ। ତେଣୁ ତାଙ୍କ ଜନ୍ମମାଟିକୁ ପ୍ରତ୍ୟେକ ଗସ୍ତ ସ୍ଥାନୀୟ ଲୋକଙ୍କ ପାଇଁ ଏକ ସ୍ମରଣୀୟ ମୁହୂର୍ତ୍ତ ହୋଇଥାଏ। ତାଙ୍କୁ ସ୍ୱାଗତ କରିବା ପାଇଁ ରାଇରଙ୍ଗପୁର ଓ ଆଖପାଖ ଅଞ୍ଚଳରେ ବିଶେଷ ସଜାସଜ୍ଜା କରାଯାଇଛି। ଅନ୍ୟପଟେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଓଡ଼ିଶା ଗସ୍ତ ମଧ୍ୟ ରାଜନୈତିକ ଏବଂ ପ୍ରଶାସନିକ ଦୃଷ୍ଟିରୁ ବେଶ ଗୁରୁତ୍ୱପୂର୍ଣ୍ଣ ବୋଲି ମନେ କରାଯାଉଛି। ଉନ୍ନୟନ ପ୍ରକଳ୍ପ ଉଦଘାଟନ ଓ ଶିଳାନ୍ୟାସ ମାଧ୍ୟମରେ ରାଜ୍ୟର ଭିତ୍ତିଭୂମି ସୁଦୃଢ଼ କରିବା, ଯୋଗାଯୋଗ ବ୍ୟବସ୍ଥାର ଉନ୍ନତି ଏବଂ ସାଧାରଣ ଲୋକଙ୍କ ଜୀବନମାନ ବୃଦ୍ଧି କରିବା ଉପରେ ସରକାରଙ୍କ ଗୁରୁତ୍ୱ ରହିଛି। ଶନିବାରର ଜନସଭାରେ କେନ୍ଦ୍ର ସରକାରଙ୍କ ବିଭିନ୍ନ ଯୋଜନା ଓ ଓଡ଼ିଶା ପାଇଁ ଆଗାମୀ ଦିନର ରୋଡମ୍ୟାପ୍ ସମ୍ପର୍କରେ ମଧ୍ୟ ଘୋଷଣା ହେବାର ସମ୍ଭାବନା ରହିଛି। ରାଷ୍ଟ୍ରପତି ଓ ପ୍ରଧାନମନ୍ତ୍ରୀଙ୍କ ଏହି ଗସ୍ତକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। ରାଇରଙ୍ଗପୁର, ବାରିପଦା ଓ କାର୍ଯ୍ୟକ୍ରମସ୍ଥଳୀଗୁଡ଼ିକରେ ବହୁ ସଂଖ୍ୟକ ପୋଲିସ ବଳ ଓ ସୁରକ୍ଷାକର୍ମୀ ମୁତୟନ କରାଯାଇଛନ୍ତି। ପ୍ରଶାସନିକ ଅଧିକାରୀମାନେ ଶେଷ ମୁହୂର୍ତ୍ତର ପ୍ରସ୍ତୁତିରେ ବ୍ୟସ୍ତ ଥିବାବେଳେ, ଲୋକଙ୍କ ଭିଡ଼ ଓ ଯାତାୟାତ ବ୍ୟବସ୍ଥାକୁ ସୁଚାରୁ ରଖିବା ପାଇଁ ସ୍ୱତନ୍ତ୍ର ଯୋଜନା ମଧ୍ୟ କରାଯାଇଛି।ସାରା ରାଜ୍ୟର ନଜର ବର୍ତ୍ତମାନ ଏହି ଗୁରୁତ୍ୱପୂର୍ଣ୍ଣ ଗସ୍ତ ଉପରେ ରହିଛି। ବିଶେଷ କରି ମୟୂରଭଞ୍ଜ ଜିଲ୍ଲାବାସୀ ନିଜ ମାଟିର ଝିଅ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପୁଣିଥରେ ସ୍ୱାଗତ କରିବା ପାଇଁ ଅତ୍ୟନ୍ତ ଉତ୍ସାହିତ ଥିବାବେଳେ, ଏହି ଗସ୍ତ ମାଧ୍ୟମରେ ଅଞ୍ଚଳର ବିକାଶକୁ ନୂଆ ଗତି ମିଳିବ ବୋଲି ଆଶା ପ୍ରକାଶ ପାଇଛି।

ରିପୋର୍ଟ ସମ୍ପଦା ମିଶ୍ର