ଚାରି ଦିନର ହ୍ରାସ ପରେ ଶେୟାର ବଜାରରେ ସୁଧାର, ୫୩୦ ପଏଣ୍ଟ ବଢ଼ିଲା ସେନସେକ୍ସ

ମୁମ୍ବାଇ: ଲଗାତାର ଚାରିଟି କାରବାର ଦିନର ହ୍ରାସ ପରେ ଶୁକ୍ରବାର ସକାଳେ ଭାରତୀୟ ଶେୟାର ବଜାରରେ ଦେଖିବାକୁ ମିଳିଛି ସୁଧାର। ଏସୀୟ ବଜାରରେ ସକାରାତ୍ମକ କାରବାର ଏବଂ ବିଶ୍ୱ ବଜାରରୁ ମିଳିଥିବା ଭଲ ସଙ୍କେତ ଯୋଗୁଁ ନିବେଶକଙ୍କ ମନୋଭାବରେ ସୁଧାର ଆସିଛି। ଶୁକ୍ରବାର ସକାଳ କାରବାରରେ ସେନସେକ୍ସ ୫୩୧.୮୮ ପଏଣ୍ଟ ବା ୦.୭୦ ପ୍ରତିଶତ ବଢ଼ି ୭୬,୬୮୪.୭୪ ପଏଣ୍ଟରେ ପହଞ୍ଚିଥିଲା। ସେହିପରି ନିଫ୍ଟି ୭୮.୨୫ ପଏଣ୍ଟ ବା ୦.୩୩ ପ୍ରତିଶତ ବୃଦ୍ଧି ପାଇ ୨୩,୯୫୧.୭୦ ପଏଣ୍ଟରେ କାରବାର କରୁଥିଲା। ରିଲାଏନ୍ସ ଇଣ୍ଡଷ୍ଟ୍ରିଜ୍‌, ଇନଫୋସିସ୍‌, ଟାଇଟନ୍‌, ଏଚ୍‌ଡିଏଫ୍‌ସି ବ୍ୟାଙ୍କ, ବଜାଜ ଫିନସର୍ଭ ଏବଂ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ଭଳି ପ୍ରମୁଖ ଶେୟାରରେ କିଣାବିକା ଦେଖାଯାଇଥିଲା। ଅନ୍ୟପଟେ ଏକ୍ସିସ୍ ବ୍ୟାଙ୍କ ଓ ଆଇସିଆଇସିଆଇ ବ୍ୟାଙ୍କ ଭଳି କିଛି ଶେୟାର ଚାପରେ ରହିଥିଲା। ଗୁରୁବାର ଚାରି ଦିନର ଲଗାତାର ହ୍ରାସ ସହ ବଜାର ବନ୍ଦ ହୋଇଥିଲା। ତେବେ ଶୁକ୍ରବାର ଏସୀୟ ବଜାରର ରାଲି ଏବଂ ଆମେରିକୀୟ ବଜାରର ସକାରାତ୍ମକ ସଙ୍କେତ ଭାରତୀୟ ବଜାରକୁ ନୂଆ ଉତ୍ସାହ ଦେଇଛି। ତେବେ ବଢ଼ୁଥିବା କଚା ତେଲ ଦର ଏବଂ ବିଶ୍ୱ ଭୂ-ରାଜନୈତିକ ପରିସ୍ଥିତି ବଜାର ପାଇଁ ଏବେ ବି ଚିନ୍ତାର କାରଣ ହୋଇ ରହିଛି।