ଆଇନଜୀବୀ କଲ୍ୟାଣ ରାଶି ୪୦ ପ୍ରତିଶତ ବୃଦ୍ଧି, ଅବସର ଓ ଦେହାନ୍ତ କ୍ଷେତ୍ରରେ ନୂତନ ସହାୟତା ଘୋଷଣା

 ଭୁବନେଶ୍ୱର: ରାଜ୍ୟର ଆଇନଜୀବୀମାନଙ୍କ ପାଇଁ ବଡ଼ ଖବର। ଆଇନଜୀବୀ କଲ୍ୟାଣ ପାଣ୍ଠିରୁ ପ୍ରଦାନ କରାଯାଉଥିବା ସହାୟତା ରାଶିକୁ ରାଜ୍ୟ ସରକାର ୪୦ ପ୍ରତିଶତ ବୃଦ୍ଧି କରିଛନ୍ତି। ଏହି ନିଷ୍ପତ୍ତି ଫଳରେ ରାଜ୍ୟର ବିଭିନ୍ନ ଅଦାଳତରେ କାର୍ଯ୍ୟରତ ହଜାର ହଜାର ଆଇନଜୀବୀ ଓ ସେମାନଙ୍କ ପରିବାର ସିଧାସଳଖ ଉପକୃତ ହେବେ। ରାଜ୍ୟ ଆଇନଜୀବୀ କଲ୍ୟାଣ ପାଣ୍ଠି ମାଧ୍ୟମରେ କାର୍ଯ୍ୟରତ ଆଇନଜୀବୀମାନଙ୍କୁ ଅବସର ଗ୍ରହଣ କିମ୍ବା ଦେହାନ୍ତ ପରେ ସହାୟତା ପ୍ରଦାନ କରାଯାଏ। ନୂତନ ବ୍ୟବସ୍ଥା ଅନୁଯାୟୀ, ୫ ବର୍ଷ କିମ୍ବା ତାହାଠାରୁ କମ୍ ଅଭିଜ୍ଞତା ଥିବା କୌଣସି ଆଇନଜୀବୀଙ୍କ ଦେହାନ୍ତ ଘଟିଲେ ତାଙ୍କ ପରିବାରକୁ ୧ ଲକ୍ଷ ୫ ହଜାର ଟଙ୍କା ସହାୟତା ମିଳିବ। ସେହିପରି ଜଣେ ଆଇନଜୀବୀଙ୍କ ଅଭିଜ୍ଞତା ବର୍ଷ ବଢ଼ିବା ସହ ସହାୟତା ରାଶି ମଧ୍ୟ ବୃଦ୍ଧି ପାଇବ। ୩୦ ବର୍ଷ ଅଭିଜ୍ଞତା ଥିବା ଜଣେ ଆଇନଜୀବୀଙ୍କ ଅବସର କିମ୍ବା ଦେହାନ୍ତ କ୍ଷେତ୍ରରେ ତାଙ୍କ ପରିବାରର ନିକଟତମ ଆତ୍ମୀୟଙ୍କୁ ୬ ଲକ୍ଷ ୩୦ ହଜାର ଟଙ୍କା ସହାୟତା ପ୍ରଦାନ କରାଯିବ। ସୂଚନାଯୋଗ୍ୟ ଯେ, ଶେଷଥର ପାଇଁ ୨୦୨୧ ମସିହାରେ ଏହି ସହାୟତା ରାଶିର ସଂଶୋଧନ କରାଯାଇଥିଲା। ବର୍ତ୍ତମାନର ଏହି ବୃଦ୍ଧି ଦ୍ୱାରା ଆଇନଜୀବୀମାନଙ୍କ ସାମାଜିକ ସୁରକ୍ଷା ଆହୁରି ସୁଦୃଢ଼ ହେବ ବୋଲି ସରକାର ଆଶା ପ୍ରକାଶ କରିଛନ୍ତି। ରାଜ୍ୟ ସରକାରଙ୍କ ଏହି ପଦକ୍ଷେପକୁ ଆଇନଜୀବୀ ସମୁଦାୟ ସ୍ୱାଗତ କରିଥିବାବେଳେ ଏହା ଆଇନ ପେଶା ସହ ଜଡ଼ିତ ବ୍ୟକ୍ତିମାନଙ୍କୁ ଆର୍ଥିକ ସୁରକ୍ଷା ଯୋଗାଇବ ବୋଲି ମତ ପ୍ରକାଶ ପାଇଛି।