ଶିକ୍ଷକ ହେବାର ସ୍ୱପ୍ନରେ ବଡ଼ ଝଟକା, ଆନ୍ଧ୍ର ବି.ଇଡି ନାଁରେ ଲକ୍ଷାଧିକ ଟଙ୍କାର ଠକେଇ

ବଲାଙ୍ଗୀର: ଶିକ୍ଷକ ହେବାର ସ୍ୱପ୍ନ ଦେଖୁଥିବା ଶହ ଶହ ଯୁବକ-ଯୁବତୀଙ୍କ ଭବିଷ୍ୟତ ସହ ଖେଳ ହୋଇଥିବା ଅଭିଯୋଗ ସାମ୍ନାକୁ ଆସିଛି। ବି.ଇଡି (B.Ed) ସିଟ୍ ଏବଂ ସାର୍ଟିଫିକେଟ୍ ଯୋଗାଇ ଦେବା ନାଁରେ ଲକ୍ଷ ଲକ୍ଷ ଟଙ୍କା ଆଦାୟ କରି ଠକେଇ କରାଯାଇଥିବା ଅଭିଯୋଗରେ ପଶ୍ଚିମ ଓଡ଼ିଶାରେ ଚର୍ଚ୍ଚା ଜୋର ଧରିଛି। ବଲାଙ୍ଗୀର, ବରଗଡ଼, ନୂଆପଡ଼ା ଓ କଳାହାଣ୍ଡି ଜିଲ୍ଲାର ଅନେକ ଛାତ୍ରଛାତ୍ରୀ ଏହି ଠକେଇର ଶିକାର ହୋଇଥିବା ଜଣାପଡ଼ିଛି। କଣ୍ଟାବାଞ୍ଜିର 'ରିମ୍ସ ଇନଷ୍ଟିଚ୍ୟୁଟ୍' ନାମକ ଏକ ସଂସ୍ଥା ଆନ୍ଧ୍ରପ୍ରଦେଶରୁ ବି.ଇଡି ସାର୍ଟିଫିକେଟ୍ ଆଣିଦେବାର ପ୍ରତିଶ୍ରୁତି ଦେଇ ଛାତ୍ରଛାତ୍ରୀଙ୍କଠାରୁ ବଡ଼ ଅଙ୍କର ଟଙ୍କା ନେଇଥିଲା। ଅଭିଯୋଗ ଅନୁଯାୟୀ, ପିଲାମାନେ ପରୀକ୍ଷା ମଧ୍ୟ ଦେଇଥିଲେ। କିନ୍ତୁ ଦୀର୍ଘ ସମୟ ବିତିଯାଇଥିଲେ ମଧ୍ୟ ସେମାନଙ୍କୁ ବି.ଇଡି ସାର୍ଟିଫିକେଟ୍ ପ୍ରଦାନ କରାଯାଇନଥିଲା। ଏହାପରେ ଉତ୍ୟକ୍ତ ଛାତ୍ରଛାତ୍ରୀମାନେ ସଂସ୍ଥାର ମୁଖ୍ୟ ପତିତପାବନ ହେର୍ଣ୍ଣାଙ୍କୁ ଅଟକ ରଖି ପୋଲିସ ଜିମା ଦେଇଥିଲେ।

କାହିଁକି ବଢୁଛି ଏଭଳି ଠକେଇ?

ବିଶେଷଜ୍ଞଙ୍କ ମତରେ, ଓଡ଼ିଶାରେ ବି.ଇଡି ସିଟ୍ ସଂଖ୍ୟା ଅତ୍ୟନ୍ତ ସୀମିତ ଥିବାରୁ ଏଭଳି ଠକେଇ ବଢୁଛି। ରାଜ୍ୟର ସରକାରୀ ଓ ବେସରକାରୀ କଲେଜ ମିଶାଇ ପ୍ରାୟ ୨,୮୦୦ଟି ବି.ଇଡି ସିଟ୍ ରହିଛି। ପ୍ରତିବର୍ଷ ହଜାର ହଜାର ଆଶାୟୀ ଶିକ୍ଷକ ଏହି ପାଠ୍ୟକ୍ରମରେ ନାମ ଲେଖାଇବାକୁ ଚାହୁଁଥିବା ବେଳେ ଅନେକେ ସିଟ୍ ପାଇନଥାନ୍ତି। ଏହି ସୁଯୋଗର ଅଭାବକୁ ପୁଞ୍ଜି କରି କିଛି ଦଲାଲ ଓ ଅସାଧୁ ସଂସ୍ଥା ବାହାର ରାଜ୍ୟରେ ଆଡମିଶନ୍ କରାଇଦେବା ନାଁରେ ଯୁବପିଢ଼ୀଙ୍କୁ ଠକୁଥିବା ଅଭିଯୋଗ ହେଉଛି। ଘଟଣାର ତଦନ୍ତ କରୁଥିବା ପୋଲିସ ଅଭିଯୁକ୍ତଙ୍କୁ ୧୦ ଦିନ ମଧ୍ୟରେ ସାର୍ଟିଫିକେଟ୍ ଯୋଗାଇବାକୁ ସମୟ ଦେଇଥିବା ସୂଚନା ମିଳିଛି। ତେବେ ନିଜର କଷ୍ଟ ଅର୍ଜିତ ଟଙ୍କା ଏବଂ ଭବିଷ୍ୟତକୁ ନେଇ ଏବେ ଚିନ୍ତାରେ ଅଛନ୍ତି ଶତାଧିକ ଛାତ୍ରଛାତ୍ରୀ ଓ ସେମାନଙ୍କ ପରିବାର।