Cow Dung Diyas: ଏଥର ଦୀପାବଳିରେ ଜଳିବ ଗୋବର ଦୀପ, ପରିବେଶ ସୁରକ୍ଷା ସହ ଦେଉଛି ସ୍ୱାବଲମ୍ବନର ବାର୍ତ୍ତା
ଦୀପାବଳି ପାଇଁ ଗୋବରରୁ ପ୍ରସ୍ତୁତ ହେଉଛି ନିଆରା ଦୀପ। ପରିବେଶ ସୁରକ୍ଷା ସହ ଗୋବରର ସଦୁପଯୋଗ ଓ ରୋଜଗାରର ନୂଆ ବାର୍ତ୍ତା ଦେଉଛନ୍ତି ଗୋସେବକ।
ଭୁବନେଶ୍ୱର: ଆଲୋକର ପର୍ବ ଦୀପାବଳିକୁ ନେଇ ଏବେଠୁ ଆରମ୍ଭ ହୋଇଗଲାଣି ପ୍ରସ୍ତୁତି। ଦୀପାବଳି ପାଇଁ ତିଆରି ହେଉଛି ରଙ୍ଗବେରଙ୍ଗର ଦୀପ। ହେଲେ ଏଥର ମାଟି କିମ୍ବା ଅନ୍ୟ କୌଣସି ସାମଗ୍ରୀରେ ନୁହେଁ, ବରଂ ଗୋବରରୁ ପ୍ରସ୍ତୁତ ହେଉଛି ନିଆରା ଦୀପ। ଗୋସେବକମାନେ ଗୋବରକୁ ଉପଯୋଗ କରି ତିଆରି କରୁଛନ୍ତି ଏହି ପରିବେଶ ଅନୁକୂଳ ଦୀପ। ଏହି ଦୀପ ପ୍ରସ୍ତୁତିର ଉଦ୍ଦେଶ୍ୟ କେବଳ ଦୀପାବଳିରେ ଘରକୁ ଆଲୋକିତ କରିବା ନୁହେଁ, ବରଂ ପରିବେଶ ସୁରକ୍ଷାର ବାର୍ତ୍ତା ପହଞ୍ଚାଇବା। ଅପଚୟ ହେଉଥିବା ଗୋବରକୁ ଉପଯୋଗ କରି ଏଭଳି ଦୀପ ତିଆରି କରିବା ଏକ ନିଆରା ପ୍ରୟାସ।
ଏହାଦ୍ୱାରା ଗୋବରର ସଦୁପଯୋଗ ହେବା ସହ ଗୋସେବକମାନଙ୍କୁ ରୋଜଗାରର ନୂଆ ମାଧ୍ୟମ ମଧ୍ୟ ମିଳିପାରିବ। ସାଧାରଣ ଲୋକମାନେ ମଧ୍ୟ ଏହି ଗୋବର ଦୀପ କିଣି ନିଜ ଘରେ ଜାଳିବା ସହ ପରିବେଶ ଅନୁକୂଳ ଦୀପାବଳି ପାଳନ କରିପାରିବେ। ପାରମ୍ପରିକ ପର୍ବକୁ ପରିବେଶ ସଚେତନତା ସହ ଯୋଡ଼ିବାର ଏହି ପ୍ରୟାସ ଏବେ ଏକ ନୂଆ ଆକର୍ଷଣ ପାଲଟିଛି। ଆଲୋକର ପର୍ବରେ ଗୋବର ଦୀପର ଆଲୋକ, ପରିବେଶ ସୁରକ୍ଷାର ବାର୍ତ୍ତା ସହ ଏଥର ଦୀପାବଳିକୁ କରିବ ଆହୁରି ନିଆରା।
