ରାହୁଲ ଗାନ୍ଧୀ ନିଟ୍ ଆଶାୟୀଙ୍କୁ ଭ୍ରମିତ କରୁଛନ୍ତି, ଯୁବପିଢ଼ୀଙ୍କ ମନରେ ଭୟ ସୃଷ୍ଟି କରୁଛନ୍ତି: ଧର୍ମେନ୍ଦ୍ର ପ୍ରଧାନ

ନୂଆଦିଲ୍ଲୀ : ନିଟ ପରୀକ୍ଷା ବିବାଦକୁ ନେଇ ଏବେ ସରଗରମ ଦେଶର ରାଜନୀତି । ବିରୋଧୀ ଦଳର ନେତା ରାହୁଲ ଗାନ୍ଧୀ ଓ କଂଗ୍ରେସକୁ କଡ଼ା ସମାଲୋଚନା କରିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ରାହୁଲ ଗାନ୍ଧୀ ନିଟ୍ ପରୀକ୍ଷାର୍ଥୀ ଏବଂ ଦେଶର ଯୁବପିଢ଼ିଙ୍କୁ ବିଭ୍ରାନ୍ତ କରୁଛନ୍ତି। ଯୁବପିଢ଼ିଙ୍କ ମନରେ ଭୟ ସୃଷ୍ଟି ନ କରିବାକୁ ସେ ବିରୋଧୀଙ୍କୁ ପରାମର୍ଶ ଦେଇଛନ୍ତି। NEET-UG ପରୀକ୍ଷାରେ ଅନିୟମିତତା ଏବଂ ପ୍ରଶ୍ନପତ୍ର ଲିକ୍‌ ଅଭିଯୋଗକୁ ନେଇ ବିରୋଧୀ ଦଳ କେନ୍ଦ୍ର ଶିକ୍ଷାମନ୍ତ୍ରୀଙ୍କ ଇସ୍ତଫା ଦାବି କରୁଥିବା ବେଳେ, ଏବେ ପାଲଟା ଆକ୍ରମଣ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। କଂଗ୍ରେସ ଏହି ସମ୍ବେଦନଶୀଳ ପ୍ରସଙ୍ଗରେ ଶସ୍ତା ରାଜନୀତି କରୁଛି ବୋଲି ସେ ଅଭିଯୋଗ କରିଛନ୍ତି। ଧର୍ମେନ୍ଦ୍ର ସ୍ପଷ୍ଟ କରିଛନ୍ତି ଯେ, ଛାତ୍ରଛାତ୍ରୀଙ୍କ ଭବିଷ୍ୟତ ସହ କୌଣସି ରାଜନୈତିକ ବାର୍ତ୍ତାଳାପ ବା ମୂଲଚାଲ୍ କରାଯାଇପାରିବ ନାହିଁ। କଂଗ୍ରେସର କାର୍ଯ୍ୟକଳାପ ଉପରେ ପ୍ରଶ୍ନ ଉଠାଇ କେନ୍ଦ୍ରମନ୍ତ୍ରୀ କହିଛନ୍ତି ଯେ, ପରୀକ୍ଷାର ଠିକ କିଛି ଦିନ ପୂର୍ବରୁ କୋଟା ଭଳି ଏକ ପ୍ରମୁଖ କୋଚିଂ ହବରେ ବିରୋଧୀଙ୍କ ଦ୍ୱାରା ରାଲି ଆୟୋଜନ କରିବା ଆଦୌ ଉଚିତ ନଥିଲା। ଏହା ପରୀକ୍ଷାର୍ଥୀଙ୍କ ମନୋବଳକୁ ଦୋହଲାଇ ଦେଇଛି। କେବଳ ସେତିକି ନୁହେଁ, ବେଙ୍ଗାଲୁରୁରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କ ଏକ ରାଲି ଯୋଗୁଁ କର୍ଣ୍ଣାଟକର ୩ ଜଣ NEET ପରୀକ୍ଷାର୍ଥୀ ସମୟ ଅନୁସାରେ ନିଜ ପରୀକ୍ଷା କେନ୍ଦ୍ରରେ ପହଞ୍ଚି ପାରିନଥିଲେ। ଏଥିପାଇଁ ପରବର୍ତ୍ତୀ ସମୟରେ ଖଡ଼ଗେ କ୍ଷମା ମଧ୍ୟ ମାଗିଥିଲେ। ଏହାକୁ ନେଇ ଧର୍ମେନ୍ଦ୍ର କହିଛନ୍ତି ଯେ, ଯେଉଁମାନେ ପରୀକ୍ଷାର୍ଥୀଙ୍କ ସମସ୍ୟାର କାରଣ ସାଜୁଛନ୍ତି, ସେମାନେ ଆଜି କେଉଁ ଆଧାରରେ ଆମକୁ ଜ୍ଞାନ ବାଣ୍ଟୁଛନ୍ତି? ସେହିପରି ନ୍ୟାସନାଲ୍ ଟେଷ୍ଟିଂ ଏଜେନ୍ସି (NTA)ର କାର୍ଯ୍ୟଶୈଳୀକୁ ନେଇ ମଧ୍ୟ ଶିକ୍ଷାମନ୍ତ୍ରୀ ବଡ଼ ବୟାନ ଦେଇଛନ୍ତି। ଏନଟିଏ କିଛି ଶିକ୍ଷକଙ୍କ ଉପରେ ଭରସା କରିଥିଲା, କିନ୍ତୁ ସେମାନେ ନିଜ ଦାୟିତ୍ୱ ତୁଲାଇବାରେ ବିଫଳ ହେଲେ। ଅର୍ଥାତ୍ ଏଠାରେ "ରକ୍ଷକ ହିଁ ଭକ୍ଷକ" ସାଜିଲେ। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିର୍ଦ୍ଦେଶକ୍ରମେ ଛାତ୍ରଛାତ୍ରୀଙ୍କ ଭବିଷ୍ୟତ ସହ କୌଣସି ପ୍ରକାରର ବୁଝାମଣା କରାଯିବ ନାହିଁ। ପରୀକ୍ଷା ବ୍ୟବସ୍ଥାରେ ସ୍ୱଚ୍ଛତା ଆଣିବା ପାଇଁ ସରକାର ସମ୍ପୂର୍ଣ୍ଣ ପ୍ରତିବଦ୍ଧ ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି ।