ଓଡ଼ିଶା ପାଇଁ ଗୌରବ; ବିଶ୍ୱସ୍ତରରେ ସ୍ୱୀକୃତି ପାଇଲେ ବ୍ରହ୍ମପୁର ବିଶ୍ୱବିଦ୍ୟାଳୟର ଦୁଇ ଗବେଷକ ।

ଗଞ୍ଜାମ: ବିଶ୍ୱର ଶ୍ରେଷ୍ଠ 5 ପ୍ରତିଶତ ବୈଜ୍ଞାନିକ ତାଲିକାରେ ସାମିଲ ହୋଇଛନ୍ତି ଗଞ୍ଜାମ ଜିଲ୍ଲା ବ୍ରହ୍ମପୁର ବିଶ୍ୱବିଦ୍ୟାଳୟର ଦୁଇ ସହଯୋଗୀ ପ୍ରଫେସର। ରାଜ୍ୟ ଓ ଦେଶପାଇଁ ପାଲଟିଛନ୍ତି ଗର୍ବର ବିଷୟ। ଗବେଷଣା ଦିଗରେ ପାଇଲେ ବଡ଼ ସଫଳତା। ବ୍ରହ୍ମପୁର ବିଶ୍ବବିଦ୍ୟାଳୟର ଉଭିଦବିଜ୍ଞାନର ସହଯୋଗୀ ପ୍ରଫେସର ମୃତ୍ୟୁଞ୍ଜୟ ଜେନା ଓ ପ୍ରାଣୀ ବିଜ୍ଞାନ ସହଯୋଗୀ ପ୍ରଫେସର ତପନ କୁମାର ବାରିକ। ଗବେଷଣା ଓ ବୈଜ୍ଞାନିକ ଅବଦାନ ଆଧାରରେ ପ୍ରକାଶିତ ସାଇନ୍ସ ରାଙ୍କ ଗ୍ଲୋବାଲ ରେଜିଷ୍ଟ୍ରି-2025ରେ ବିଶ୍ଵର ଶ୍ରେଷ୍ଠ 5 ପ୍ରତିଶତ ବୈଜ୍ଞାନିକ ତାଲିକାରେ ସ୍ଥାନ ପାଇଛନ୍ତି । ନୀଳ ହରିତ ଶୈବାଳ ଏବଂ ସାମୁଦ୍ରିକ ଶୈବାଳରୁ ଔଷଧୀୟ ଗୁଣବତ୍ତା ଓ ଜୈବ ବିବିଧତା ଉପରେ ଗବେଷଣା କରି ସେ ଏହି ତାଲିକାରେ ସ୍ଥାନ ପାଇଛନ୍ତି | ଯାହାକି ଆଗାମୀ ଦିନରେ କ୍ୟାନସର ଭଳି ମାରାତ୍ମକ ରୋଗର ନିରାକରଣ ପାଇଁ ତିଆରି ହେବ ଔଷଧ । ଏ ଯାତ୍ରା ଏତେ ସହଜ ନଥିଲା, ବର୍ଷ ବର୍ଷ ଧରି ଗୁଣାତ୍ମକ ଗବେଷଣା ପାଇଁ ମିଳିଛି ଏ ବଡ଼ ସଫଳତା। ବିଗତ 10ବର୍ଷ ମଧ୍ୟରେ ତାଙ୍କର 70ରୁ ଉର୍ଦ୍ଧ୍ବ ଗବେଷଣାତ୍ମକ ପେପର୍ ପ୍ରକାଶ ପାଇଥିବା ବେଳେ ଗତବର୍ଷ ୧୦ଟି ଗବେଷଣାତ୍ମକ ପେପର୍ ପ୍ରକାଶ ପାଇ ସାରିଛି । 

ରିପୋର୍ଟ- ଇତିଶ୍ରୀ ସମାପିକା ମହାନ୍ତି