ବୃଦ୍ଧାଙ୍କୁ ନିଜ ଅଫିସ ଗାଡ଼ିରେ ଘରେ ପହଞ୍ଚାଇ ଚର୍ଚ୍ଚାରେ ତେନ୍ତୁଳିଖୁଣ୍ଟି ବିଡିଓ

ନବରଙ୍ଗପୁର: ସରକାରୀ ଅଧିକାରୀଙ୍କ ମାନବିକତାର ଏକ ନିଆରା ଉଦାହରଣ ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ଅଞ୍ଚଳରେ ଦେଖିବାକୁ ମିଳିଛି। ସ୍ୱାସ୍ଥ୍ୟ ପରୀକ୍ଷା ସାରି ପ୍ରଚଣ୍ଡ ଖରାରେ ଚାଲି ଚାଲି ଘରକୁ ଫେରୁଥିବା ଜଣେ ବୃଦ୍ଧାଙ୍କୁ ନିଜ ଅଫିସ ଗାଡ଼ିରେ ଘରେ ପହଞ୍ଚାଇ ଚର୍ଚ୍ଚାରେ ରହିଛନ୍ତି ତେନ୍ତୁଳିଖୁଣ୍ଟି ବିଡିଓ ମନୋଜ ପାଣିଗ୍ରାହୀ। ସୂଚନା ଅନୁସାରେ, ତେନ୍ତୁଳିଖୁଣ୍ଟିଠାରୁ ପ୍ରାୟ ୩ କିଲୋମିଟର ଦୂରରେ ଥିବା ଗୌଡ଼ଗୁଡା ଗ୍ରାମର ବୃଦ୍ଧା ସୁନାଦେଇ ବାଘ ସ୍ୱାସ୍ଥ୍ୟ ପରୀକ୍ଷା ପାଇଁ ତେନ୍ତୁଳିଖୁଣ୍ଟି ମେଡିକାଲକୁ ଆସିଥିଲେ। ପରୀକ୍ଷା ଓ ଔଷଧ ନେବା ପରେ ସେ ଦ୍ୱିପ୍ରହରର ଟାଣ ଖରାରେ ପାଦରେ ଚାଲି ଚାଲି ନିଜ ଗ୍ରାମକୁ ଫେରୁଥିଲେ। ଏହି ସମୟରେ ସରକାରୀ କାମରେ ନିଜ ଅଫିସ ଗାଡ଼ିରେ ଯାଉଥିବା ବିଡିଓ ମନୋଜ ପାଣିଗ୍ରାହୀଙ୍କ ନଜର ବୃଦ୍ଧାଙ୍କ ଉପରେ ପଡ଼ିଥିଲା। ସେ ତୁରନ୍ତ ଗାଡ଼ି ଅଟକାଇ ବୃଦ୍ଧାଙ୍କ ନିକଟକୁ ଯାଇ ତାଙ୍କ ସହ କଥା ହୋଇଥିଲେ। ବୃଦ୍ଧାଙ୍କ ଅସୁବିଧା ବୁଝିବା ପରେ ସେ ନିଜେ ତାଙ୍କୁ ଗାଡ଼ିରେ ବସାଇ ଗୌଡ଼ଗୁଡାସ୍ଥିତ ଘରେ ସୁରକ୍ଷିତ ଭାବେ ପହଞ୍ଚାଇଥିଲେ। ବିଡିଓଙ୍କ ଏହି ମାନବିକ ପଦକ୍ଷେପର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଚାରିଆଡ଼େ ପ୍ରଶଂସାର ସୁଅ ଛୁଟିଛି। ସାଧାରଣ ଲୋକେ ତାଙ୍କ ଏହି ଉଦାରତା ଓ ସମ୍ବେଦନଶୀଳତାକୁ ସ୍ୱାଗତ କରିବା ସହ ଜଣେ ଜନସେବକଙ୍କ ଏଭଳି ଆଚରଣ ଅନ୍ୟମାନଙ୍କ ପାଇଁ ପ୍ରେରଣା ବୋଲି ମତ ପ୍ରକାଶ କରିଛନ୍ତି।