୨୦୨୪ ବ୍ୟାଚ୍ IAS ପ୍ରଶିକ୍ଷାର୍ଥୀଙ୍କ ସହ ଆଲୋଚନା କଲେ ପ୍ରଧାନମନ୍ତ୍ରୀ, ‘ନାଗରିକ ଦେବୋ ଭବ’ ଉପରେ ଦେଲେ ଗୁରୁତ୍ୱ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ନୂଆଦିଲ୍ଲୀର ‘ସେବା ତୀର୍ଥ’ରେ ୨୦୨୪ ବ୍ୟାଚ୍‌ର ୧୮୩ ଜଣ IAS ପ୍ରଶିକ୍ଷାର୍ଥୀ ଅଧିକାରୀଙ୍କ ସହ ଆଲୋଚନା କରିଛନ୍ତି। ବିଭିନ୍ନ ମନ୍ତ୍ରଣାଳୟ ଓ ବିଭାଗରେ ସହକାରୀ ସଚିବ ଭାବେ ନିଯୁକ୍ତ ଏହି ଯୁବ ଅଧିକାରୀମାନେ ନିଜର କ୍ଷେତ୍ର ପ୍ରଶିକ୍ଷଣ ଏବଂ ପ୍ରଶାସନିକ ଅଭିଜ୍ଞତା ସମ୍ପର୍କରେ ପ୍ରଧାନମନ୍ତ୍ରୀଙ୍କ ସହ ଆଲୋଚନା କରିଥିଲେ। କେନ୍ଦ୍ର ସରକାରଙ୍କ ସୂଚନା ଅନୁଯାୟୀ ଏହି ଯୁବ ପ୍ରଶିକ୍ଷାର୍ଥୀ ଅଧିକାରୀମାନେ ସେମାନଙ୍କର ଫିଲ୍ଡ ଟ୍ରେନିଂ (କ୍ଷେତ୍ର ପ୍ରଶିକ୍ଷଣ) ଏବଂ ମନ୍ତ୍ରଣାଳୟଗୁଡ଼ିକରେ କାର୍ଯ୍ୟ କରିବାର ଅଭିଜ୍ଞତା ବାଣ୍ଟିଥିଲେ। ଅଧିକାରୀମାନଙ୍କୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ ଦୁଇ ବର୍ଷର କ୍ଷେତ୍ର ଅଭିଜ୍ଞତା ଏବଂ ପ୍ରଶାସନିକ ଶିକ୍ଷା ପରେ, ସେମାନେ ଏବେ ଏକ ଗୁରୁତ୍ୱପୂର୍ଣ୍ଣ ଦାୟିତ୍ୱର ପର୍ଯ୍ୟାୟରେ ପହଞ୍ଚିଛନ୍ତି । ଯେଉଁଠାରେ ସେମାନଙ୍କର ନିଷ୍ପତ୍ତି କେବଳ ସେମାନଙ୍କ କ୍ୟାରିୟର ନୁହେଁ, ବରଂ କୋଟି କୋଟି ନାଗରିକଙ୍କ ଭବିଷ୍ୟତ ଉପରେ ପ୍ରଭାବ ପକାଇବ। ପ୍ରଧାନମନ୍ତ୍ରୀ ଯୁବ ସିଭିଲ୍ ଅଫିସରଙ୍କୁ ସମ୍ବୋଧିତ କରି ସେ ନୂତନ ଚିନ୍ତାଧାରା,ଦୃଢ଼ ଉଦ୍ଦେଶ୍ୟ, ନୂତନ ଚିନ୍ତାଧାରା ଏବଂ ନାଗରିକ-କେନ୍ଦ୍ରିକ ଶାସନ  ସହିତ ଦେଶ ଗଠନରେ ନିଜକୁ ଉତ୍ସର୍ଗ କରିବାକୁ ଆହ୍ୱାନ ଦେଇଥିଲେ। ସେ ଅଧିକାରୀମାନଙ୍କୁ ପ୍ରତ୍ୟେକ ପ୍ରଶାସନିକ ଫାଇଲ୍ ପଛରେ ଥିବା ମାନବୀୟ ପ୍ରଭାବକୁ ସର୍ବଦା ମନେ ରଖିବାକୁ କହିଥିଲେ।  "ନାଗରିକ ଦେବୋ ଭବ" ମନ୍ତ୍ର ଉପରେ ଗୁରୁତ୍ୱ ଦେଇ ସେ ଅଧିକାରୀମାନଙ୍କୁ ପ୍ରତ୍ୟେକ ନିଷ୍ପତ୍ତିର କେନ୍ଦ୍ରବିନ୍ଦୁରେ ନାଗରିକମାନଙ୍କୁ ରଖିବାକୁ ଏବଂ ପ୍ରଶାସନ ଯେପରି ସହାନୁଭୂତିଶୀଳ, ପ୍ରତିକ୍ରିୟାଶୀଳ ଏବଂ ସମାବେଶୀ ହେବା ଦିଗରେ ଅଧିକାରୀମାନଙ୍କୁ କାର୍ଯ୍ୟ କରିବାକୁ ସେ ପରାମର୍ଶ ଦେଇଥିଲେ। ବିକଶିତ ଭାରତ ୨୦୪୭'ର ସଂକଳ୍ପକୁ ଦୋହରାଇ ପ୍ରଧାନମନ୍ତ୍ରୀ କହିଥିଲେ ଯେ ଆଗାମୀ ଦଶନ୍ଧିଗୁଡ଼ିକରେ ପ୍ରତ୍ୟେକ ନୀତି ଏବଂ ପ୍ରଶାସନିକ ନିଷ୍ପତ୍ତି ଏକ ବିକଶିତ ଭାରତ ଗଠନରେ ସହଯୋଗ କରିବା ଉଚିତ। ସେ ଗୁରୁତ୍ୱ ଦେଇ କହିଥିଲେ ଯେ ଆଜି ଭାରତର ପ୍ରାଥମିକତା ମଧ୍ୟରେ ଆତ୍ମନିର୍ଭର ଭାରତ, ମେକ୍ ଇନ୍ ଇଣ୍ଡିଆ, ଉତ୍ପାଦନ କ୍ଷେତ୍ରର ଅଭିବୃଦ୍ଧି, ଶକ୍ତି ସୁରକ୍ଷା ଏବଂ ଯୁବକମାନଙ୍କ ପାଇଁ ସୁଯୋଗ ସୃଷ୍ଟି କରିବା ଅନ୍ତର୍ଭୁକ୍ତ। ପ୍ରଧାନମନ୍ତ୍ରୀ ଯୁବ ଅଧିକାରୀମାନଙ୍କୁ ଦେଶ ଗଠନରେ ସେମାନଙ୍କର ଅବଦାନକୁ କ୍ରମାଗତ ଭାବେ ମୂଲ୍ୟାଙ୍କନ କରିବାକୁ ଏବଂ କେବଳ ପଦବୀ ନୁହେଁ, ବରଂ ନିଜ କାର୍ଯ୍ୟର ବାସ୍ତବ ପ୍ରଭାବ ଓ ଫଳାଫଳ ଆଧାରରେ ନିଜ ଅବଦାନର ମୂଲ୍ୟାଙ୍କନ କରିବା ଉଚିତ। ଏହି ଆଲୋଚନା ସମୟରେ କେନ୍ଦ୍ର ରାଷ୍ଟ୍ରମନ୍ତ୍ରୀ  ଜିତେନ୍ଦ୍ର ସିଂହ, ପ୍ରଧାନମନ୍ତ୍ରୀଙ୍କ ପ୍ରଧାନ ସଚିବ ପ୍ରମୋଦ ମିଶ୍ର, ପ୍ରଧାନମନ୍ତ୍ରୀଙ୍କ ପ୍ରଧାନ ସଚିବ-୨ ଶକ୍ତିକାନ୍ତ ଦାସ, କ୍ୟାବିନେଟ୍ ସଚିବ ଟି. ଭି. ସୋମନାଥନ୍, ଏଲବିଏସଏନଏସ ଏସର ନିର୍ଦ୍ଦେଶକ ଶ୍ରୀରାମ ତାରାନିକାନ୍ତି ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।