ପତ୍ନୀ, ପ୍ରେମିକ ଓ ସୁପାରି କିଲରଙ୍କ ଚକ୍ରାନ୍ତରେ ଇଞ୍ଜିନିୟରଙ୍କ ହତ୍ୟା

ମହାରାଷ୍ଟ୍ରର କରାଡ଼ଠାରେ ଜଳସମ୍ପଦ ବିଭାଗର ଜଣେ ଇଞ୍ଜିନିୟରଙ୍କ ମୃତ୍ୟୁ ମାମଲାରେ ଏକ ଚାଞ୍ଚଲ୍ୟକର ଖୁଲାସା ହୋଇଛି। ପ୍ରାଥମିକ ଅବସ୍ଥାରେ ଏହା ଏକ ସଡ଼କ ଦୁର୍ଘଟଣା ଭଳି ମନେହେଉଥିବା ବେଳେ, ପୋଲିସ ତଦନ୍ତରୁ ଜଣାପଡ଼ିଛି ଯେ ଏହା କୌଣସି ଦୁର୍ଘଟଣା ନୁହେଁ ବରଂ ଏକ ସୁଚିନ୍ତିତ ହତ୍ୟାକାଣ୍ଡ । ମୃତକ ହେଉଛନ୍ତି ଇଞ୍ଜିନିୟର ଲକ୍ଷ୍ମଣ ମଣ୍ଡଳେ । ସେ ଜୁନ 6  ସକାଳେ ବସରୁ ଓହ୍ଲାଇ ଘରକୁ ଯାଉଥିବା ବେଳେ ଏକ କାର ଦ୍ରୁତଗତିରେ ଆସି ତାଙ୍କୁ ଧକ୍କା ଦେଇଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଥିଲା। ପୋଲିସର ସୂଚନା ଅନୁଯାୟୀ, ଏହି ହତ୍ୟାକାଣ୍ଡ ପଛରେ ଇଞ୍ଜିନିୟରଙ୍କ ସ୍ତ୍ରୀ, ତାଙ୍କ ପ୍ରେମିକ ଏବଂ ଜଣେ ସୁପାରୀ କିଲରଙ୍କ ହାତ ରହିଛି। ସ୍ତ୍ରୀ ନିଜ ପ୍ରେମିକ ସହ ମିଶି ସ୍ୱାମୀଙ୍କୁ ରାସ୍ତାରୁ ହଟାଇବା ପାଇଁ ଏହି ଭୟଙ୍କର ଯୋଜନା ପ୍ରସ୍ତୁତ କରିଥିଲେ। ଏହି ରହସ୍ୟମୟ ହତ୍ୟାକାଣ୍ଡର ପର୍ଦ୍ଦାଫାଶ କରିବା ପାଇଁ ପୋଲିସ ସିସିଟିଭି  ଫୁଟେଜ୍, ମୋବାଇଲ୍ ଲୋକେସନ୍ ଏବଂ ଫୋରେନ୍‌ସିକ୍ ପ୍ରମାଣ ସଂଗ୍ରହ କରିଥିଲା । ଏହି ସବୁ ଗୁରୁତ୍ୱପୂର୍ଣ୍ଣ ପ୍ରମାଣ ଆଧାରରେ ପୋଲିସ ଘଟଣାର ସତ୍ୟାସତ୍ୟ ସାମ୍ନାକୁ ଆଣିବା ସହ ମୁଖ୍ୟ ଅଭିଯୁକ୍ତ ପତ୍ନୀଙ୍କ ସମେତ ଅନ୍ୟ କେତେକ ସହଯୋଗୀ ଅଭିଯୁକ୍ତଙ୍କୁ ଗିରଫ କରିଛି। ବର୍ତ୍ତମାନ ପୋଲିସ ଏହି ମାମଲାର ଅଧିକ ତଦନ୍ତ ଜାରି ରଖିଛି।