ଆୟାତୋଲ୍ଲା ଅଲି ଖାମେନେଇଙ୍କ ଅନ୍ତ୍ୟେଷ୍ଟିକ୍ରିୟାରେ ଯୋଗ ଦେଇପାରନ୍ତି ପ୍ରଧାନମନ୍ତ୍ରୀ ମୋଦି, ନିମନ୍ତ୍ରଣ କଲେ ଇରାନ ରାଷ୍ଚ୍ରପତି

ନୂଆଦିଲ୍ଲୀ: ଆସନ୍ତା ମାସରେ ଇରାନ ଗସ୍ତରେ ଯାଇ ପାରନ୍ତି ପ୍ରଧାନମନ୍ତ୍ରୀ ମୋଦି । ଇରାନ ଗସ୍ତ ପାଇଁ ରାଷ୍ଟ୍ରପତି ମସୁଦ ପେଜେସ୍କିଆନ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ନିମନ୍ତ୍ରଣ କରିଛନ୍ତି । ଇରାନର ପୂର୍ବତନ ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖାମେନେଇଙ୍କ ରାଜ୍ୟସ୍ତରୀୟ ଅନ୍ତ୍ୟେଷ୍ଟିକ୍ରିୟା (State Funeral) ରେ ଯୋଗଦେବା ପାଇଁ ନିମନ୍ତ୍ରଣ କରିଛନ୍ତି। ଏହି ଘଟଣା ସାରା ବିଶ୍ୱର ଭୂ-ରାଜନୀତି ଓ  କୂଟନୀତି ଦୃଷ୍ଟିକୋଣରୁ ବେଶ ଗୁରୁତ୍ୱପୂର୍ଣ୍ଣ। ଗତ ଫେବୃଆରୀ ୨୮ ରେ ଆମେରିକା ଓ ଇସ୍ରାଏଲର ମିଳିତ ଏୟାରଷ୍ଟ୍ରାଇକରେ ଖାମେନେଇଙ୍କ ମୃତ୍ୟୁ ହୋଇଥିଲା। ଇସଲାମିକ ରୀତିନୀତି ଅନୁଯାୟୀ ମୃତଦେହକୁ ତୁରନ୍ତ ଅନ୍ତିମ ସଂସ୍କାର କରାଯିବା କଥା । କିନ୍ତୁ ସେହି ସମୟରେ ଯୁଦ୍ଧ ପରିସ୍ଥିତି ଲାଗି ରହିଥିବାରୁ ଏଥିରେ ବିଳମ୍ବ ହୋଇଥିଲା। ଏବେ ଏହି ସ୍ୱତନ୍ତ୍ର କାର୍ଯ୍ୟକ୍ରମ ଜୁଲାଇ ୪ ରୁ ଜୁଲାଇ ୯ ମଧ୍ୟରେ ଆୟୋଜିତ କରିବାକୁ ଇରାନ ପ୍ରସ୍ତୁତି ଆରମ୍ଭ କରିଛି । ଏଥିପାଇଁ ଇରାନ ନିଜର ବନ୍ଧୁ ରାଷ୍ଚ୍ରର ରାଷ୍ଟ୍ରମୁଖ୍ୟଙ୍କୁ ସାମିଲ ହେବାକୁ ନିମନ୍ତ୍ରଣ କରୁଛି । ଏହି କ୍ରମରେ ପ୍ରଧାନମନ୍ତ୍ରୀ ମୋଦିଙ୍କୁ ନିମନ୍ତ୍ରଣ କରିଛନ୍ତି ଇରାନ ରାଷ୍ଟ୍ରପତି । ବେସରକାରୀ ସୂଚନା ଅନୁସାରେ ଜୁଲାଇ ୪ ରୁ ୬ ମଧ୍ୟରେ ତେହେରାନର ଗ୍ରାଣ୍ଡ ମୋସାଲାରେ ସାଧାରଣ ଜନତାଙ୍କ ଶେଷ ଦର୍ଶନ ଓ ପ୍ରାର୍ଥନା ସଭା ହେବ । ଜୁଲାଇ ୭ରେ ପବିତ୍ର ସହର 'କୋମ' ରେ ବିଶେଷ ରୀତିନୀତି ହେବ। ଜୁଲାଇ ୯ରେ  ଖାମେନେଇଙ୍କ ଜନ୍ମସ୍ଥାନ ମସାଦର ଇମାମ ରେଜା ଶ୍ରାଇନରେ ଶେଷ ସମାଧି ଦିଆଯିବ । ଏହି ଶୋକ ସଭାରେ ପ୍ରାୟ ୨ କୋଟି ଲୋକ ସାମିଲ ହେବେ ବୋଲି ଆକଳନ କରିଛନ୍ତି ବିଭିନ୍ନ ସଂସ୍ଥା । ଯଦି ଏହା ହୁଏ ଇରାନ ଇତିହାସର ସବୁଠାରୁ ବଡ଼ ଶୋକସଭା ହେବ। ଭାରତ ସରକାର ଏହି ନିମନ୍ତ୍ରଣକୁ ଗ୍ରହଣ କରିଛନ୍ତି, କିନ୍ତୁ ପ୍ରଧାନମନ୍ତ୍ରୀ ମୋଦି ନିଜେ ଯିବେ କି ନାହିଁ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଭାରତ ପାଇଁ ଏହା ଏକ ବଡ଼ ପରୀକ୍ଷା ହେବାକୁ ଯାଉଛି ।  କାରଣ ଇରାନ ସହିତ ଭାରତର ପୁରୁଣା ବନ୍ଧୁତା ରହିଛି, 'ଚାବାହାର ବନ୍ଦର' ଭଳି ବଡ଼ ପ୍ରୋଜେକ୍ଟ ଇରାନରେ ଚାଲୁଛି। ଯାହା ଭାରତ ପାଇଁ ବେଶ ଗୁରୁତ୍ୱପୂର୍ଣ୍ଣ । ଅନ୍ୟପଟେ ଭାରତକୁ ଆମେରିକା ଓ ଇସ୍ରାଏଲ ସହିତ ମଧ୍ୟ ନିଜର ସମ୍ପର୍କ ସନ୍ତୁଳିତ ରଖିବାକୁ ପଡ଼ିବ। ଗତ ୨୦୨୪ ରେ ଯେତେବେଳେ ଇରାନ ରାଷ୍ଟ୍ରପତି ଇବ୍ରାହିମ ରାଇସିଙ୍କର ହେଲିକପ୍ଟର ଦୁର୍ଘଟଣାରେ ମୃତ୍ୟୁ ହୋଇଥିଲା, ସେତେବେଳେ ଭାରତ ପକ୍ଷରୁ ତତ୍କାଳୀନ ଉପ-ରାଷ୍ଟ୍ରପତି ଜଗଦୀପ ଧନଖଡ଼ ଶୋକସଭାରେ ଯୋଗ ଦେଇଥିଲେ। ତେଣୁ ଏଥର ମଧ୍ୟ ପ୍ରଧାନମନ୍ତ୍ରୀଙ୍କ ବଦଳରେ କୌଣସି ବଡ଼ ପ୍ରତିନିଧିଙ୍କୁ ପଠାଯାଇପାରେ। ବର୍ତ୍ତମାନ ସମୟରେ ଇରାନ ଓ ଆମେରିକା ମଧ୍ୟରେ ସ୍ୱିଜରଲ୍ୟାଣ୍ଡରେ ଶାନ୍ତି ଆଲୋଚନା ଜାରି ରହିଛି । ଅନ୍ୟପଟେ ଇରାନର ଶାସନ କ୍ଷମତା ଏବେ ଖାମେନେଇଙ୍କ ପୁଅ ମୋଜତାବା ଖାମେନେଇଙ୍କ ହାତକୁ ଯାଇଛି, ଯଦିଓ ତାଙ୍କୁ ନେଇ ଅନେକ ଚର୍ଚ୍ଚା ଲାଗିରହିଛି