ବିକାଶ ଠାରୁ ଅଧିକ ଚର୍ଚ୍ଚାରେ ଶ୍ରେୟ ରାଜନୀତି, କେନ୍ଦ୍ରବିନ୍ଦୁରେ ଚନ୍ଦନେଶ୍ୱର-ଜଳେଶ୍ୱର ରାସ୍ତା।

ଭୋଗରାଇ: ରାସ୍ତା ଚାରି ଲେନ୍ ହେବ, ବଦଳିବ ବାଲେଶ୍ବର ଭୋଗରାଇର ଚେହେରା । ଏହି ଆଶାରେ ଭୋଗରାଇବାସୀ ଖୁସି ତ ଅଛନ୍ତି, ହେଲେ ଏହା ପଛର ଶ୍ରେୟ ନେବାକୁ ଏବେ ନେତାଙ୍କ ଭିତରେ ଟଣାଓଟରା ଆରମ୍ଭ ହୋଇଯାଇଛି। ଚନ୍ଦନେଶ୍ୱର- ଜଳେଶ୍ୱର ରାସ୍ତା ପାଇଁ ରାଜ୍ୟ ସରକାର ୧୮୫ କୋଟି ଟଙ୍କା ମଞ୍ଜୁର କରିବା ପରେ ଭୋଗରାଇ ରାଜନୀତିରେ ଏବେ ପ୍ରେସମିଟ୍ ଓ କାଉଣ୍ଟର ପ୍ରେସମିଟ୍‌ର ବନ୍ୟା ଛୁଟିଛି। ପ୍ରଥମେ ଶ୍ରେୟ ମଇଦାନକୁ ଓହ୍ଲାଇଥିଲା ବିଜେଡି। ସ୍ଥାନୀୟ ବିଜେଡି ବିଧାୟକ ଗୌତମବୁଦ୍ଧ ଦାସ ସାମ୍ବାଦିକ ସମ୍ମିଳନୀ କରି ଦାବି କରିଛନ୍ତି ଯେ, ସେ ସଡ଼କ ପରିବହନ ମନ୍ତ୍ରୀଙ୍କୁ ଚିଠି ଲେଖିବା ଏବଂ ବିଧାନସଭାରେ ଏହି ପ୍ରସଙ୍ଗ ଜୋରଦାର ଉଠାଇବା ପରେ ଯାଇ ସରକାର ଏହି ଅର୍ଥ ମଞ୍ଜୁର କରିଛନ୍ତି। ବିଧାୟକଙ୍କ ପ୍ରୟାସ ଯୋଗୁଁ ହିଁ ଏହି ସଫଳତା ମିଳିଛି ବୋଲି ଶଙ୍ଖ ଦଳ ଦାବି କରୁଛି। ସେପଟେ ବିଜେଡି କୁ କଡ଼ା କାଉଣ୍ଟର କରିଛି ଭୋଗରାଇ ବିଜେପି । ବିଜେପି ନେତା ଆଶିଷ ପାତ୍ରଙ୍କ କହିବା କଥା, ଏହା ହେଉଛି ଜନସାଧାରଣଙ୍କ ମୋହନ ସରକାର । ବିଧାୟକ ଯଦି କେବଳ ଚିଠି ଲେଖି ସବୁ କିଛି କରିଦେଇ ପାରୁଥାନ୍ତେ, ତେବେ ସରକାରଙ୍କର ଆଉ କିଛି କାମ ନଥାନ୍ତା। "ଧନ୍ୟବାଦ ସରକାର" କହି ବିଜେପି ଏବେ ଭୋଗରାଇର ପ୍ରମୁଖ ଛକରେ ବଡ଼ ବଡ଼ ହୋଡିଂ ମାରି ପ୍ରଚାରକୁ ଜୋରଦାର କରିଛି । ଏପଟେ ଏହି ଲଢ଼େଇରେ କଂଗ୍ରେସ ମଧ୍ୟ ପଛରେ ନାହିଁ। ବାଲେଶ୍ୱର ଜିଲ୍ଲା କଂଗ୍ରେସ ସଭାପତି ସତ୍ୟଶିବ ଦାସ ପ୍ରେସମିଟ୍ କରି ଉଭୟ ବିଜେଡି ଓ ବିଜେପିକୁ ତୀବ୍ର ସମାଲୋଚନା କରିବା ସହ, ଯାହା ବି କାମ ହୋଇଥିଲା ତାହା କଂଗ୍ରେସ ଶାସନ ସମୟରେ ହିଁ ହୋଇଥିଲା। କେନ୍ଦ୍ରରେ ବିଜେପିର ୧୪ ବର୍ଷ ଓ ରାଜ୍ୟରେ ବିଜେଡିର ୨୪ ବର୍ଷର ଶାସନ କାଳରେ କେହି ଏହି ରାସ୍ତା ଆଡ଼େ ଚାହିଁ ନଥିଲେ। ଏବେ କେବଳ ନିର୍ବାଚନ ବୈତରଣୀ ପାର୍ ହେବା ପାଇଁ ଏହା ଉଭୟ ଦଳର ଏକ ନୂଆ ଚାଲ୍ ବୋଲି କଂଗ୍ରେସ କହିଛି। ଏତିକିରେ ଶ୍ରେୟ ରାଜନୀତି ସରିନି। ନିକଟରେ ବିଜେପିରେ ସାମିଲ ହୋଇ ଚର୍ଚ୍ଚାରେ ଥିବା ପୂର୍ବତନ ବିଧାୟକ ତଥା ମନ୍ତ୍ରୀ ସ୍ୱର୍ଗତ ଅନନ୍ତ ଦାସଙ୍କ ପୁଅ ଅଭିଜିତ ଦାସ ମଧ୍ୟ ଏହି ମଇଦାନକୁ ଓହ୍ଲାଇଛନ୍ତି। ସେ ସାମ୍ବାଦିକ ସମ୍ମିଳନୀରେ ସିଧାସଳଖ ତଥ୍ୟ ପ୍ରମାଣ ଦେଖାଇ ବର୍ତ୍ତମାନର ବିଧାୟକଙ୍କୁ ଘେରିଛନ୍ତି। ଅଭିଜିତଙ୍କ ଦାବି ଅନୁସାରେ, ତାଙ୍କ ବାପା ଏହି ଚାରି ଲେନ୍ ରାସ୍ତାର ପ୍ରସ୍ତାବ ଦେଇଥିଲେ ଏବଂ ସେଥିପାଇଁ ଆଜି ଏହା କାର୍ଯ୍ୟକାରୀ ହୋଇଛି। ବିଧାୟକ ମିଛ କହି ଭୋଗରାଇବାସୀଙ୍କୁ ଭ୍ରମିତ କରୁଛନ୍ତି ବୋଲି କହିଛନ୍ତି ଅଭିଜିତ। ୧୮୫ କୋଟିର ମଞ୍ଜୁରୀକୁ ନେଇ ପ୍ରେସମିଟ୍, କାଉଣ୍ଟର ପ୍ରେସମିଟ୍ ଏବଂ ହୋଡିଂ ମାରିବାରେ ସବୁ ଦଳ ବ୍ୟସ୍ତ। ହେଲେ ରାସ୍ତା ନିର୍ମାଣ କେମିତି ହେବ, କେତେ ଶୀଘ୍ର ସରିବ ଏବଂ ଭୋଗରାଇବାସୀଙ୍କ ଦୈନନ୍ଦିନ ସମସ୍ୟାର ସମାଧାନ କେମିତି ହେବ, ସେ ନେଇ କୌଣସି ଦଳ କିମ୍ବା ନେତାଙ୍କ ପାଖରେ ସ୍ପଷ୍ଟ ବ୍ଲୁ-ପ୍ରିଣ୍ଟ ନାହିଁ। ଜନତାଙ୍କ ଆଗରେ କେବଳ ନିଜକୁ ଶ୍ରେଷ୍ଠ ଦେଖାଇବା ପାଇଁ ଏବେ ଭୋଗରାଇ ରାଜନୀତି ବେଶ୍ ସରଗରମ।

ରିପୋର୍ଟ- ​ସୌରଭ ରାଉଳ, ଜଳେଶ୍ୱର