ନୋଏଡା ଇଣ୍ଟରନ୍ୟାସନାଲ୍ ଏୟାରପୋର୍ଟରୁ ଉଡ଼ିଲା ପ୍ରଥମ ବାଣିଜ୍ୟିକ ବିମାନ, ଜମି ଦେଇଥିବା ୧୭୨ ଚାଷୀ ହେଲେ ପ୍ରଥମ ଯାତ୍ରୀ

ଜେୱର: ନୋଏଡା ଇଣ୍ଟରନ୍ୟାସନାଲ ଏୟାରପୋର୍ଟରୁ ପ୍ରଥମ କର୍ମସିଆଲ ବିମାନ ଉଡ଼ାଣ  ।  ଉତ୍ତର ପ୍ରଦେଶର ଜେୱରସ୍ଥିତ ନୋଏଡା ଇଣ୍ଟରନ୍ୟାସନାଲ୍ ଏୟାରପୋର୍ଟ ସୋମବାରଠାରୁ ଔପଚାରିକ ଭାବେ ବାଣିଜ୍ୟିକ ସେବା ଆରମ୍ଭ । ଏହି ଅବସରରେ ଏୟାରପୋର୍ଟ ନିର୍ମାଣ ପାଇଁ ଜମି ଦେଇଥିବା ୧୭୨ ଜଣ ଚାଷୀ ପ୍ରଥମ ଯାତ୍ରୀ ଭାବେ ଇଣ୍ଡିଗୋ ବିମାନରେ ଲକ୍ଷ୍ଣୌ ଯାତ୍ରା କରିଛନ୍ତି। ଏହି ଚାଷୀମାନଙ୍କ ମଧ୍ୟରେ ୨୦ ଜଣ ମହିଳା ମଧ୍ୟ ରହିଥିଲେ। ଜେୱର ବିଧାୟକ ଧୀରେନ୍ଦ୍ର ସିଂହ ଏବଂ ଯମୁନା ଏକ୍ସପ୍ରେସୱେ ଇଣ୍ଡଷ୍ଟ୍ରିଆଲ୍ ଡେଭଲପମେଣ୍ଟ ଅଥରିଟି (YEIDA)ର ଅଧିକାରୀମାନେ ମଧ୍ୟ ସେମାନଙ୍କ ସହ ଯାତ୍ରା କରିଥିଲେ। ଲକ୍ଷ୍ଣୌରେ ଚାଷୀମାନେ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଭେଟି ପ୍ରକଳ୍ପ ପାଇଁ କୃତଜ୍ଞତା ଜଣାଇବେ। ସକାଳ ପ୍ରାୟ ୭.୫୫ରେ ଲକ୍ଷ୍ଣୌରୁ ଆସିଥିବା ଇଣ୍ଡିଗୋର ପ୍ରଥମ ବିମାନ ନୋଏଡା ଏୟାରପୋର୍ଟରେ ଅବତରଣ କରିଥିଲା। ବିମାନଟିକୁ ପାରମ୍ପରିକ ‘ୱାଟର କ୍ୟାନନ୍ ସାଲ୍ୟୁଟ୍’ ଦେଇ ସ୍ୱାଗତ କରାଯାଇଥିଲା। ବିମାନ ଅବତରଣ କରିବା ମାତ୍ରେ ଯାତ୍ରୀମାନେ କରତାଳି ଦେଇ ଏହି ମୁହୂର୍ତ୍ତକୁ ସ୍ୱାଗତ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗତ ମାର୍ଚ୍ଚ ୨୮ରେ ଏହି ଏୟାରପୋର୍ଟର ଉଦଘାଟନ କରିଥିଲେ। ଦିଲ୍ଲୀ-ଏନସିଆର୍ ଅଞ୍ଚଳରେ ଇନ୍ଦିରା ଗାନ୍ଧୀ ଆନ୍ତର୍ଜାତିକ ବିମାନବନ୍ଦର ପରେ ଏହା ଦ୍ୱିତୀୟ ଆନ୍ତର୍ଜାତିକ ବିମାନବନ୍ଦର ଭାବେ କାର୍ଯ୍ୟ କରିବ। ଏହି ଦିନରୁ ବେଙ୍ଗାଲୁରୁକୁ ମଧ୍ୟ ନିୟମିତ ବାଣିଜ୍ୟିକ ବିମାନ ସେବା ଆରମ୍ଭ ହୋଇଛି। ଇଣ୍ଡିଗୋ ପର୍ଯ୍ୟାୟକ୍ରମେ ହାଇଦ୍ରାବାଦ, ଜୟପୁର, ଚଣ୍ଡୀଗଡ଼, ଅମୃତସର ସମେତ ୧୬ରୁ ଅଧିକ ସହରକୁ ସେବା ବିସ୍ତାର କରିବାକୁ ଯୋଜନା କରିଛି। ପ୍ରାୟ ୧,୩୩୪ ହେକ୍ଟର ଜମି ଉପରେ ନିର୍ମିତ ଏହି ଏୟାରପୋର୍ଟ ପ୍ରଥମ ପର୍ଯ୍ୟାୟରେ ବାର୍ଷିକ ୧.୨ କୋଟି ଯାତ୍ରୀଙ୍କୁ ସେବା ଦେବାର କ୍ଷମତା ରଖିଛି। ଭବିଷ୍ୟତରେ ଏହାକୁ ବିଶ୍ୱର ବୃହତ୍ତମ ବିମାନବନ୍ଦରମାନଙ୍କ ମଧ୍ୟରୁ ଗୋଟିଏରେ ପରିଣତ କରିବାକୁ ଯୋଜନା ରହିଛି। ଏୟାରପୋର୍ଟରେ ଅତ୍ୟାଧୁନିକ ସୁରକ୍ଷା ବ୍ୟବସ୍ଥା ସହ AI ଆଧାରିତ ନଜରଦାରି ପ୍ରଣାଳୀ ଲାଗୁ କରାଯାଇଛି। ପ୍ରାୟ ୧,୦୩୦ ଜଣ CISF କର୍ମଚାରୀଙ୍କୁ ନିଯୁକ୍ତ କରାଯାଇଥିବା ବେଳେ ସ୍ୱତନ୍ତ୍ର ପୁଲିସ ଥାନା, ଡଗ୍ ସ୍କ୍ୱାଡ୍, ଫାୟାର ଫାଇଟିଂ ୟୁନିଟ୍ ଓ ମେଡିକାଲ୍ ଏମର୍ଜେନ୍ସି ଟିମ୍ ମଧ୍ୟ ମୁତୟନ କରାଯାଇଛି। ନୋଏଡା ଇଣ୍ଟରନ୍ୟାସନାଲ୍ ଏୟାରପୋର୍ଟର ଶୁଭାରମ୍ଭ ଉତ୍ତର ପ୍ରଦେଶର ବିମାନ ଯୋଗାଯୋଗକୁ ନୂଆ ଦିଗ ଦେବା ସହ ରାଜ୍ୟର ଆର୍ଥିକ ଓ ବାଣିଜ୍ୟିକ ବିକାଶକୁ ଅଧିକ ଗତି ପ୍ରଦାନ କରିବ ବୋଲି ଆଶା କରାଯାଉଛି।