Govardhan Puja: କେଉଁ ଦିନ ପାଳନ ହେବ ଗୋବର୍ଦ୍ଧନ ପୂଜା? ନଭେମ୍ବର ୯ ନା ୧୦

ଭୁବନେଶ୍ୱର: ଦୀପାବଳିର ପରଦିନ ପାଳନ କରାଯାଏ ଗୋବର୍ଦ୍ଧନ ପୂଜା। ଏହି ଦିନ ଗୋବର୍ଦ୍ଧନ ମହାରାଜ, ଗୋମାତା ଓ ଭଗବାନ ଶ୍ରୀକୃଷ୍ଣଙ୍କ ପୂଜାର ବିଶେଷ ମହତ୍ତ୍ୱ ରହିଛି। ତେବେ ୨୦୨୬ରେ ଏହି ପର୍ବର ତାରିଖକୁ ନେଇ ଦ୍ୱନ୍ଦ୍ୱ ଦେଖାଦେଇଛି। କେହି ନଭେମ୍ବର ୯ ତାରିଖ କହୁଥିବା ବେଳେ ଆଉ କେହି ନଭେମ୍ବର ୧୦ ତାରିଖରେ ପୂଜା କରିବାକୁ କହୁଛନ୍ତି।

ହିନ୍ଦୁ ପଞ୍ଜିକା ଅନୁସାରେ କାର୍ତ୍ତିକ ଶୁକ୍ଳ ପକ୍ଷ ପ୍ରତିପଦା ତିଥିରେ ଗୋବର୍ଦ୍ଧନ ପୂଜା ହୁଏ। ଚଳିତ ବର୍ଷ ପ୍ରତିପଦା ତିଥି ନଭେମ୍ବର ୯ ତାରିଖ ମଧ୍ୟାହ୍ନ ୧୨ଟା ୩୨ରୁ ଆରମ୍ଭ ହୋଇ ନଭେମ୍ବର ୧୦ ତାରିଖ ଅପରାହ୍ନ ୨ଟା ୧ ମିନିଟ୍‌ରେ ଶେଷ ହେବ। ଉଦୟା ତିଥି ଅନୁସାରେ ୧୦ ନଭେମ୍ବର ମଙ୍ଗଳବାର ଦିନ ଗୋବର୍ଦ୍ଧନ ପୂଜା ପାଳନ କରାଯିବ।

ଗୋବର୍ଦ୍ଧନ ପୂଜାର ମହତ୍ତ୍ୱ

ପୌରାଣିକ କଥା ଅନୁସାରେ, ଭଗବାନ ଶ୍ରୀକୃଷ୍ଣ ଦେବରାଜ ଇନ୍ଦ୍ରଙ୍କ କ୍ରୋଧରୁ ବ୍ରଜବାସୀଙ୍କୁ ରକ୍ଷା କରିବା ପାଇଁ ନିଜ କନିଷ୍ଠ ଆଙ୍ଗୁଠିରେ ଗୋବର୍ଦ୍ଧନ ପର୍ବତ ଉଠାଇଥିଲେ। ସେହି ଦିନଠାରୁ ଗୋବର୍ଦ୍ଧନ ପୂଜାର ପରମ୍ପରା ଆରମ୍ଭ ହୋଇଥିବା ବିଶ୍ୱାସ ରହିଛି। ଏହି ପର୍ବ ପ୍ରକୃତି, ଗୋ-ସମ୍ପଦ ଓ ଅନ୍ନ ପ୍ରତି କୃତଜ୍ଞତାର ପ୍ରତୀକ।

ପୂଜା ବିଧି

ଏହି ଦିନ ଘର ଅଗଣାରେ ଗୋବରରେ ଗୋବର୍ଦ୍ଧନ ପର୍ବତର ଆକୃତି ତିଆରି କରି ଫୁଲ ଓ ରଙ୍ଗୋଲିରେ ସଜାଯାଏ। ପରେ ରୋଲି, ଅକ୍ଷତ, ଫୁଲ, ଧୂପ ଓ ଦୀପ ଅର୍ପଣ କରାଯାଏ। ଭଗବାନ ଶ୍ରୀକୃଷ୍ଣଙ୍କୁ ୫୬ ଭୋଗ ସମେତ ଖିରି, ମିଠା ଓ ବିଭିନ୍ନ ପ୍ରକାରର ଅନ୍ନକୂଟ ଭୋଗ ଲଗାଯାଏ। ଏହାପରେ ସାତ ଥର ପରିକ୍ରମା କରି ଗୋମାତାଙ୍କୁ ଚାରା ଖାଇବାକୁ ଦିଆଯାଏ।

ଏହି ଦିନ ଗୋ-ସେବା ଓ ଅନ୍ନକୂଟ ପ୍ରସାଦ ବଣ୍ଟନର ବିଶେଷ ମହତ୍ତ୍ୱ ରହିଛି। ଗୋବର୍ଦ୍ଧନ ପୂଜା ଦିନ ଅନ୍ନକୂଟ ଉତ୍ସବ ପାଳନ କରାଯାଏ। ଅନ୍ନକୂଟର ଅର୍ଥ ହେଉଛି ଅନ୍ନର ପାହାଡ଼। ଏହି ଦିନ ଭଗବାନ ଶ୍ରୀକୃଷ୍ଣଙ୍କୁ ୫୬ ପ୍ରକାରର ଭୋଗ ସମେତ ବିଭିନ୍ନ ପ୍ରକାରର ଖାଦ୍ୟ, ମିଠା, ଫଳ ଓ ପନିପରିବା ଅର୍ପଣ କରାଯାଏ। ପୂଜା ପରେ ଏହି ଭୋଗକୁ ପ୍ରସାଦ ଭାବେ ଭକ୍ତମାନଙ୍କ ମଧ୍ୟରେ ବଣ୍ଟନ କରାଯାଏ। ଅନ୍ନକୂଟ ଭୋଗ ଅର୍ପଣ କଲେ ପରିବାରରେ କେବେ ଅନ୍ନ ଓ ଧନର ଅଭାବ ରହେ ନାହିଁ ବୋଲି ବିଶ୍ୱାସ ରହିଛି।