ପାଣି ନିଷ୍କାସନ ଦାବିରେ ତହସିଲ ଅଫିସ ସାମ୍ନାରେ ୨୦ ପରିବାରଙ୍କ ଧାରଣା

ରାଜକନିକା : ପାଣି ନିଷ୍କାସନ ଦାବିରେ ତହସିଲ ଅଫିସ ସାମ୍ନାରେ ୨୦ ପରିବାରଙ୍କ ଧାରଣା। କେନ୍ଦ୍ରାପଡ଼ା ଜିଲ୍ଲାର ରାଜକନିକା ତହସିଲ ଅଧୀନ କୋଇଲିପୁର ପଞ୍ଚାୟତର ଗଜରାଜପୁର ଗାଁରେ ପାଣି ନିଷ୍କାସନ ସମସ୍ୟାକୁ ନେଇ ଉତ୍ତେଜନା ଦେଖାଦେଇଛି। ଦୀର୍ଘ ଦିନ ଧରି ପ୍ରଶାସନ ନିକଟରେ ଗୁହାରି କରି ମଧ୍ୟ ସମାଧାନ ନ ମିଳିବାରୁ ଗାଁର ପ୍ରାୟ ୨୦ଟି ପରିବାର ସୋମବାର ରାଜକନିକା ତହସିଲ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି। ଅଭିଯୋଗ ଅନୁଯାୟୀ, ଗାଁ ମୁଣ୍ଡରେ ଥିବା ପାଣି ନାଳକୁ କିଛି ବ୍ୟକ୍ତି ମାଟି ପକାଇ ବନ୍ଦ କରିଦେଇଥିବାରୁ ବର୍ଷା ଜଳ ନିଷ୍କାସନ ହୋଇପାରୁନାହିଁ। ଫଳରେ ମୌସୁମୀ ବର୍ଷା ସମୟରେ ଗାଁର ଅନେକ ଘରେ ପାଣି ପଶି ଲୋକେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏନେଇ ଗ୍ରାମବାସୀ ପୂର୍ବରୁ ରାଜକନିକା ଥାନା ଏବଂ କନିକା ତହସିଲଦାରଙ୍କୁ ଲିଖିତ ଅଭିଯୋଗ କରିଥିଲେ। କିନ୍ତୁ ଅଭିଯୋଗ ପରେ ମଧ୍ୟ କୌଣସି ପଦକ୍ଷେପ ଗ୍ରହଣ ନ ହେବାରୁ ସୋମବାର ମହିଳାମାନେ ନିଜ ଶିଶୁଙ୍କୁ ସାଙ୍ଗରେ ନେଇ ତହସିଲ କାର୍ଯ୍ୟାଳୟ ଆଗରେ ଧାରଣା ଦେଇଛନ୍ତି। ଧାରଣାକାରୀଙ୍କ କହିବା ଅନୁସାରେ, ଯେପର୍ଯ୍ୟନ୍ତ ତହସିଲଦାର ଘଟଣାସ୍ଥଳକୁ ଯାଇ ତଦନ୍ତ କରି ପାଣି ନିଷ୍କାସନର ବ୍ୟବସ୍ଥା କରିନାହାନ୍ତି, ସେପର୍ଯ୍ୟନ୍ତ ସେମାନେ ଧାରଣାରୁ ଉଠିବେ ନାହିଁ। ଏପଟେ ତହସିଲଦାର ଭାନୁମତୀ ମାଝୀ କହିଛନ୍ତି ଯେ, ରାଜସ୍ୱ ନିରୀକ୍ଷକ (ଆର୍‌ଆଇ)ଙ୍କ ରିପୋର୍ଟ ମିଳିବା ପରେ ଆବଶ୍ୟକ ପଦକ୍ଷେପ ନିଆଯିବ।