ଗୋଲଡେନ ବୁଟ ରେସରେ ଉସମାନ- ୩୨ ବର୍ଷ ପରେ ପ୍ରଥମାର୍ଦ୍ଧ ଭିତରେ ହାଟ୍ରିକ ଗୋଲ୍

ଫିଫା ବିଶ୍ୱକପରେ ଫ୍ରାନ୍ସର ଷ୍ଟାର ଫରଓ୍ୱାର୍ଡ ଉସମାନ ଡେମ୍ୱେଲେଙ୍କ ଦମଦାର ହାଟ୍ରିକ। ଆଉ ଏହି ହାଟ୍ରିକ ଗୋଲ୍ ବଳରେ ନରଓ୍ୱେକୁ ୪-୧ରେ ହରାଇ ଗ୍ରୁପ ଷ୍ଟେଜର ସମାପନ ମ୍ୟାଚରେ ଜିତିଲା ଫ୍ରାନ୍ସ। ଗୋଲଡେନ ବୁଟ୍ ରେସରେ ବି ଜୋରଦାର ଏଣ୍ଟ୍ରି ମାରିଲେ ଉସମାନ। ଗୋଲଡେନ ବୁଟ୍ ପାଇଁ ପୂର୍ବରୁ କିଲିୟନ ଏମ୍ୱାପେ ଓ ଲିୟୋନେଲ ମେସିଙ୍କ ଭଳି ଖେଳାଳୀ ଦାବିଦାର ସାଜିଛନ୍ତି। ମ୍ୟାଚ୍ ଆରମ୍ଭରୁ ଫ୍ରାନ୍ସ ଆକ୍ରମଣାତ୍ମକ ଖେଳ ଦେଖାଇଥିଲା। ଫକ୍ସବୋରୋର ବୋଷ୍ଟନ ଷ୍ଟାଡିୟମରେ ହୋଇଥିବା ଲଢ଼େଇର ୭ ମିନିଟରେ ଉସମାନ ପ୍ରଥମ ଗୋଲ୍ ମାରିଥିଲେ। ଏହା ପରେ ୨୦ ମିନିଟରେ ଦ୍ୱିତୀୟ ଗୋଲ କରିଥିଲେ। ୨ଟି ଗୋଲ୍‌ ଖାଇବା ପରେ ନରଓ୍ୱେ ଏହାର ଜବାବ ଦେଇଥିଲା। ଦ୍ୱିତୀୟ ଗୋଲ ଖାଇବାର ୧୪ ସେକେଣ୍ଡ ପରେ ସ୍କୋରକୁ ୨-୧ରେ କରିଥିଲା ନରଓ୍ୱେ। ହେଲେ ଫ୍ରାନ୍ସ ପୁରା ଚାପରେ ରଖିଥିଲା। ତୃତୀୟ ଗୋଲ୍ ଦେଇ ନରଓ୍ୱେର ଆଶାକୁ ଝଟକା ଦେଇଥିଲେ ଉସମାନ। ୩୨ତମ ମିନିଟରେ ତୃତୀୟ ଗୋଲ୍ କରି ହାଟ୍ରିକ ଗୋଲ୍ କରିଥିଲେ। ୧୯୯୪ ପରେ ଏଭଳି ପ୍ରଥମ ଥର ହେଲା। ଯେବେ ବିଶ୍ୱକପରେ କୌଣସି ଖେଳାଳୀ ପ୍ରଥମାର୍ଦ୍ଧରେ ହିଁ ହାଟ୍ରିକ ମାରଲେ। ଋଷର ଓଲେଗ ସାଲେଙ୍କୋ ୧୯୯୪ରେ ବିଶ୍ୱକପରେ କୈମରୁନ ବିରୁଦ୍ଧରେ ପ୍ରଥମାର୍ଦ୍ଧ ପୂର୍ବରୁ ତିନୋଟି ଗୋଲ୍ କରିଥିଲେ। ୨୦୨୫ର ବେଲୋନ ଡିଓର ବିଜେତା ଉସମାନ ଡେମ୍ୱେଲେ ଏହି ବିଶ୍ୱକପରେ ୪ଟି ଗୋଲ୍ ମାରିସାରିଛନ୍ତି। ଲିୟୋନେଲ ମେସି ୫ ଗୋଲ୍ କରି ଏହି ତାଲିକାରେ ପ୍ରଥମ ନମ୍ୱରରେ ଅଛନ୍ତି। ଫ୍ରାନ୍ସର କିଲିୟନ ଏମ୍ୱାପେ ୪ଟି ଗୋଲ ଓ ୨ ଆସିଷ୍ଟ ସହ ଦ୍ୱିତୀୟ ସ୍ଥାନରେ ଅଛନ୍ତି। ୧୯୯୮ ଓ ୨୦୧୮ର ବିଶ୍ୱ ଚାମ୍ପିଅନ ଟିମ ଫ୍ରାନ୍ସ ପୂର୍ବରୁ ନକଆଉଟ ପର୍ଯ୍ୟାୟରେ ଜାଗା ପକକା କରିସାରିଛି। ଏବେ ଟିମ୍ ରାଉଣ୍ଡ ଅଫ ୩୨ରେ ତୃତୀୟ ସର୍ବଶ୍ରେଷ୍ଠ ଟିମ୍ ସହ ଖେଳିବ। ସେପଚେ ନରଓ୍ୱେର ସାମ୍ନା ରାଉଣ୍ଡ ଅଫ ୩୨ରେ ଆଇଭରି କୋଷ୍ଟ ସହ ହେବ।