ଚାଷୀଙ୍କୁ ଦୁଃଖ ଦେଉଛି ଅଦିନିଆ ବର୍ଷା.. ଧାନ ବିକ୍ରି ନେଇ ବଢୁଛି ଚିନ୍ତା।

ସୁଧୁରୁନି ମଣ୍ଡି ଟେନସନ୍। ଖୋଲା ଆକାଶ ତଳେ ପଡିଛି ଧାନ, ସେପଟେ ଅଦିନିଆ ବର୍ଷା ଓ କାଳବୈଶାଖୀର ତାଣ୍ଡବ ଯୋଗୁଁ ଭିଜିଯାଉଛି ଧାନ । ଫଳରେ କିପରି ବିକିବେ ଧାନ ସେନେଇ ବଢୁଛି ଚାଷୀଙ୍କ ଚିନ୍ତା।  କଳାହାଣ୍ଡି ଜିଲ୍ଲା ମୂଖିଗୁଡା ନିୟନ୍ତ୍ରିତ ବଜାର କମିଟି କପୁରମାଲ ସବ୍‌ ମଣ୍ଡିରେ ଖୋଲା ଆକାଶ ତଳେ ପଡି ରହିଛି କ୍ବିଣ୍ଟାଲ କ୍ବିଣ୍ଟାଲ ଧାନ । ନିଜର କଷ୍ଟ ଉପାର୍ଜିତ ଧାନକୁ ବିକ୍ରି କରିବା ଆଶାରେ ଚାଷୀମାନେ ମଣ୍ଡିରେ ଗଛିତ କରି ରଖିଥିବା ବେଳେ, ତାଙ୍କୁ ଦାଉ ସାଧୁଛି ଅଦିନିଆ ବର୍ଷା ସହ କାଳବୈଶାଖୀର ତାଣ୍ଡବ, ଫଳରେ ନିଜର କଷ୍ଟ ଉପର୍ଜିତ ଧାନ ଭିଜୁଥିବା ବେଳେ ଧାନ ବିକ୍ରିକୁ ନେଇ ଚିନ୍ତାରେ ଚାଷୀ। ଚାଷୀଙ୍କ କହିବାନୁସାରେ, ଧାନ ଭିଜିଗଲା ପରେ ମିଲର ଓ ପ୍ୟାକ୍ସ କର୍ମଚାରୀମାନେ ମାନ ହ୍ରାସ ନେଇ ଅଧିକ କଟନୀଛଟନୀ କରୁଛନ୍ତି। ସାଧାରଣତଃ ପାଞ୍ଚରୁ ଛଅ କିଲୋ କଟାଯାଉଥିବା ବେଳେ, ଭିଜା ଧାନରେ ସାତରୁ ଦଶ କିଲୋ ପର୍ଯ୍ୟନ୍ତ କାଟାଯାଉଥିବା ନେଇ ଅଭିଯୋଗ ଆଣିଛନ୍ତି ଚାଷୀ। ଫଳରେ, ନିରିହ ଚାଷୀମାନେ ଆର୍ଥିକ ଭାବେ ପେଶୀ ହେଉଛନ୍ତି। ଅନ୍ୟପଟେ, ବର୍ତ୍ତମାନ ସମୟରେ ଧାନ ଉଠାଣ ପ୍ରକ୍ରିୟା ଅତ୍ୟନ୍ତ ଧୀର ଗତିରେ ଚାଲିଥିବାରୁ ଚାଷୀମାନଙ୍କ ଚିନ୍ତା ବଢ଼ିଛି। ବହୁ କଷ୍ଟରେ ଚାଷ କରିଥିବା ଧାନକୁ ବିକ୍ରି କରିବା ପାଇଁ ସେମାନେ ଦୀର୍ଘଦିନ ଧରି ଅପେକ୍ଷା କରୁଛନ୍ତି କିନ୍ତୁ ମଣ୍ଡିକୁ ଆସୁନାହାନ୍ତି ମିଲର । ସେପଟେ ପରିସ୍ଥିତିକୁ ଦୃଷ୍ଟିରେ ରଖି ଜିଲ୍ଲା ପ୍ରଶାସନ ତୁରନ୍ତ କପୁରମାଲ ମଣ୍ଡିରେ ଗଛିତ ଧାନର ଶୀଘ୍ର ଉଠାଣ ବ୍ୟବସ୍ଥା କରିବାକୁ ସାଧାରଣରେ ଦାବି ଜୋର ଧରିଛି।