Nuakhai Preparation: ନୂଆଖାଇ ପାଇଁ ଚଳଚଞ୍ଚଳ ଝାରସୁଗୁଡ଼ା, ଚୂଡ଼ାନ୍ତ ପର୍ଯ୍ୟାୟରେ ପ୍ରସ୍ତୁତି

ଝାରସୁଗୁଡ଼ା: ଆସନ୍ତାକାଲି ପଶ୍ଚିମ ଓଡ଼ିଶାର ଗଣପର୍ବ ନୂଆଖାଇ। କୃଷିଭିତ୍ତିକ ଏହି ମହାନ ପର୍ବକୁ ନେଇ ପଶ୍ଚିମ ଓଡ଼ିଶାରେ ଉତ୍ସବର ମାହୋଲ। ଲଗ୍ନ ଧାର୍ଯ୍ୟ ହେବା ପରେ ଝାରସୁଗୁଡ଼ା ଜିଲ୍ଲାରେ ନୂଆଖାଇ ପ୍ରସ୍ତୁତି ଏବେ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛି। ଗାଁଠାରୁ ସହର ଯାଏଁ ସବୁଠି ଚଳଚଞ୍ଚଳ ପରିବେଶ ଦେଖିବାକୁ ମିଳୁଛି। ନୂଆଖାଇକୁ ସ୍ୱାଗତ କରିବା ପାଇଁ ଘରେ ଘରେ ଚାଲିଛି ସଫେଇ ଓ ପ୍ରସ୍ତୁତି। ମହିଳାମାନେ ଘରଦ୍ୱାର ଲିପାପୋଛା କରିବାରେ ବ୍ୟସ୍ତ ଥିବା ବେଳେ କିଏ କୁରେ ପତ୍ର ତୋଳୁଛନ୍ତି, ଆଉ କିଏ ଜାଳେଣି କାଠ ସାଙ୍ଗକୁ ନୂଆ ଧାନ ସଂଗ୍ରହ କରୁଛନ୍ତି। ପର୍ବ ପାଇଁ ଆବଶ୍ୟକ ସାମଗ୍ରୀ କିଣାକିଣିରେ ମଧ୍ୟ ବଜାର ଚଳଚଞ୍ଚଳ ହୋଇଉଠିଛି। ହାଟବଜାରରେ ନୂଆ ଚୂଡ଼ା, ଗୁଡ଼, ଘିଅ, ମାଟି ପାତ୍ର, ନୂଆ ବସ୍ତ୍ର ସହ ଅନ୍ୟାନ୍ୟ ସାମଗ୍ରୀ କିଣିବାକୁ ଲୋକଙ୍କ ଭିଡ଼ ଜମୁଛି। ସାପ୍ତାହିକ ବଜାର ସାଙ୍ଗକୁ ନୂଆଖାଇ ବଜାର ଲାଗିଥିବାରୁ ହାଟରେ ଭିଡ଼ ଆହୁରି ବଢ଼ିଛି। ଗୋଟିଏ ସ୍ଥାନରେ ନୂଆଖାଇ ପାଇଁ ଆବଶ୍ୟକ ପ୍ରାୟ ସମସ୍ତ ସାମଗ୍ରୀ ମିଳୁଥିବାରୁ ନୂଆଖାଇ ହାଟର ଗୁରୁତ୍ୱ ରହିଛି।

ଧାର୍ଯ୍ୟ ହୋଇଛି ନୂଆଖାଇ ଲଗ୍ନ

ପଶ୍ଚିମ ଓଡ଼ିଶାର ଏହି କୃଷିଭିତ୍ତିକ ଗଣପର୍ବ ପାଇଁ ଲଗ୍ନ ଧାର୍ଯ୍ୟ ହୋଇଛି। ଆସନ୍ତା ୧୫ ସେପ୍ଟେମ୍ବରରେ ପାଳନ ହେବ ନୂଆଖାଇ। ସକାଳ ୯ଟା ୩୬ ମିନିଟରୁ ୧୦ଟା ୧୦ ମିନିଟ୍ ମଧ୍ୟରେ ବିଭିନ୍ନ ଦେବାଦେବୀଙ୍କ ଠାରେ ନୂଆଖାଇ ଅନ୍ନ ଲାଗି ହେବ। ଏହାପରେ ପରିବାରର ସମସ୍ତ ସଦସ୍ୟ ଏକାଠି ହୋଇ ନବାନ୍ନ ଗ୍ରହଣ କରିବେ। ପଶ୍ଚିମ ଓଡ଼ିଶାବାସୀଙ୍କ ଆରାଧ୍ୟ ଇଷ୍ଟଦେବୀ ମା’ ସମଲେଶ୍ୱରୀଙ୍କ ନିକଟରେ ନବାନ୍ନ ଅର୍ପଣ ପରେ ଲୋକେ ନୂଆ ଅନ୍ନ ଗ୍ରହଣ କରିବାର ପରମ୍ପରା ରହିଛି। ଏହାପରେ ପରିବାରର ସମସ୍ତେ ଏକାଠି ବସି ନୂଆ ଖାଇଥାନ୍ତି।

ନୂଆଖାଇ ପରେ ‘ଜୁହାର ଭେଟ’

ନୂଆଖାଇ କେବଳ ଏକ ପର୍ବ ନୁହେଁ, ଏହା ପଶ୍ଚିମ ଓଡ଼ିଶାର ପରମ୍ପରା, ସଂସ୍କୃତି ଓ ଭାଇଚାରାର ଏକ ଅନନ୍ୟ ପ୍ରତୀକ। ନୂଆଖାଇ ଦିନ ପରିବାରର ସମସ୍ତ ସଦସ୍ୟ ଏକାଠି ହୁଅନ୍ତି, ବଡ଼ମାନଙ୍କର ଆଶୀର୍ବାଦ ନିଅନ୍ତି ଏବଂ ପରସ୍ପରଙ୍କୁ ‘ନୂଆଖାଇ ଜୁହାର’ ଜଣାଇଥାନ୍ତି। ନୂଆଖାଇ ପରେ ଆରମ୍ଭ ହୁଏ ‘ଜୁହାର ଭେଟ’ର ପରମ୍ପରା। ଏହି ଅବସରରେ ଆତ୍ମୀୟସ୍ୱଜନ, ବନ୍ଧୁବାନ୍ଧବ ଓ ପରିଚିତମାନେ ପରସ୍ପରଙ୍କୁ ଭେଟି ଶୁଭେଚ୍ଛା ଜଣାଇବା ସହ ବଡ଼ମାନଙ୍କ ଆଶୀର୍ବାଦ ନେଇଥାନ୍ତି। ଦୂରଦୂରାନ୍ତରେ ରହୁଥିବା ଲୋକମାନେ ମଧ୍ୟ ଏହି ଅବସରରେ ନିଜ ଗାଁ ଓ ପରିବାର ପାଖକୁ ଫେରି ଆସନ୍ତି। ଫଳରେ ଘରେ ଘରେ ଆନନ୍ଦ, ଆତ୍ମୀୟତା ଓ ଭାଇଚାରାର ପରିବେଶ ସୃଷ୍ଟି ହୁଏ।

ମାଟି, ଚାଷ ଓ ନୂଆ ଫସଲ ପ୍ରତି କୃତଜ୍ଞତା ଜଣାଇବାର ଏହି ପର୍ବ ପଶ୍ଚିମ ଓଡ଼ିଶାର ଲୋକଜୀବନ ସହ ଓତପ୍ରୋତ ଭାବେ ଜଡ଼ିତ। ନୂଆଖାଇ ତେଣୁ କେବଳ ନୂଆ ଅନ୍ନ ଖାଇବାର ପର୍ବ ନୁହେଁ, ବରଂ ଏହା ସଂସ୍କୃତି, ପରମ୍ପରା, ମାଟି ଓ ଭାଇଚାରାର ଅମୂଲ୍ୟ ପରିଚୟ।