ବିଶ୍ୱପ୍ରସିଦ୍ଧ ରଥଯାତ୍ରା ୨୦୨୬ ପାଇଁ ଜୋରଦାର ପ୍ରସ୍ତୁତି, ୨୨୦ପ୍ଲାଟୁନ୍ ଫୋର୍ସ ଓ ୩୭୦ସ୍ୱତନ୍ତ୍ର ଟ୍ରେନ୍ ବ୍ୟବସ୍ଥା

ପୁରୀ: ବିଶ୍ଵପ୍ରସିଦ୍ଧ ରଥଯାତ୍ରା ୨୦୨୬ ପାଇଁ ଜୋରଦାର ପ୍ରସ୍ତୁତି, ୨୨୦ପ୍ଲାଟୁନ୍ ଫୋର୍ସ ଓ ୩୭୦ ସ୍ୱତନ୍ତ୍ର ଟ୍ରେନ୍ ବ୍ୟବସ୍ଥା ନେଇ ଦ୍ୱିତୀୟ ରଥ ସମନ୍ୱୟ କମିଟି ବୈଠକ । ରଥଯାତ୍ରା ୨୦୨୬କୁ ସୁରକ୍ଷିତ, ସୁଶୃଙ୍ଖଳ ଓ ଅଘଟଣମୁକ୍ତ କରିବା ପାଇଁ ରାଜ୍ୟ ସରକାର ଏବଂ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ଆରମ୍ଭ ହୋଇଛି। ଗତ ବର୍ଷର ତ୍ରୁଟି ଓ ଅନୁଭୂତିକୁ ଆଧାର କରି ଚଳିତ ବର୍ଷ ଜାନୁଆରୀ ମାସରୁ ପ୍ରସ୍ତୁତି ଆରମ୍ଭ କରାଯାଇଛି। ମଙ୍ଗଳବାର ପୁରୀ ଟାଉନ୍ ହଲ୍‌ରେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଅଧ୍ୟକ୍ଷତାରେ ଅନୁଷ୍ଠିତ ଦ୍ୱିତୀୟ ରଥ ସମନ୍ୱୟ କମିଟି ବୈଠକ । ବୈଠକରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ଚଳିତ ବର୍ଷ ରଥଯାତ୍ରା ପାଇଁ ୨୨୦ ପ୍ଲାଟୁନ୍ ପୋଲିସ୍ ଫୋର୍ସ ମୁତୟନ ହେବା ସହ ୩୭୦ଟି ସ୍ୱତନ୍ତ୍ର ଟ୍ରେନ୍ ଏବଂ ୧୩୦ଟି ସ୍ୱତନ୍ତ୍ର ବସ୍ ଚଳାଚଳ କରିବ। ସହରର ବିଭିନ୍ନ ସ୍ଥାନରେ ୬୫ଟି ବଡ଼ ଡିସପ୍ଲେ ସ୍କ୍ରିନ୍ ଲଗାଯିବାକୁ ଯୋଜନା ରହିଛି। ବୈଠକରେ ରଥ ନିର୍ମାଣ, ସ୍ୱାସ୍ଥ୍ୟ ସେବା, ପରିମଳ ବ୍ୟବସ୍ଥା, ବିଦ୍ୟୁତ୍ ଓ ପାନୀୟ ଜଳ ଯୋଗାଣ, ସୁରକ୍ଷା, ପରିବହନ, ରାସ୍ତାଘାଟ, ଡ୍ରେନେଜ୍ ଏବଂ ଅନ୍ୟାନ୍ୟ ବିଭାଗର ପ୍ରସ୍ତୁତି ସମୀକ୍ଷା କରାଯାଇଥିଲା। ରଥ ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଥିବା ବେଳେ ଏହାର ତଦାରଖ ପାଇଁ ସ୍ୱତନ୍ତ୍ର କମିଟି ଗଠନ କରାଯାଇଛି। ସ୍ୱାସ୍ଥ୍ୟ ସେବାକୁ ଗୁରୁତ୍ୱ ଦେଇ ରଥଯାତ୍ରା ସମୟରେ ୨୦୦ଟି ଅତିରିକ୍ତ ଶଯ୍ୟା ବ୍ୟବସ୍ଥା ସହ ସହରର ବିଭିନ୍ନ ସ୍ଥାନରେ ୩୦ଟି ଆଶୁ ଆରୋଗ୍ୟ କେନ୍ଦ୍ର ଖୋଲାଯିବ। ଏହାଛଡ଼ା ୨୩୦ ଜଣ ଡାକ୍ତର ଓ ବିଶେଷଜ୍ଞ ଚିକିତ୍ସକଙ୍କୁ ନିୟୋଜିତ କରାଯିବ। ପୁରୀରେ ସ୍ଥାୟୀ ବର୍ଣ୍ଣ ୟୁନିଟ୍ ଓ ପାଥୋଲ୍ୟାବ୍ ସ୍ଥାପନ ପାଇଁ ମଧ୍ୟ ପଦକ୍ଷେପ ନିଆଯାଇଛି। ସହରର ପରିମଳ ଓ ଡ୍ରେନେଜ୍ ବ୍ୟବସ୍ଥାକୁ ସୁଦୃଢ଼ କରିବା ପାଇଁ ପ୍ରମୁଖ ଡ୍ରେନ୍‌ଗୁଡ଼ିକ ସଫା କରାଯାଇଛି। ବର୍ଷା ଜଳ ନିଷ୍କାସନ ପାଇଁ ଉଚ୍ଚ କ୍ଷମତାସମ୍ପନ୍ନ ପାୱାର ପମ୍ପ ବ୍ୟବସ୍ଥା ରହିବ। ସହରରେ ମୋଟ ୧୬୦୦ଟି ଅସ୍ଥାୟୀ ଶୌଚାଳୟ ସ୍ଥାପନ କରାଯିବ। ସୁରକ୍ଷା ଦୃଷ୍ଟିରୁ ସମଗ୍ର ପୁରୀ ସହର ସିସିଟିଭି ନଜରରେ ରହିବ। ମୋଟ ୪୭୫ଟି ସିସିଟିଭି କ୍ୟାମେରା ଲଗାଯିବାକୁ ଥିବା ବେଳେ ୧୭୦ଟି କ୍ୟାମେରା ଏବେଠାରୁ କାର୍ଯ୍ୟକ୍ଷମ ହୋଇସାରିଛି। ଜନଗହଳି ନିୟନ୍ତ୍ରଣ ପାଇଁ ୨୮ଟି ଜରୁରୀକାଳୀନ ପ୍ରସ୍ଥାନ ପଏଣ୍ଟ, ଆମ୍ବୁଲାନ୍ସ ଗ୍ରୀନ୍ କରିଡର ଏବଂ ବିଶେଷ ଟ୍ୟାକ୍ଟିକାଲ୍ ୟୁନିଟ୍ ସହ ଏନଏସଜିର ସହଯୋଗ ରହିବ। ଯାତ୍ରୀମାନଙ୍କ ସୁବିଧା ପାଇଁ ‘ସହାୟତା’ ଆପ୍ କାର୍ଯ୍ୟକାରୀ କରାଯିବ। ଟ୍ରାଫିକ୍ ନିୟନ୍ତ୍ରଣ, ଜନଗହଳି ପରିଚାଳନା, ଆଇନ-ଶୃଙ୍ଖଳା ଓ ରଥଟଣା ଭଳି ଗୁରୁତ୍ୱପୂର୍ଣ୍ଣ ଦାୟିତ୍ୱରେ ବରିଷ୍ଠ ଆଇପିଏସ୍ ଅଧିକାରୀମାନେ ନିୟୋଜିତ ହେବେ। ପ୍ରାୟ ୧୫ ଲକ୍ଷ ଭକ୍ତଙ୍କ ସମାଗମ ସମ୍ଭାବନାକୁ ଦୃଷ୍ଟିରେ ରଖି ସମସ୍ତ ବିଭାଗ ମଧ୍ୟରେ ସମନ୍ୱୟ ରଖି ରଥଯାତ୍ରା ପରିଚାଳନା କରାଯିବ ବୋଲି ବୈଠକରେ ସୂଚନା ଦିଆଯାଇଛି। ବୈଠକରେ ୧୪ ଟି ବିଭାଗର ରଥଯାତ୍ରା ପ୍ରସ୍ତୁତି ନେଇ ଆଲୋଚନା ହୋଇଥିବା ସହ  ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ,ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାୟକ, ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୁରଜ୍ ,ରାଜ୍ୟସଭା ସାଂସଦ ଶୁଭାଶିଷ ଖୁଣ୍ଟିଆ,ପୁରୀ ,ସତ୍ୟବାଦୀ ଓ ପିପିଲି ବିଧାୟକ,ଜିଲ୍ଲାପାଳ,ଏସପି, ଅତିରିକ୍ତ ଡିଜି ଓ ଅନ୍ୟାନ୍ୟ ବରିଷ୍ଠ ଅଧିକାରୀ ଯୋଗ  ଦେଇଥିଲେ।