ଜିଲ୍ଲା ପୋଲିସ ପକ୍ଷରୁ ‘ମୋବାଇଲ ଫେରସ୍ତ ମେଳା, ୬୨ଟି ମୋବାଇଲ ଫେରି ପାଇଲେ ଲୋକେ

ଫୁଲବାଣୀ: ମୋବାଇଲ ଫେରସ୍ତ ମେଳାର ଆୟୋଜନ ।  ଫୁଲବାଣୀ ସ୍ଥିତ ରିଜର୍ଭ ପୋଲିସ ପଡ଼ିଆରେ ଜିଲ୍ଲା ପୋଲିସ ପକ୍ଷରୁ ଆୟୋଜିତ ‘ମୋବାଇଲ ଫେରସ୍ତ ମେଳା’ କାର୍ଯ୍ୟକ୍ରମ ଆୟୋଜନ କରାଯାଇଥିଲା । ବର୍ଷ ବର୍ଷ ଧରି ହଜିଯାଇଥିବା କିମ୍ବା ଚୋରି ହୋଇଥିବା ମୋବାଇଲ ଫୋନ୍ ଫେରି ପାଇ ଖୁସି ହୋଇଛନ୍ତି କନ୍ଧମାଳ ଜିଲ୍ଲାର ଅନେକ ଲୋକ। ଜିଲ୍ଲା ପୋଲିସ ପକ୍ଷରୁ ଫୁଲବାଣୀସ୍ଥିତ ରିଜର୍ଭ ପୋଲିସ ପଡ଼ିଆରେ ଆୟୋଜିତ ‘ମୋବାଇଲ ଫେରସ୍ତ ମେଳା’ରେ ପ୍ରକୃତ ମାଲିକମାନଙ୍କୁ ସେମାନଙ୍କ ମୋବାଇଲ ଫେରାଇ ଦିଆଯାଇଛି। ଏହି ଅବସରରେ କନ୍ଧମାଳ ଏସ୍‌ପି ରାମେନ୍ଦ୍ର ପ୍ରସାଦ ଉପସ୍ଥିତ ରହି ଲୋକଙ୍କ ହାତରେ ମୋବାଇଲ ହସ୍ତାନ୍ତର କରିଥିଲେ। ସେ କହିଛନ୍ତି ଯେ, ଜୁନ୍ ୧ରୁ ୧୫ ତାରିଖ ପର୍ଯ୍ୟନ୍ତ ଜିଲ୍ଲା ପୋଲିସ ପକ୍ଷରୁ ଏକ ସ୍ୱତନ୍ତ୍ର ଅଭିଯାନ ଚାଲିଥିଲା। ବିଭିନ୍ନ ଥାନାରେ ରୁଜୁ ହୋଇଥିବା ମୋବାଇଲ ଚୋରି ଓ ହଜିବା ସମ୍ବନ୍ଧୀୟ ମାମଲାର ତଦନ୍ତ କରାଯାଇଥିଲା। ଏହି ସ୍ୱତନ୍ତ୍ର ଡ୍ରାଇଭ୍‌ ମାଧ୍ୟମରେ ମୋଟ ୬୨ଟି ମୋବାଇଲ ଫୋନ୍ ଉଦ୍ଧାର କରାଯାଇଥିବା ବେଳେ ସେଗୁଡ଼ିକର ଆନୁମାନିକ ମୂଲ୍ୟ ପ୍ରାୟ ୧୨ ଲକ୍ଷ ଟଙ୍କା ବୋଲି ଏସ୍‌ପି ସୂଚନା ଦେଇଛନ୍ତି। ଏହାସହ ସେ ଲୋକମାନଙ୍କୁ ସେକେଣ୍ଡ ହ୍ୟାଣ୍ଡ ମୋବାଇଲ କିଣିବା ବେଳେ ସତର୍କ ରହିବାକୁ ପରାମର୍ଶ ଦେଇଛନ୍ତି। ମୋବାଇଲ କିଣିବା ପୂର୍ବରୁ ଏହାର ବୈଧତା ଓ ମାଲିକାନା ସମ୍ପର୍କରେ ଯାଞ୍ଚ କରିବାକୁ ସେ ଅନୁରୋଧ କରିଛନ୍ତି। ପୋଲିସର ଏହି ପଦକ୍ଷେପକୁ ସାଧାରଣ ଲୋକ ପ୍ରଶଂସା କରିଥିବା ବେଳେ ମୋବାଇଲ ଫେରି ପାଇଥିବା ବ୍ୟକ୍ତିମାନେ ଜିଲ୍ଲା ପୋଲିସକୁ ଧନ୍ୟବାଦ ଜଣାଇଛନ୍ତି।